|
ຕາມຂ່າວ CRI: ວັນທີ 23 ພະຈິກນີ້ ຢູ່ທີ່ປັກກິ່ງ, ທ່ານອູກຸ້ຍຮຸ່ຍ ຮອງຫົວໜ້າກົມພະລັງງານ ຄະນະກຳມະການການພັດທະນາແລະການປະຕິຮູບແຫ່ງລັດຈີນກ່າວວ່າ, ຈີນຈະສະໜັບສະໜູນເຂດຊົນນະບົດພັດທະນາພະລັງງານທີ່ສະອາດ ແລະເກີດໃໝ່ໄດ້ ເຊັ່ນ ພະລັງງານແສງຕາເວັນ ແລະພະລັງງານລົມເປັນຕົ້ນ, ແກ້ໄຂບັນຫາພະລັງງານຢູ່ເຂດຊົນນະບົດຈີນຢ່າງເໝາະສົມ ບົນພື້ນຖານພັດທະນາແບບຍືນຍົງ.
ໃນງານສຳມະນາສາກົນກ່ຽວກັບການພັດທະນາພະລັງງານໃນເຂດຊົນນະບົດຈີນ ທີ່ຈັດຂຶ້ນໃນມື້ດຽວກັນ, ທ່ານອູກຸ້ຍຮຸ່ຍກ່າວວ່າ, ຈີນຈະເລັ່ງລັດເຜີຍແຜ່ເຕັກນິກນຳໃຊ້ພະລັງງານທີ່ເກີດໃໝ່ໄດ້ ທີ່ລາຄາຖືກແລະໃຊ້ຕົວຈິງໄດ້, ສືບຕໍ່ສະໜັບສະໜູນຄອບຄົວລ້ຽງສັດໃນຊົນນະບົດ ສ້າງອ່າງບົ່ມແກັດຊີວະພາບ, ຢູ່ເຂດມີແສງຕາເວັນຫຼາຍນັ້ນ, ສົ່ງເສີມປະຊາຊົນນຳໃຊ້ເຄື່ອງຕົ້ມນ້ຳຮ້ອນດ້ວຍພະລັງງານແສງຕາເວັນ ແລະ ເຕົາໄຟແສງຕາເວັນ, ຫຼຸດການດັງຟືນແລະຖ່ານຫີນ, ປົວແປງສິ່ງແວດລ້ອມສາທາລະນະສຸກໃນເຂດຊົນນະບົດ.
|
