|
ຕາມຂ່າວ CRI: ເນື່ອງໃນໂອກາດວັນພະຍາດເອດຂອງໂລກຄັ້ງທີ 20 ວຽນມາເຖິງ, ວັນທີ 30 ພະຈິກແລ້ວນີ້, ທ່ານເວີນເຈ່ຍປາວ ນາຍົກລັດຖະມົນຕີຈີນ ໄດ້ເດີນທາງໄປເມືອງຊ້າງໄຊ້ແຂວງເຫີໜານອີກ, ເພື່ອຢາມຜູ້ເປັນພະຍາດເອດແລະເດັກກຳພອຍທີ່ພໍ່ແມ່ຕິດເອດ, ແລະດຳເນີນການຄົ້ນຄວ້າວຽກງານປ້ອງກັນແລະປິ່ນປົວພະຍາດເອດ.
ເມືອງຊ້າງໄຊ້ແມ່ນເຂດທີ່ມີຜູ້ຕິດພະຍາດເອດອ່າວຫຼາຍຢູ່ຈີນ, ປີ 2005, ທ່ານເວີນເຈ່ຍປາວເຄີຍໄປເມືອງຊ້າງໄຊ້, ຮ່ວມກັບຜູ້ເຖົ້າ ແລະເດັກນ້ອຍທີ່ເສຍຍາດພີ່ນ້ອງຍ້ອນຕິດພະຍາດເອດ ສະຫຼອງວັນສົ່ງທ້າຍປີເກົ່າ ເຊິ່ງແມ່ນບຸນປະເພນີຂອງຈີນ.
ວັນທີ 30 ພະຈິກແລ້ວນີ້, ທ່ານເວີນເຈ່ຍປາວໄດ້ໄປຢາມເດັກກຳພອຍທີ່ພໍ່ແມ່ຕິດພະຍາດເອດຢູ່ເມືອງຊ້າງໄຊ້ກ່ອນ, ແລະກິນເຂົ້າທ່ຽງຮ່ວມກັບເດັກພອຍທັງຫຼາຍ. ທ່ານຍັງຖາມສະພາບການຮ່ຳຮຽນແລະຊີວິດການເປັນຢູ່ຂອງເດັກນ້ອຍເຫຼົ່ານີ້, ໃຫ້ເຂົາເຈົ້າຕ້ອງເບິ່ງແຍງຕົນເອງໃຫ້ດີ, ເຫັນໄປໃນແງ່ດີຕໍ່ຊີວິດການເປັນຢູ່ຂອງຕົນ.
ຈາກນັ້ນ, ທ່ານເວີນເຈ່ຍປາວກໍໄປຢາມຜູ້ເປັນພະຍາດເອດຢູ່ບ້ານເວີນໂຫຼວເມືອງຊ້າງໄຊ້. ຜູ້ເປັນພະຍາດເອດຢູ່ນີ້ ລ້ວນແຕ່ໄດ້ຮັບການປິ່ນປົວໂດຍບໍ່ຕ້ອງເສຍຄ່າ, ອາການປ່ວຍກໍດີຂຶ້ນແລ້ວ. ທ່ານເວີນເຈ່ຍປາວໃຫ້ລະດົມໃຈແກ່ຜູ້ເປັນພະຍາດເອດຕ້ອງມີຄວາມໝັ້ນໃຈ, ປະຕິບັດຕໍ່ພະຍາດເອດຢ່າງວິທະຍາສາດ. ທ່ານຍັງກ່າວເນັ້ນວ່າ, ຕ້ອງເພີ່ມທະວີການໂຄສະນາຄວາມຮູ້ກ່ຽວກັບພະຍາດເອດ, ກຳຈັດຄວາມດູຖູກຜູ້ເປັນພະຍາດເອດໃນສັງຄົມ.
|
