|
ຕາມຂ່າວສານຊິນຮວາ: ຕອນຄ່ຳວັນທີ 6 ທັນວານີ້, ທ່ານຫູຈິນທາວ ປະທານປະເທດຈີນໄດ້ ໂທລະສັບລົມກັບທ່ານບຸສ ປະທານາທິບໍດີອາເມລິກາ.
ທ່ານຫູຈິນທາວກ່າວວ່າ, ໃນປີ 2007 ທີ່ຈະຜ່ານພົ້ນໄປນີ້, ການພົວພັນລະຫວ່າງຈີນອາເມລິກາໄດ້ຂະຫຍາຍຕົວຕື່ມອີກ. ຝ່າຍຈີນຍິນດີຮ່ວມກັບຝ່າຍອາເມລິກາທຳຄວາມພະຍາຍາມ, ຊຸກຍູ້ການເຈລະຈາເພື່ອໃຫ້ມີຄວາມເປັນເອກະພາບກັນຫຼາຍກວ່າເກົ່າ ແລະປະກອບສ່ວນອັນໃໝ່ເຂົ້າໃນການຊຸກຍູ້ການພົວພັນຮ່ວມມືທີ່ມີລັກສະນະສ້າງສັນລະຫວ່າງຈີນອາເມລິກາຢ່າງຮອບດ້ານ.
ທ່ານຫູຈິນທ່າວຊີ້ອອກວ່າ, ການແກ້ໄຂບັນຫາໄຕ້ຫວັນແມ່ນຂໍກະແຈໃນການຮັບປະກັນໃຫ້ການພົວພັນລະຫວ່າງຈີນອາເມລິກາຂະຫຍາຍຕົວຢ່າງໝັ້ນທ່ຽງແລະປອດໃສ. ເຈົ້າໜ້າທີ່ໄຕ້ຫວັນພວມຊຸກຍູ້ການເຄື່ອນໄຫວແບ່ງແຍກໃຫ້ໄຕ້ຫວັນເປັນເອກະລາດ ເຊັ່ນ "ການຢັ່ງປະຊາມະຕິເພື່ອເຂົ້າເປັນສະມາຊິກອົງການສະຫະປະຊາຊາດ" ເປັນຕົ້ນ ຢ່າງຮ້າຍແຮງກວ່າເກົ່າ, ເປັນການຂົ່ມຂູ່ແລະທ້າທາຍຕໍ່ສັນຕິພາບແລະສະຖຽນລະພາບຂອງຊ່ອງແຄບໄຕ້ຫວັນຢ່າງໜັກໜ່ວງ. ເດັດດ່ຽວຄັດຄ້ານແລະສະກັດກັ້ນໄຕ້ຫວັນເປັນເອກະລາດ, ປົກປັກຮັກສາສັນຕິພາບແລະສະຖຽນລະພາບຢູ່ຊ່ອງແຄບໄຕ້ຫວັນ, ສອດຄ່ອງກັບຜົນປະໂຫຍດດ້ານຍຸດທະສາດຮ່ວມຂອງຈີນອາເມລິກາ.
ທ່ານບຸສກ່າວວ່າ, ການພົວພັນລະຫວ່າງອາເມລະກາຈີນແມ່ນສຳຄັນຫຼາຍ, ຝ່າຍອາເມລິກາໃຫ້ຄວາມສຳຄັນໃນລະດັບສູງ. ການເຈລະຈາດ້ານເສດຖະກິດຍຸດທະສາດ ແລະການເຈລະຈາດ້ານຍຸດທະສາດລະຫວ່າງອາເມລິກາກັບຈີນ ແມ່ນຊ່ອງທາງສຳເລັດຜົນຂອງການຮ່ວມມືລະຫວ່າງສອງຝ່າຍ, ຫວັງວ່າການເຈລະຈາຈະໄດ້ຮັບຄວາມຄືບໜ້າຫຼາຍກວ່າເກົ່າ. ທ່ານບຸສກ່າວວ່າ, ຝ່າຍອາເມລິກາຈະຮ່ວມມືກັບຝ່າຍຈີນໃນບັນຫາໄຕ້ຫວັນ.
ນອກນີ້, ຜູ້ນຳທັງສອງທ່ານຍັງໄດ້ແລກປ່ຽນຄວາມເຫັນກ່ຽວກັບບັນຫານິວເຄຼຍຂອງແຫຼມເກົາຫຼີແລະບັນຫານິວເຄຼຍຂອງອີຣານ.
|
