|
ຕາມຂ່າວສານຊິນຮວາ: ວັນທີ 7 ພະຈິກນີ້ ສື່ມວນຊົນມຽນມາລາຍງານວ່າ, ໃນເວລາທີ່ຄະນະຜູ້ແທນອຳນາດເຕັມຂອງມຽນມາ ພົບປະກັບທ່ານອີບຼາຮິມ ກຳບາຣີ ທູດພິເສດກ່ຽວກັບບັນຫາມຽນມາຂອງເລຂາທິການໃຫຍ່ສະຫະປະຊາຊາດ ຢູ່ທີ່ເນປີດໍ ນະຄອນຫຼວງໃໝ່ຂອງມຽນມາ ໃນວັນທີ 6 ພະຈິກນີ້ ໄດ້ກ່າວເນັ້ນວ່າ, ປະເທດຝ່າຍຕາເວັນຕົກ ເຊັ່ນອາເມລິກາເປັນຕົ້ນລົງໂທດມຽນມາ ບໍ່ພຽງແຕ່ຈະກະທົບກະເທືອນເຖິງການພັດທະນາເສດຖະກິດຂອງມຽນມາເທົ່ານັ້ນ, ແລະກໍຈະບໍ່ມີຜົນດີແຕ່ຢ່າງໃດຕໍ່ການຊຸກຍູ້ຂະບວນວິວັດປະຊາທິປະໄຕມຽນມາອີກດ້ວຍ.
ວັນທີ 6 ພະຈິກນີ້, ຄະນະຜູ້ແທນອຳນາດເຕັມຂອງມຽນມາ ທີ່ນຳພາໂດຍພົນຈັດຕະວາໂຄວຊານ ລັດຖະມົນຕີກະຊວງໂຄສະນາມຽນມາ ໄດ້ພົບປະເຈລະຈາກັບທ່ານກຳບາຣີ. ທ່ານໂຄວຊານກ່າວວ່າ, ຍ້ອນມຽນມາຖືກປະເທດຝ່າຍຕາເວັນຕົກລົງໂທດເປັນເວລາດົນນານ, ເສດຖະກິດແຫ່ງຊາດ ແລະຊີວິດການເປັນຢູ່ຂອງປະຊາຊົນມຽນມາ ບໍ່ໄດ້ຮັບການພັດທະນາແລະປັບປຸງ. ມີແຕ່ຍົກເລີກການລົງໂທດທັງໝົດເທົ່ານັ້ນ, ຈຶ່ງຈະສາມາດເຈລະຈາການຮ່ວມມືໃໝ່ໄດ້.
ທ່ານກຳບາຣີກ່າວວ່າ, ປະເທດອາຊີທີ່ທ່ານໄປຢ້ຽມຢາມກ່ອນໜ້ານີ້ ລ້ວນແຕ່ບໍ່ຄັດຄ້ານແຜນການເສັ້ນທາງປະຊາທິປະໄຕ 7 ຂໍ້ ທີ່ລັດຖະບານມຽນມາສະເໜີອອກມານັ້ນ, ຫວັງວ່າຝ່າຍມຽນມາຈະວາງຕາຕະລາງເວລາກ່ຽວກັບການຮ່າງລັດຖະທຳມະນູນສະບັບໃໝ່ ແລະ ການຢັ່ງປະຊາມະຕິທົ່ວປວງຊົນ ຕາມແຜນການເສັ້ນທາງປະຊາທິປະໄຕ.
|
