|
|
 |
| (GMT+08:00)
2007-11-23 15:21:41
|
 |
|
ແຂວງຊ່ານຊີປະຕິບັດຍຸດທະສາດພັດທະນາແບບຍືນຍົງດ້ານອຸດສາຫະກຳຖ່ານຫີນຢ່າງໄດ້ຮັບຜົນດີ
cri
Author: mo
ຕາມຂ່າວCRI：ໃນຫຼາຍປີມານີ້, ແຂວງຊ່ານຊີ ແຂວງທີ່ມີພະລັງງານຫຼາຍຂອງຈີນໄດ້ປະຕິບັດຍຸດທະສາດພັດທະນາແບບຍຶນຍົງດ້ານອຸດສາຫະກຳຖ່ານຫີນ, ແລະໄດ້ອັດບໍ່ຖ່ານຫີນນ້ອຍໆແລະວິສາຫະກິດກ່ຽວຂ້ອງຫຼາຍແຫ່ງທີ່ສິ້ນເປື້ອງພະລັງງານຫຼາຍແລະເຊື່ອມພິດຫຼາຍ, ສະນັ້ນ, ອຸດສາຫະກຳພະລັງງານຈຶ່ງໄດ້ປະກົດມີທ່ວງທ່າພັດທະນາທີ່ດີທີ່ບໍ່ເຄີຍມີມາກ່ອນ.
ແຂວງຊ່ານຊີແມ່ນແຂວງທີ່ມີຖ່ານຫີນຫຼາຍຂອງຈີນ, ປະລິມານການສະສົມຖ່ານຫີນທີ່ສຳຫຼວດພົບແລ້ວມີຫຼາຍກວ່າ 260 ຕື້ໂຕນ, ກວມ 1/3 ຂອງຈີນ. ເປັນເວລາດົນມານີ້, ຢູ່ແຂວງຊ່ານຊີມີບໍ່ຖ່ານຫີນໃຫຍ່ຂອງລັດແລະກໍ່ມີບໍ່ຖ່ານຫີນຂະໜາດກາງແລະນ້ອຍປະມານຮ້ອຍແຫ່ງ, ໃນບໍ່ຖ່ານຫີນກາງແລະນ້ອຍ ສ່ວນຫຼາຍໃຊ້ເຄື່ອງມືຜະລິດຫຼ້າຫຼັງ, ເພື່ອຍາດຊີງເອົາຊັບພະຍາກອນ ຈຶ່ງຂຸດຄົ້ນຫຼາຍເກີນໄປຈົນບໍ່ເປັນລະບຽບ, ແລ້ວເຮັດໃຫ້ອຸບັດຕິເຫດບໍ່ຖ່ານຫີນເກີດຂຶ້ນເລື້ອຍໆ. ໃນຕົ້ນສະຕະວັດນີ້, ແຂວງຊ່ານຊີໄດ້ສະເໜີແນວຄວາມຄິດວ່າ"ອັດບໍ່ຖ່ານຫີນນ້ອຍ, ປັບປຸງບໍ່ຖ່ານຫີນກາງ, ພັດທະນາບໍ່ຖ່ານຫີນໃຫຍ່", ສົ່ງເສີມວິສາຫະກິດບໍ່ຖ່ານຫີນໃຫຍ່ຈັດຊື້ແລະເຕົ້າໂຮມບໍ່ຖ່ານຫີນນ້ອຍ, ແລະໃນປີ 2001, ສ້າງເປັນກຸ່ມຖ່ານຫີນຊ່ານຊີ ເຊິ່ງເປັນວິສາຫະກິດຖ່ານຫີນໃຫຍ່ກວ່າໝູ່ຂອງຈີນປັດຈຸບັນ.
ທ່ານຕູ້ຝູຊິນ ປະທານກຸ່ມຖ່ານຫີນຊ່ານຊີບອກນັກຂ່າວວ່າ, ພຽງແຕ່ 3-5 ປີເທົ່ານັ້ນ, ກໍ່ໄດ້ຍົກລະດັບເຄື່ອງມື ເຕັກໂນໂລຊີ ແລະການຄຸ້ມຄອງໃຫ້ສູງຂຶ້ນຫຼາຍແລ້ວ. ຕົວຢ່າງຄືລະບົບຕິດຕາມຄວບຄຸມແກັສຂອງພວກເຮົາ, ລວມທັງພື້ນຖານໂຄງລ່າງຄວາມປອດໄພຂອງພວກເຮົາ ກໍໄດ້ຍົກສູງຂຶ້ນຮອດລະດັບສູງໂດຍໄວຫຼັງການສ້າງເປັນກຸ່ມ.
