|
ຕາມຂ່າວ CRI: ວັນທີ 20 ພະຈິກນີ້, ອົງການອະນາໄມໂລກໄດ້ຈັດກອງປະຊຸມວຽກງານລະຫວ່າງລັດຖະບານ ຢູ່ທີ່ສຳນັກງານໃຫຍ່ທີ່ເຊີແນວ, ເພື່ອປຶກສາຫາລືກ່ຽວກັບການຮ່ວມມືລະຫວ່າງປະເທດ ໃນການຮ່ວມກັນນຳໃຊ້ຕົວຢ່າງໄວຣັດພະຍາດໄຂ້ຫວັດສັດປີກ ແລະ ການຄົ້ນຄວ້າວັກແຊງ.
ໃນກອງປະຊຸມ ນາງເສີນເຝີງຟູ້ເຈີ່ນ ຜູ້ອຳນວຍການໃຫຍ່ອົງການອະນາໄມໂລກກ່າວວ່າ, ມີແຕ່ປະເທດຕ່າງໆໃນໂລກຮ່ວມມືກັນຢ່າງແໜ້ນແຟ້ນກວ່າເກົ່າ ຈຶ່ງຈະສາມາດປ້ອງກັນບໍ່ໃຫ້ພະຍາດໄຂ້ຫວັດສັດປີກລະບາດຢ່າງຂະໜາດໃຫຍ່ທີ່ອາດຈະເກີດຂຶ້ນ. ນາງກ່າວວ່າ, ຖ້າບໍ່ສາມາດຄວບຄຸມໄວຣັດພະຍາດໄຂ້ຫວັດສັດປີກ, ມັນສາມາດລະບາດໄປຮອດທຸກແຫ່ງຫົນໃນໂລກໄດ້ ພາຍໃນບໍ່ເທົ່າໃດເດືອນ.
ອິນໂດເນເຊຍແມ່ນປະເທດທີ່ມີຄົນເສຍຊີວິດຫຼາຍກວ່າໝູ່ຈາກການຕິດພະຍາດໄຂ້ຫວັດສັດປີກ. ອົງການອະນາໄມໂລກຮຽກຮ້ອງໃຫ້ປະເທດຕ່າງໆມອບຕົວຢ່າງໄວຣັດໃໝ່ຫຼ້າສຸດ, ເພື່ອສະໜອງໃຫ້ອົງການຄົ້ນຄວ້າວິທະຍາສາດຜະລິດວັກແຊງສະເພາະ. ແຕ່ອິນໂດເນເຊຍກ່າວໂດຍຕະຫຼອດວ່າ ຕົນເອງມີກຳມະສິດຕໍ່ "ຊັບພະຍາກອນຊີວະຊາດ" ຂອງປະເທດຕົນ, ໃນຂະນະດຽວກັນ ກໍຮຽກຮ້ອງໃຫ້ສະໜອງຕົວຢ່າງໄວຣັດຕິດພັນກັບການຊ່ວຍເຫຼືອອິນໂດເນເຊຍຍົກລະດັບການຜະລິດວັກແຊງ. ກອງປະຊຸມເທື່ອນີ້ມີຈຸດປະສົງສະແຫວງຫາວິທີແກ້ໄຂທີ່ໃຫ້ຝ່າຍຕ່າງໆໄດ້ຜົນປະໂຫຍດຮ່ວມກັນ.
|
