|
ແຂວງຊິ່ງຫາຍຈີນເລັ່ງລັດການຫັນປ່ຽນຮູບການເຕີບໂຕຂອງເສດຖະກິດ
cri
ຕາມຂ່າວ CRI: ໃນຫຼາຍປີມານີ້, ແຂວງຊິ່ງຫາຍພາກຕາເວັນຕົກຂອງຈີນຍຶດໝັ້ນທິດຊີ້ນຳທີ່ວ່າ: ຖືຄົນເປັນກົກ, ຖືການອະນຸລັກສິ່ງແວດລ້ອມເປັນວຽກງານອັນດັບໜຶ່ງ, ຈັດວາງຢ່າງມີວິທະຍາສາດ. ເພີ່ມທະວີການອະນຸລັກຊີວະພາບຢູ່ເຂດແຫຼ່ງນ້ຳຂ 3 ສາຍ, ຫັນປ່ຽນຮູບການເຕີບໂຕຂອງເສດຖະກິດເຂດລ້ຽງສັດ.
ຫວ່າງມໍ່ໆນີ້, ຄະນະກຳມະການພັດທະນາແລະປະຕິຮູບຂອງແຂວງຊິ່ງຫາຍແຈ້ງໃຫ້ຊາບວ່າ, ປະຈຸບັນ, ໃນ 22 ໂຄງການທີ່ຕົກລົງໃນແຜນການລວມກ່ຽວກັບການອະນຸລັກແລະສ້າງສາທຳມະຊາດຂອງເຂດສະຫງວນແຫຼ່ງນ້ຳ 3 ສາຍຂອງແຂວງຊິ່ງຫາຍ, ໄດ້ປະຕິບັດ 18 ໂຄງການແລ້ວ, ແລະໄດ້ຮັບຜົນເບື້ອງຕົ້ນ. ນັບແຕ່ປະຕິບັດແຜນການດັ່ງກ່າວເປັນຕົ້ນມາ, ທ່ວງທ່າທີ່ທົ່ງຫຍ້າໃນເຂດປະຕິບັດໂຄງການຫຼຸດໜ້ອຍລົງນັ້ນໄດ້ຮັບການສະກັດກັ້ນໂດຍພື້ນຖານ, ໂດຍຜ່ານການອົບຮົມຝີມື, ໄດ້ບັນລຸການຫັນປ່ຽນຮູບການດຳລົງຊີວິດແລະການຜະລິດຂອງປະຊາຊົນລ້ຽງສັດ, ເຕັກນິກຜະລິດແລະລະດັບທຸລະກິດໄດ້ຍົກສູງຂຶ້ນໂດຍທົ່ວໄປ.
ແຫຼ່ງນ້ຳຂ 3 ສາຍແມ່ນແຫຼ່ງຂອງ 3 ແມ່ນ້ຳທີ່ມີຊື່ສຽງຂອງຈີນ, ຄື: ແມ່ນ້ຳຮວງເຮີ, ແມ່ນ້ຳຢາງເຊ, ແລະແມ່ນ້ຳລ້ານຊ້າງ, ຍ້ອນສາເຫດຈາກທຳມະຊາດແລະຝີມືມະນຸດ, ສິ່ງແວດລ້ອມທຳມະຊາດຂອງເຂດນີ້ຊຸດໂຊມລົງຢ່າງໜັກໜ່ວງ. ແຜນການດັ່ງກ່າວມີຈຸດປະສົງເພື່ອສະກັດກັ້ນບໍ່ໃຫ້ສິ່ງແວດລ້ອມທາງທຳມະຊາດເຂດດັ່ງກ່າວຊຸດໂຊມລົງອີກ, ແລະເສີມສ້າງຄວາມສາມາດພັດທະນາແບບຍືນຍົງຂອງເຂດນີ້.
|
|
