ຕາມ​ຂ່າວສານ​ຊິນ​ຮວາ: ຫວ່າງ​ມໍ່ໆ​ນີ້ ຢູ່​ທີ່​ປັກ​ກິ່ງ, ​ນາງ ດຣ.​ອິນ​ອິນ​ເວ ຜູ້​ແທນ​ມູນ​ນິທິ​ເດັກນ້ອຍ​ສະຫະ​ປະຊາ​ຊາດ ຫຼື ຢູນີ​ເຊັຟປະຈຳ​ຈີນ​ ໄດ້​ໃຫ້ສຳພາດ​ຕໍ່​ນັກ​ຂ່າວ​ວ່າ, ລັດ​ຖະ​ບານ​ຈີນ​ແມ່ນ​ລັດຖະບານ​ທີ່​ມີ​ຄວາມຮັບຜິດຊອບ, ​ເຊື່ອ​ວ່າ ອະນາຄົດ​ຂອງ​ເດັກ​​ກຳ​ພອຍ​ທີ່​ພໍ່​ແມ່​​ຕິດເອດ​ແລະ​ເດັກນ້ອຍ​ທີ່​ຕິດພະຍາດ​ເອດຂອງ​ຈີນ​ຈະ​ນັບ​ມື້​ນັບ​ດີ​ຂຶ້ນ.

ນາງ ດຣ.ອິນ​ອິນ​ເວ ກ່າວ​ວ່າ, ນັບ​ແຕ່​ປີ 2005 ຮອດ​ປັດຈຸບັນ, ຈີນ​ມີ​ເດັກນ້ອຍ​ທີ່​ຕິດ​ພະ​ຍາດ​ເອດ 800 ກວ່າ​ຄົນ ​ໄດ້​ຮັບ​ການ​ປິ່ນປົວດ້ວຍ​ຢຸກຢາ ທີ່​ສອດຄ່ອງ​ກັບ​ອາຍຸ​ຂອງ​ເຂົາ​ເຈົ້າ​ໂດຍ​ບໍ່​ເກັບ​ຄ່າ. ຈີນ​ຍັງ​ໄດ້​ສ້າງ​ຫຼາຍອົງການ​ຈັດຕັ້ງ​​ເພື່ອເອົາ​ໃຈ​ໃສ່​ເດັກນ້ອຍ​ເຫຼົ່າ​ນີ້, ປັດ​ຈຸ​ບັນ, ​ເດັກ​ກຳພອຍ​ທີ່​ພໍ່​ແມ່​ຕິດພະຍາດ​ເອດ 90% ຂຶ້ນ​ໄປ ​ໄດ້​ຮັບ​ການ​ສະໜັບ​ສະ​ໜູນ​ທາງ​ດ້ານ​ຊີ​ວິດ​ແລະ​ການ​​ເຂົ້າຮຽນ, ​ເດັກ​ນ້ອຍ​ທີ່​ໃຫຍ່​ສົມຄວນ​ຈຳນວນ​ໜຶ່ງ ​ໄດ້​ຮັບ​ການ​ເຝິກ​ອົບ​ຮົມ​ເພື່ອ​ປະກອບ​ອາຊີບ.

ນາງ​ອິນ​ອິນ​ເວ​ຊີ້​ອອກ​ວ່າ, ການ​ປິ່ນປົວ​ແລະ​ອຸດ​ໜູນ​ເດັກນ້ອຍ​ທີ່​ຕິດ​ພະ​ຍາດ​ເອດ ​ແລະ​ເດັກ​ກຳພອຍ​ທີ່​ພໍ່​ແມ່​ຕິດ​ພະຍາດ​ເອດ ບໍ່​ພຽງ​ແຕ່​ຕ້ອງການ​ຢຸກຢາ​ທີ່​ສອດ​ຄ່ອງ​ກັບ​ອາຍຸ​ຂອງ​ເຂົາ​ເຈົ້າ, ສຳ​ຄັນກວ່າ​ນັ້ນ​ແມ່ນ​ໃຫ້ການ​ສະໜັບສະໜູນ​ທາງ​ດ້ານ​ທາດ​ບຳ​ລູງ ຄວາມ​ຮັກ ​ແລະ​ຈິດ​ຕະສາດ ​ແກ່​ພວກ​ເຂົາ​ເຈົ້າ. ຂະນະ​ດຽວ​ກັນ, ຍັງ​ຕ້ອງ​ເພີ່ມ​ທະວີ​ໂຄ​ສະ​ນາ​ຄວາມ​ຮູ້​ກ່ຽວ​ກັບ​ພະຍາດ​ເອດ​ຕໍ່​ແມ່ຍິງ​ທີ່​ຖືພາ, ຮັບປະ​ກັນ​ໃຫ້​ພວກ​ເຂົາ​ເຈົ້າຮັບ​ການ​ກວດ​ກາ​ດ້ານ​ພະ​ຍາດ​ເອດ.