ຕາມ​ຂ່າວ CRI: ​ໃນ​ງານ​ຖະ​ແຫຼ​ງຂ່າວ​ທີ່​ຈັດ​ຂຶ້ນຢູ່​ທີ່​ປັກ​ກິ່ງ​ໃນ​ວັນ​ທີ 3 ທັນ​ວາ​ນີ້, ທ່ານ​ອູ​ເຈີ່ນ ຮອງ​ຫົວໜ້າ​ກົມ​ຕິດຕາມ​ຄຸ້ມ​ຄອງ​ອາຫານ​ແລະຢຸກຢາ​ແຫ່ງ​ຊາດ​ຈີນ​ກ່າວ​ວ່າ, ນັບ​ແຕ່​ເດືອນ​ກໍລະ​ກົດ​ປີ​ກາຍ​ເປັນຕົ້ນມາ, ພາກສ່ວນ​ທີ່​ກ່ຽວຂ້ອງ​ຂອງ​ຈີນ​ໄດ້​ດຳ​ເນີນ​ການ​ເຄື່ອນ​ໄຫວ​ສະ​ເພາະ ​ເພື່ອ​ປັບປຸງ​ຕະຫຼາດ​ຢຸກຢາ, ​ແລະ​ໄດ້​ຮັບ​ໝາກຜົນ​ອັນ​ພົ້ນ​ເດັ່ນ, ລະ​ບຽບ​ການ​ຕະ​ຫຼາດ​ຢຸກ​ຢາ​ຂອງ​ຈີນ​ໄດ້​ດີ​ຂຶ້ນຢ່າງ​ຊັດ​ເຈນ, ລະດັບ​ຮັບປະກັນ​ຄວາມ​ປອດ​ໄພ​ຂອງ​ຢຸກ​ຢາ​ໄດ້​ຍົກ​ສູງ​ຂຶ້ນ​ຕື່ມ​ອີກ.

ທ່ານ​ອູ​ເຈີ່ນກ່າວ​ວ່າ, ນັບ​ມາ​ຮອດ​ທ້າຍ​ເດືອນ​ຕຸ​ລາ​ປີ​ນີ້, ພາກ​ສ່ວນ​ທີ່​ກ່ຽວຂ້ອງ​ຂອງ​ຈີນ​ໄດ້​ກວດກາ​ຢຸກຢາ​ທີ່​ຂໍຈົດທະບຽນ 3 ໝື່ນ​ກວ່າ​ຊະນິດ​ຢູ່​ກັບ​ບ່ອນ, ທາງ​ວິ​ສາ​ຫະ​ກິດ​ໄດ້​ຖອນ​ຄືນ​ການ​ຂໍ​ຈົດ​ທະບຽນ​ຂອງຢຸກຢາ 7300 ກວ່າ​ລາຍ, ຈຳນວນ​ຂໍ​ຈົດ​ທະ​ບຽນ​ຢຸກ​ຢາ​ຂອງ​ວິ​ສາ​ຫະກິດ​ຜະລິດ​ຢາ​ໄດ້​ໜ້ອຍ​ລົງ​ຢ່າງ​ຫຼວງ​ຫຼາຍ, ຄຸນ​ນະພາ​ບຂອງ​ຢຸກຢາ​ທີ່​ຂໍ​ຈົດ​ທະບຽນ​ໄດ້​ຍົກ​ສູງ​ຂຶ້ນ; ​​ໄດ້​ກວດກາ​ຢຸກຢາ​ທີ່​ພວມ​ນຳ​ໃຊ້, ຢຸກຢາ 1100 ກວ່າ​ຊະນິດ​ທີ່​ມີ​ບັນຫາ​ຖືກ​ຊຳລະ​ຕາມ​ກົດໝາຍ.

ທ່ານ​ອູ​ເຈີ່ນ​ກ່າວ​ວ່າ, ຈີນ​ຈະ​ສ້າງ​ລະບົບ​ຮັບປະກັນການສະໜອງຢຸກຢາ​ທີ່​ກວມ​ເອົາ​ປະ​ຊາຊົນ​ໃນ​ຕົວ​ເມືອງ​ແລະ​ຊົນນະບົດ ບົນ​ພື້ນຖານ​ໝາກຜົນ​ທີ່​ຍາດ​ມາ​ໄດ້​ໃນ​ການ​ປັບ​ປຸງ​ສະ​ເພາະ, ຮັບປະກັນ​ການ​ໃຊ້​ຢາຂອງ​ປະຊາຊົນ, ຮັບປະກັນ​ຄວາມ​ປອດ​ໄພ​ຂອງ​ຢຸກ​ຢາ.