|
|
 |
| (GMT+08:00)
2007-12-04 13:29:53
|
 |
|
ມຽນມາກ່າວຢ້ຳວ່າ ຈະຮ່າງລັດຖະທຳມະນູນສະບັບໃໝ່ຕາມຫຼັກການພື້ນຖານທີ່ກອງປະຊຸມແຫ່ງຊາດຮັບຮອງເອົາ
cri
ຕາມຂ່າວສານຊີນຮວາ:ວັນທີ 3 ທັນວານີ້,ຢູ່ເນປີດໍ ນະຄອນຫຼວງໃໝ່ຂອງມຽນມາ,ພົນຈັດຕະວາກຽວຊານ ໂຄສົກລັດຖະບານແລະທັງເປັນລັດຖະມົນຕີວ່າການກະຊວງໂຄສະນາມຽນມາກ່າວວ່າ,ມຽນມາພວມຮ່າງລັດຖະທຳມະນູນສະບັບໃໝ່ຕາມຫຼັກການພື້ນຖານທີ່ຖືກຮັບຮອງເອົາແລ້ວໃນກອງປະຊຸມແຫ່ງຊາດ,ແລະກ່າວຢ້ຳວ່າ,ລັດຖະບານຈະສືບຕໍ່ສົ່ງເສີມແຜນການປະຊາທິປະໄຕ 7 ຂໍ້.
ໃນກອງປະຊຸມຖະແຫຼງຂ່າວທີ່ຈັດຂຶ້ນໃນມື້ດຽວກັນ,ທ່ານກຽວຊານກ່າວເນັ້ນວ່າ,ຫຼັກການພື້ນຖານແລະຂໍ້ກຳນົດລະອຽດທີ່ກອງປະຊຸມແຫ່ງຊາດຮັບຮອງນັ້ນແມ່ນຫຼັກການເໝາະທີ່ສຸດໃນການສ້າງລັດຖະທຳມະນູນທີ່ສອດຄ່ອງກັບສະພາບຕົວຈິງຂອງມຽນມາໃນປະຈຸບັນ.ທ່ານໄດ້ປະຕິເສດຂໍ້ສະເໜີທີ່ໃຫ້ກວດກາຫຼັກການສ້າງລັດຖະທຳມະນູນຄືນໃໝ່.
ໃນເດືອນກັນຍາປີ 1988,ພາຍຫຼັງມຽນມາໄດ້ມີສະພາບປັ່ນປ່ວນທາງການເມືອງເປັນເວລາຫຼາຍເດືອນນັ້ນ,ກອງທັບມຽນມາໄດ້ເຂົ້າປົກຄອງປະເທດ,ແລະໄດ້ຍົກເລີກລັດຖະທຳມະນູນສະບັບເກົ່າ.ໃນເດືອນສິງຫາປີ 2003,ລັດຖະບານທະຫານມຽນມາໄດ້ປະກາດແຜນການປະຊາທິປະໄຕ 7 ຂໍ້ທີ່ມີຈຸດປະສົງເພື່ອບັນລຸການປອງດອງຊາດ ຊຸກຍູ້ຂະບວນການປະຊາທິປະໄຕ,ເນື້ອໃນຕົ້ນຕໍຂອງແຜນການດັ່ງກ່າວມີການຟື້ນຟູກອງປະຊຸມແຫ່ງຊາດທີ່ສ້າງລັດຖະທຳມະນູນ ຮ່າງລັດຖະທຳມະນູນສະບັບໃໝ່ ເອົາປະຊາມະຕິທົ່ວປວງຊົນຕົກລົງຮ່າງລັດຖະທຳມະນູນສະບັບໃໝ່ ຈັດການເລືອກຕັ້ງທົ່ວໄປແລະປະກອບລັດຖະບານຊຸດໃໝ່ຕາມກົດໝາຍເປັນຕົ້ນ.
|
|
|
