|
ຈີນຕັ້ງໜ້າຮັບປະກັນຄວາມປອດໄພຂອງການຂົນສົ່ງນ້ຳມັນເຊື້ອໄຟ, ອະນຸລັກສິ່ງແວດລ້ອມທາງທະເລ
cri
ຕາມຂ່າວ CRI: ວັນທີ 7 ພະຈິກນີ້, ຢູ່ທີ່ຊຽງໄຮ້ ເມືອງທ່າພາກຕາເວັນອອກຂອງຈີນ, ທ່ານລິວກົ່ງເຊີນ ຮອງຫົວໜ້າກົມທະເລຂອງຈີນກ່າວວ່າ, ຈີນຈະໃຊ້ມາດຕະການອັນຕັ້ງໜ້າ, ຮັບປະກັນຄວາມປອດໄພຂອງການຂົນສົ່ງນ້ຳມັນເຊື້ອໄຟ, ອະນຸລັກສິ່ງແວດລ້ອມທະເລ.
ໃນເວທີປາໄສທະເລສາກົນຊຽງໄຮ້ປີ 2007 ທີ່ໄຂຂຶ້ນໃນວັນທີ 7 ພະຈິກນີ້, ທ່ານລິວກົ່ງເຊີນກ່າວວ່າ, ຈີນຈະປະຕິບັດກົດໝາຍຕິດຕາມຄຸ້ມຄອງທາງທະເລໃຫ້ແຂງແຮງກວ່າເກົ່າ, ເລັ່ງລັດສ້າງລະບົບຮັບມືສະພາບສຸກເສີນໃນເວລາເກີດເຫດການກ່ຳປັ່ນບັນທຸກນ້ຳມັນເຊື້ອໄຟໄຫຼ. ທ່ານຍັງກ່າວວ່າ, ຈີນຈະສືບຕໍ່ເພີ່ມທະວີການຮ່ວມມືສາກົນ, ທຳຄວາມພະຍາຍາມພ້ອມກັນກັບປະເທດຕ່າງໆໃນໂລກ, ຮັບປະກັນຄວາມປອດໄພຂອງການຂົນສົ່ງນ້ຳມັນເຊື້ອໄຟເທີງທະເລ.
ເວທີປາໄສທະເລສາກົນຊຽງໄຮ້ປີ 2007 ໄດ້ດຳເນີນເປັນເວລາ 2 ວັນ, ໂດຍມີຫົວຂໍ້ວ່າ: ທົ່ວໂລກເອົາໃຈໃສ່ນຳການຂົນສົ່ງນ້ຳມັນເຊື້ອໄຟແລະການອະນຸລັກສິ່ງແວດລ້ອມທະເລ.
|
|
