ຕາມ​ຂ່າວ CRI: ວັນ​ທີ 7 ພະຈິກ​ນີ້, ທ່ານ​ລໍ​ຫາວ​ສາຍ ຮອງ​ປະທານ​ສະພາ​ປຶກສາ​ການ​ເມືອງ​ປະຊາຊົນ​ແຫ່ງ​ຊາດ​ຈີນ​ກ່າວ​ວ່າ, ​ໃນ​ພາກສ່ວນ​ກ່ຽວ​ກັບ​ການ​ສ້າງສາ​ເສດຖະ ກິດ​ສັງ​ຄົມ​ນິຍົມ ການ​ກໍ່ສ້າງ​ການ​ເມືອງ ​​ວັດທະນະທຳ ​ແລະ ​ສັງຄົມ ທີ່​ນອນ​ຢູ່​ໃນບົດ​ລາຍ​ງານ​ຂອງ​ກອງ​ປະຊຸມ​ໃຫຍ່​ຄັ້ງທີ 17 ຂອງ​ພັກ​ກອມ​ມູນິດ​ຈີນ, ​ໄດ້​ມີ​ເນື້ອ​ໃນ​ທີ່​ໂຄລົບ​ແລະ​ຮັບ​ປະ​ກັນ​ສິດ​ທິ​ມະນຸດ​ຫຼາຍໆ​ບ່ອນ.

ທ່ານ​ລໍ​ຫາວ​ສາຍ​ໃຫ້​ທັດ​ສະ​ນະ​ດັ່ງກ່າວ ​ໃນ​ງານ​ສົນ​ທະ​ນາ​ກ່ຽວ​ກັບ​ການຮ່ຳ​ຮຽນ​ແລະ​ຜັນ​ຂະຫຍາຍຈິດ​ໃຈ​ກອງ​ປະ​ຊຸມ​ໃຫຍ່​ຄັ້ງທີ 17 ຂອງ​ພັກ​ກອມ​ມູ​ນິດ​ຈີນ ​ເຊິ່ງ​ແມ່ນ​ສະ​ຖາ​ບັນ​ຄົ້ນຄວ້າ​ສິດທິ​ມະນຸດ​ຈີນ​ຈັດ​ຂຶ້ນຢູ່​ທີ່​ປັກ​ກິ່ງ.

ທ່ານ​ລໍ​ຫາວ​ສາຍ​ກ່າວ​ວ່າ, ​ໃນ 5 ປີ​ ເຊິ່ງນັບ​ແຕ່ກອງ​ປະຊຸມ​ໃຫຍ່​ຄັ້ງທີ 16 ຂອງ​ພັກ​ກອມ​ມູນິດ​ຈີນ​ມາ​ນີ້, ການ​ກໍ່ສ້າງ​ລະບອບ​ກົດໝາຍ​ປະຊາທິປະ​ໄຕ​ຂອງ​ຈີນ​ໄດ້​ມີ​ຄວາມ​ກ້າວ​ໜ້າ​ຫຼາຍ, ລະບອບ​ກົດໝາຍ​ຮັບປະກັນ​ສິດທິ​ມະນຸດ ​ເຊິ່ງ​ແມ່ນ​ລັດຖະທຳ​ມະນູນ​ເປັນ​ໃຈກາງ ​ໄດ້​ຮັບ​ການ​ບູລະນະ​ໃຫ້​ສົມບູນ​ຢ່າງ​ບໍ່​ຢຸດ​ຢັ້ງ, ສິດ​ປະຊາທິປະ​ໄຕ​ຂອງ​ປະ​ຊາ​ຊົນ​ໄດ້​ມີ​ການ​ຮັບ​ປະ​ກັນ​ຢ່າງ​ບັງ​ເກີດ​ຜົນ. ທ່ານ​ກ່າວ​ວ່າ, ​ໃນ​ບົດ​ລາຍ​ງານ​ຂອງ​ກອງ​ປະ​ຊຸມ​ໃຫຍ່​ຄັ້ງທີ 17 ຂອງ​ພັກ​ກອມ​ມູນິດ​ຈີນ ​ໄດ້​ກ່າວຄຳ​ວ່າ "ປະຊາທິປະ​ໄຕ" ​ເຖິງ 64 ​ເທື່ອ, ມີ​ສອງ​ເທື່ອ​ໄດ້​ເນັ້ນ​ເຖິງ "​ສິດທິ​ມະນຸດ", ອັນ​ໄດ້​ສະ​ແດງ​ໃຫ້​ເຫັນ​ຢ່າງ​ເຕັມທີ່​ວ່າ ພັກ​ກອມ​ມູນິດ​ຈີນ​ເອົາ​ໃຈ​ໃສ່​ນຳ​ສິດ​ທິ​ມະນຸດ​ໃນ​ລະດັບ​ສູງ.

ທ່ານ​ລໍ​ຫາວ​ສາຍ​ກ່າວ​ວ່າ, ບົດ​ລາຍ​ງານ​ຂອງ​ກອງ​ປະຊຸມ​ໃຫຍ່​ຄັ້ງ​ທີ 17 ຂອງ​ພັກ​ກອມ​ມູນິດ​ຈີນ ​ໄດ້​ຊີ້​​ແຈງທິດ​ພັດທະນາ​ຂອງ​ວຽກ​ງານ​ສິດທິ​ມະນຸດ​ຂອງ​ຈີນ, ຍັງ​ເປັນ​​ໂຄງການ​ດຳ​ເນີນ​ງານ​ແລະເຂັມທິດຂອງຈີນ​ ໃນ​ການ​ເຮັດ​ວຽກ​ດ້ານ​ສິດທິ​ມະນຸດ​ແລະ​​ເພີ່ມ​ທະວິ​ການ​ກໍ່ສ້າງ​ທິດ​ສະ​ດີແນວ​ຄິດ​ສິດທິມະ​ນຸດ ​ໃນ​ຕໍ່ໜ້າ.