ພ້ອມກັນນັ້ນ, ໃນຫຼາຍປີມານີ້, ແຂວງຊ່ານຊີຍັງຕັ້ງໜ້າຄົ້ນຄວ້າຫາຊ່ອງທາງພັດທະນາແບບຍືນຍົງໃນການຂຸດຄົ້ນຖ່ານຫີນ. ຕົວຢ່າງຄື, ຜະລິດຕະພັນສຳຮອງເຊັ່ນເມື່ອຖ່ານຫີນຜ່ານການຜະລິດແລ້ວ ໄດ້ເກີດມີຂີ້ຖ່ານຫີນຢ່າງຫຼວງຫຼາຍ, ແຕ່ກ່ອນມັກກອງຢູ່ໃກ້ບໍ່ຖ່ານຫີນ, ບໍ່ພຽງແຕ່ຍຶດເນື້ອທີ່ດິນເທົ່ານັ້ນ, ແຕ່ຍັງສ້າງສິ່ງເຊື່ອມພິດຫຼາຍຕໍ່ສິ່ງແວດລ້ອມ. ຕົວຢ່າງຄືໃນເມືອງກູຈ່ຽວແຂວງຊ່ານຊີ, ແຕ່ລະປີໄດ້ມີຂີ້ຖ່ານຫີນຫຼາຍກວ່າ 10 ລ້ານໂຕນ. ປີ 1999, ບໍ່ຖ່ານຫີນຫຼາຍແຫ່ງໃນເມືອງກູຈ່ຽວໄດ້ໂຮມເຂົ້າເປັນກຸ່ມຖ່ານຫີນໄຟຟ້າຊີຊ່ານ--ເຊິ່ງເປັນວິສາຫະກິດຖ່ານຫີນຂະໜາດໃຫຍ່, ແລ້ວໄດ້ນຳໃຊ້ແກັສແລະນ້ຳໃນບໍ່ຖ່ານຫີນຄືນໃໝ່. ໃນນັ້ນ, ແກັສທີ່ມັກຖືກປ່ອຍໄປສູ່ອາກາດແລ້ວເຊື່ອມພິດອາກາດນັ້ນຖືກນຳໃຊ້ເຂົ້າມາເປັນອາຍແກັສໃຊ້ໃນຊີວິດປະຈຳວັນຂອງກຳມະກອນ. ນ້ຳໃນບໍ່ທີ່ໄຫຼອອກໄປລ້າໆໃນແຕ່ກ່ອນກໍ່ໄດ້ຮັບການບຳບັດ 100% ໃນປັດຈຸບັນ. ຂີ້ຖ່ານຫີນທີ່ແຕ່ກ່ອນມັກປະຖິ້ມ ດຽວນີ້ໄດ້ເອົາມານຳໃຊ້ຜະລິດໄຟຟ້າ.
ທ່ານຈ່າງປາວຊຸ້ນ ເລຂາຄະນະພັກແຂວງຊ່ານຊີກ່າວວ່າ, ແຂວງຊ່ານຊີພວມຜ່ານການຜັນຂະຫຍາຍພັດທະນະທັດວິທະຍາສາດ, ເຮັດໃຫ້ປະຊາຊົນແຂວງຊ່ານຊີໄດ້ຮັບຜົນປະໂຫຍດຢ່າງແທ້ຈິງ. ທ່ານກ່າວວ່າ,"ຕ້ອງໄດ້ຄົ້ນຄວ້າວ່າເຮັດແນວໃດຈຶ່ງສາມາດພັດທະນາແບບຍືນຍົງໄດ້, ໃນການພັດທະນາໃໝ່ ຄວນພະຍາຍາມຫຼຸດຜ່ອນການທຳລາຍສິ່ງແວດລ້ອມ, ໃຫ້ຊັບພະຍາກອນສາມາດປະກອບສ່ວນຫຼາຍກວ່າເກົ່າແລະດົນນານກວ່າເກົ່າໃຫ້ແກ່ປະເທດຊາດ, ແລະສະແຫວງຫາຄວາມສຸກແລະຜົນປະໂຫຍດເປັນໄລຍະຍາວໄກໃຫ້ປະຊາຊົນແຂວງຊ່ານຊີ.
|
|
|
