|
ຕາມຂ່າວ CRI: ກອງປະຊຸມສຸດຍອດອາຊຽນແລະຈີນ ຍີ່ປຸ່ນ ສ.ເກົາຫຼີ ຫຼື ອາຊຽນ ບວກ 3 ຄັ້ງທີ 11 ໄດ້ຈັດຂຶ້ນຢູ່ສິງກະໂປໃນວັນທີ 20 ພະຈິກນີ້, ໂດຍແມ່ນທ່ານລີຊຽນລົງ ນາຍົກລັດຖະມົນຕີສິງກະໂປ ປະເທດປະທານຝຽນອາຊຽນ ເປັນປະທານກອງປະຊຸມ, ທ່ານເວີນເຈ່ຍປາວ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມ.
ໃນກອງປະຊຸມ, ທ່ານເວີນເຈ່ຍປາວ ໄດ້ສະເໜີເຈດຈຳນົງຂອງຈີນກ່ຽວກັບການເພີ່ມທະວີແລະລົງເລິກການຮ່ວມມືລະຫວ່າງ ອາຊຽນ ບວກ 3. ທ່ານເວີນເຈ່ຍປາວກ່າວວ່າ, ບັນດາປະເທດໃນກຸ່ມອາຊຽນ ບວກ 3 ຄວນຍຶດໝັ້ນໂຄລົບຄວາມເປັນເອກະລາດແລະອະທິປະໄຕ ຂອງກັນແລະກັນ, ໂຄລົບລະບອບສັງຄົມແລະຮູບແບບການພັດທະນາ ທີ່ປະເທດໃຜລາວຄັດເລືອກເອົາ, ຖືການພັດທະນາຂອງປະເທດໃກ້ຄຽງ ເປັນໂອກາດພັດທະນາຂອງຕົນ ແຕ່ບໍ່ແມ່ນການຂົ່ມຂູ່; ຄວນຫັນໄປສູ່ຜົນປະໂຫຍດຮ່ວມ, ຊຸກຍູ້ການພັດທະນາແລະຄວາມຈະເລີນຮຸ່ງເຮືອງຮ່ວມກັນ; ພິຈາລະນາຢ່າງຮອບດ້ານ, ບັນລຸການພັດທະນາເສດຖະກິດສັງຄົມຂອງອາຊີຕາເວັນອອກຢ່າງ ຮອບດ້ານແລະສະໝ່ຳສະເໝີ, ຄົ້ນຄວ້າແລະສ້າງຮູບແບບແລະຊ່ອງທາງການຮ່ວມມືທີ່ມີຫຼາຍຮູບແບບ ທີ່ສອດຄ່ອງກັບອາຊີຕາເວັນອອກ; ຕ້ອງບັນລຸເປົ້າໝາຍໄລຍະຍາວຂອງປະຊາຄົມອາຊີຕາເວັນອອກ ດ້ວຍການອູ້ມຊູຍູ້ໜູນກັນ.
ກອງປະຊຸມໄດ້ຮັບຮອງເອົາ "ຖະແຫຼງການຮ່ວມກ່ຽວກັບການຮ່ວມມືອາຊີຕາເວັນອອກ" ສະບັບທີ 2 ແລະແຜນການຮ່ວມມືລະຫວ່າງອາຊຽນບວກ 3. ເອກະສານສອງສະບັບດັ່ງກ່າວ ໄດ້ກ່າວຢ້ຳຈຸດປະສົງແລະຈິດໃຈຂອງ "ກົດບັດສະຫະປະຊາຊາດ" ແລະ "ສົນທິສັນຍາການຮ່ວມມືໄມຕີຈິດໃນອາຊີອາຄະເນ", ເນັ້ນໜັກການຍຶດໝັ້ນບົດບາດພາທາງຂອງອາຊຽນໃນການຮ່ວມມືພາກພື້ນນີ້ ແລະບົດບາດເປັນຊ່ອງທາງຕົ້ນຕໍຂອງກົນໄກອາຊຽນບວກ 3, ກຳນົດໜ້າທີ່ວຽກງານຢ່າງຈະແຈ້ງທີ່ດຳເນີນການຮ່ວມມືຢ່າງຮອບດ້ານ ໃນຂົງເຂດການເມືອງ ຄວາມໝັ້ນຄົງ ເສດຖະກິດ ການທະນາຄານ ພະລັງງານ ການພັດທະນາແບບຍືນຍົງ ສັງຄົມແລະວັດທະນະທຳ.
|
