|
ຕາມຂ່າວ CRI: ເນື່ອງໃນໂອກາດວັນຊາດລາວຄົບຮອບ 32 ປີວຽນມາເຖິງ, ວັນທີ 2 ທັນວານີ້, ທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນ ທ່ານອູປາງໂກ ປະທານສະພາປະຊາຊົນແຫ່ງຊາດຈີນ ແລະທ່ານເວີນເຈ່ຍປາວ ນາຍົກລັດຖະມົນຕີ ສປ ຈີນ ໄດ້ຮ່ວມກັນສົ່ງໂທລະເລກອວຍພອນໄປຍັງທ່ານຈູມມະລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກຊາຊົນປະຕິວັດລາວ ປະທານປະເທດລາວ ທ່ານທອງສິງ ທຳມະວົງ ປະທານສະພາແຫ່ງຊາດລາວ ແລະທ່ານບົວສອນ ບຸບຜາວັນ ນາຍົກລັດຖະມົນຕີ ສປປ ລາວ, ເຊິ່ງມີເນື້ອໃນຄືດັ່ງນີ້:
ເນື່ອງໃນໂອກາດສາທາລະນະລັດປະຊາທິປະໄຕປະຊາຊົນລາວສ້າງຕັ້ງຂຶ້ນຄົບຮອບ 32 ປີ, ພວກຂ້າພະເຈົ້າຂໍສົ່ງຄວາມຊົມເຊີຍຢ່າງສຸດອົກສຸດໃຈແລະຄວາມອວຍພອນອັນດີງາມມາຍັງພວກສະຫາຍ ແລະຂໍຜ່ານຈາກພວກສະຫາຍໄປຍັງຄະນະບໍລິຫານງານສູນກາງພັກປະຊາຊົນປະຕິວັດລາວ ສະພາແຫ່ງຊາດ ລັດຖະບານ ແລະປະຊາຊົນລາວບັນດາເຜົ່າທີ່ເປັນອ້າຍນ້ອງກັນ.
ໂທລະເລກຂຽນວ່າ, ປັດຈຸບັນ, ສັງຄົມການເມືອງລາວມີສະຖຽນລະພາບ, ເສດຖະກິດພັດທະນາອ່າວໄວ, ຊີວິດການເປັນຢູ່ຂອງປະຊາຊົນໄດ້ຮັບການປ່ຽນແປງໃຫ້ດີຂຶ້ນ, ວຽກງານຕ່າງປະເທດຟົດຟື້ນ, ພາລະກິດການປ່ຽນແປງໃໝ່ໄດ້ຮັບໝາກຜົນອັນພົ້ນເດັ່ນ. ໃນຖານະເປັນບ້ານໃກ້ເຮືອນຄຽງທີ່ມີໄມຕີຈິດຕໍ່ກັນ, ພວກຂ້າພະເຈົ້າກໍຮູ້ສຶກປິຕິຊົມຊື່ນ, ແລະຂໍອວຍພອນໃຫ້ປະຊາຊົນລາວ ຈົ່ງໄດ້ຮັບໝາກຜົນອັນໃໝ່ຢ່າງບໍ່ຢຸດຢັ້ງ ໃນການສ້າງສາປະເທດ ແລະໃນພາລະກິດການປ່ຽນແປງໃໝ່ ພາຍໃຕ້ການນຳພາຂອງພັກປະຊາຊົນປະຕິວັດລາວ.
ພາຍໃຕ້ການຊີ້ນຳຂອງທິດທາງການຮ່ວມມືຮອບດ້ານທີ່ໝັ້ນຄົງຍາວນານ ມີໄມຕີຈິດຖານບ້ານໃກ້ເຮືອນຄຽງ ແລະໄວ້ເນື້ອເຊື່ອໃຈເຊິ່ງກັນແລະກັນ, ການພົວພັນລະຫວ່າງຈີນລາວໄດ້ຂະຫຍາຍຕົວເຂົ້າສູ່ລວງເລິກ, ການຮ່ວມມືໃນຂົງເຂດຕ່າງໆກໍເປີດກວ້າງອອກຢ່າງບໍ່ຢຸດຢັ້ງ. ຝ່າຍຈີນເອົາໃຈໃສ່ໃນລະດັບສູງນຳການຂະຫຍາຍການພົວພັນລະຫວ່າງຈີນລາວ, ຍິນດີຮ່ວມກັນກັບຝ່າຍລາວ, ພ້ອມກັນຊຸກຍູ້ການພົວພັນຮ່ວມມືຮອບດ້ານແລະມີໄມຕີຈິດຖານບ້ານໃກ້ເຮືອນຄຽງລະຫວ່າງຈີນລາວໃຫ້ຂະຫຍາຍໄປສູ່ລະດັບໃໝ່ແລະເລິກເຊິ່ງກວ່າເກົ່າ, ສ້າງຄວາມຜາສຸກໃຫ້ປະຊາຊົນທັງສອງປະເທດ.
ຂໍອວຍພອນໃຫ້ສາທາລະນະລັດປະຊາທິປະໄຕປະຊາຊົນລາວຈົ່ງຈະເລີນຮຸ່ງເຮືອງ ປະຊາຊົນຢູ່ເຢັນເປັນສຸກ!
|
