|
ຈີນຍິນດີພ້ອມກັນກັບປະເທດຕ່າງໆໃນໂລກນຳໃຊ້ອະວະກາດຢ່າງສັນຕິ
cri
ຕາມຂ່າວ CRI: ວັນທີ 26 ພະຈິກນີ້, ຢູ່ທີ່ປັກກິ່ງ, ທ່ານຊຸ່ນລາຍອ້ຽນ ຫົວໜ້າກົມການປິນອະວະກາດແຫ່ງຊາດຈີນກ່າວວ່າ, ຈີນຍິນດີດຳເນີນການແລກປ່ຽນແລະການຮ່ວມມືອັນກວ້າງຂວາງກັບຂະແໜງການດຽວກັນຂອງປະເທດຕ່າງໆໃນໂລກບົນພື້ນຖານ "ສະເໝີພາບກັນແລະຕ່າງຝ່າຍຕ່າງໄດ້ຮັບຜົນປະໂຫຍດ, ນຳໃຊ້ໂດຍສັນຕິ, ຮ່ວມກັນພັດທະນາ", ນຳໃຊ້ອະວະກາດໂດຍສັນຕິ, ສ້າງຄວາມສຸກໃຫ້ແກ່ມວນມະນຸດ.
ໃນກອງປະຊຸມຂ່າວທີ່ຈັດໂດຍຫ້ອງການຖະແຫຼງຂ່າວຂອງລັດຖະບານຈີນໃນມື້ດຽວກັນ, ທ່ານຊຸ່ນລາຍອ້ຽນກ່າວວ່າ, ໂຄງການສຳຫຼວດດວງຈັນທີ່ຈີນປະຕິບັດແມ່ນໂຄງການເຕັກນິກວິທະຍາສາດນຳໃຊ້ອະວະກາດໂດຍສັນຕິ, ກໍ່ແມ່ນໂຄງການທີ່ເປີດເຜີຍ, ໃນຂະບວນການປະຕິບັດ, ຈີນໄດ້ດຳເນີນການຮ່ວມມືກັບຣັດເຊຍແລະປະເທດເອີລົບຈຳນວນໜຶ່ງ. ທ່ານກ່າວວ່າ, ຈີນຍິນດີພ້ອມກັນກັບປະເທດຕ່າງໆໃນໂລກ, ປະກອບສ່ວນເທົ່າທີ່ຄວນເຂົ້າໃນການສຳຫຼວດດວງຈັນແລະການສຳຫຼວດອະວະກາດໃນອະນາຄົດ.
ພ້ອມກັນນັ້ນ, ທ່ານຊຸ່ນລາຍອ້ຽນຍັງເຜີຍໃຫ້ຮູ້ວ່າ, ຈີນໄດ້ສຳເລັດວຽກງານພິສູດໂຄງການສຳຫຼວດດວງຈັນໄລຍະທີ 2 ແລ້ວ. ທ່ານແນະນຳວ່າ, ໂຄງການສຳຫຼວດດວງຈັນໄລຍະທີ 2 ຂອງຈີນຈະຍິງສົ່ງເຄື່ອງລົງຈອດໜ້າດິນດວງຈັນໜ່ວຍໜຶ່ງ, ແລະຈະບັນຈຸລົດດວງຈັນຄັນໜຶ່ງ, ດຳເນີນການສຳຫຼວດກັບບ່ອນຢູ່ໃກ້ເຂດລົງຈອດ.
|
|
