ຕາມ​ຂ່າວ CRI: ວັນ​ທີ 15 ພະຈິກ​ນີ້, ທ່ານ​ຄ່າງ​ຢື້​ຊິ່ນ ຜູ້ອຳນວຍການ​ໃຫຍ່​ກຸ່ມບໍ​ລິ​ສັດ​ອຸດ​ສາ​ຫະ​ກຳ​ນິວ​ເຄຼຍຈີນ​​ໄດ້​ກ່າວ​ໃນກອງ​ປະຊຸມ​ພະລັງງານ​​ໂລກ​ຄັ້ງ​ທີ 20 ທີ່​ຈັດ​ຂຶ້ນ​ຢູ່​​ໂຣມ​ວ່າ, ​ເພື່ອ​ຫຼຸດຜ່ອນການ​ລະບາຍ​ກາກ​ບອນ​ດີ​ອ໊ອກ​ຊິດ, ລັດ​ຖະ​ບານ​ຈີນ​ໄດ້​ໃຊ້​ຫຼາຍ​ມາດ​ຕະການທີ່​ບັງ​ເກີດ​ຜົນ, ​ໃນ​ນັ້ນລວມທັງ ຕັ້ງໜ້າ​ຊຸກຍູ້​ການ​ພັດ​ທະ​ນາ​ໄຟຟ້າ​ນິວ​ເຄຼຍຂອງ​ຈີນ. ລັດຖະບານ​ຈີນ​ມີ​ແຜນ​ຈະ​ຕິດຕັ້ງຈັກ​ຜະລິດໄຟຟ້າ​ນິວ​ເຄຼຍ 40 ລ້ານ​ກິ​ໂລ​ວັດ ຮອດ​ປີ 2020.

ທ່ານ​ຄ່າງ​ຢື້​ຊິ່ນ​ກ່າວ​ວ່າ, ນ​ອກຈາກ​ຕັ້ງໜ້າ​ພັດທະນາ​ໄຟຟ້າ​ນິວ​ເຄຼຍ​ແລ້ວ, ລັດຖະ​ບານ​ຈີນ​ຍັງ​ໄດ້​ໃຫ້ການ​ສະໜັບສະໜູນ​ຢ່າງ​ໃຫຍ່​​ໃນ​ດ້ານ​ນະ​ໂຍບາຍ​ພັດທະນາພະລັງງານ​ທີ່​ສະອາດ ​ເຊັ່ນ ​ໄຟຟ້າ​ແຮງ​ລົມ ພະລັງ​​ແສງຕາ​ເວັນ ​ແລະ​ພະລັງ​ທະ​ເລ​ເປັນຕົ້ນ. ຈີນ​ມີ​ແຜນ​ຈະ​ເພີ່ມ​ຄວາມ​ແຮງ​ພັດທະນາ​ໄຟຟ້າ​ແຮງ​ລົມ​ແລະ​ໄຟຟ້າ​ນ້ຳຕົກ ກ່ອນ​​ປີ 2010, ຫຼຸດ​ຜ່ອນ​ການລະບາຍ​ກາກ​ບອນ​ດີ​ອ໊ອກຊິດ​ປະມານ 500 ລ້ານ​ໂຕນ. ທ່ານ​ຄ່າງ​ຢື້​ຊິ່ນ​ກ່າວ​ວ່າ, ​ໃນ​ຖານະທີ່ເປັນ​ປະ​ເທດ​ທີ່​ມີ​ຄວາມຮັບຜິດຊອບ, ​ຈີນໄດ້​ປະກອບສ່ວນ​ເຂົ້າ​ໃນ​ການ​ຫຼຸດ​ຜ່ອນ​ການລະບາຍ​ກາກ​ບອນ.