|
ຕາມຂ່າວສານຊີນຮວາ:ວັນທີ 6 ທັນວານີ້,ຢູ່ທຳນຽບນາຍົກລັດຖະມົນຕີທີ່ເລກ 10 ຖະໜົນດາວນີງທີ່ລອນດອນ,ທ່ານກໍດັນ ບຼອວ ນາຍົກລັດຖະມົນຕີອັງກິດໄດ້ພົບປະກັບທ່ານຢາງເຈຍຊື ລັດຖະມົນຕີການຕ່າງປະເທດຈີນ.
ທ່ານບຼອວກ່າວວ່າ,ການພົວພັນລະຫວ່າງອັງກິດກັບຈີນຂະຫຍາຍຕົວຢ່າງແຂງແຮງ,ວົງການອຸດສາຫະກຳການຄ້າອັງກິດມີຄວາມປາຖະໜາຢ່າງແຮງກ້າຕໍ່ການເປີດກວ້າງການພົວພັນດ້ານເສດຖະກິດການຄ້າກັບຈີນ.ຝ່າຍອັງກິດກໍ່ຍິນດີຕ້ອນຮັບວິສາຫະກິດຈີນມາລົງທຶນຢູ່ອັງກິດ.ທ່ານບຼອວກ່າວວ່າ,ຢາກໄປຢ້ຽມຢາມຈີນ,ພ້ອມກັນກັບຜູ້ນຳຈີນ,ຊຸກຍູ້ໃຫ້ການພົວພັນລະຫວ່າງອັງກິດກັບຈີນໄດ້ຮັບການປັບປຸງແລະຂະຫຍາຍຕົວຢ່າງບໍ່ຢຸດຢັ້ງ.
ທ່ານຢາງເຈຍຊືກ່າວວ່າ,ການຂະຫຍາຍການພົວພັນລະຫວ່າງຈີນກັບອັງກິດມີໂອກາດຂະຫຍາຍຕົວອັນສຳຄັນ.ລັດຖະບານຈີນຍິນດີຖືໂອກາດທີ່ທ່ານນາຍົກອັງກິດຢ້ຽມຢາມຈີນໃນປີໜ້າ,ຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນກັບອັງກິດຂະຫຍາຍຕົວຢ່າງຍາວນານ ໜັກແໜ້ນແລະປອດໃສ.
ທ່ານບຼອວກ່າວເນັ້ນວ່າ,ອັງກິດປະຕິບັດນະໂຍບາຍຈີນດຽວຢ່າງໝັ້ນໜຽວບໍ່ປ່ຽນແປງ,ທ່ານຢາງເຈຍຊືໄດ້ສະແດງຄວາມຊົມເຊີຍຕໍ່ທ່າທີດັ່ງກ່າວ.
ທ່ານບຼອວຕີລາຄາຢ່າງຕັ້ງໜ້າຕໍ່ຈີນທີ່ໄດ້ເສີມຂະຫຍາຍບົດບາດທີ່ມີລັກສະນະສ້າງສັນໃນບັນຫາພາກພື້ນແລະສາກົນຕ່າງໆເຊັ່ນບັນຫາດາຟູຊູດັງເປັນຕົ້ນ.ສອງຝ່າຍເຫັນດີຮັກສາການປຶກສາຫາລືແລະປະສານງານຢ່າງໃກ້ຊິດໃນວຽກງານສາກົນ.
|
