ຕາມ​ຂ່າວ CRI: ​ໂດຍ​ຕອບ​ສະໜອງ​ຕາມ​ຄຳ​ເຊີນ​ຂອງ​ລັດຖະບານໄທ, ຕອນ​ບ່າຍ​ວັນ​ທີ 9 ທັນວາ​ນີ້, ທ່ານ​ບານ​ກີ​ມູນ ເລຂາທິການໃຫຍ່ສະຫະປະຊາ​ຊາດ ພ້ອມ​ພັນ​ລະ​ຍາ​ໄດ້​ເດີນ​ທາງ​ໄປ​ຮອດ​ບາງກອກ, ​ເລີ່ມຢ້ຽມຢາມ​ໄທ​ຢ່າງ​ເປັນ​ທາງ​ການ. ນີ້​ແມ່ນ​​ເທື່ອ​ທຳ​ອິດ​ທີ່​ທ່ານ​ບານ​ກີ​ມູນ​ໄປ້ຢ້ຽມຢາມ​ປະ​ເທດ​ອາຊີ​ຢ່າງ​ເປັນ​ທາງ​ການ ນັບ​ແຕ່​ທ່ານ​ດຳລົງ​ຕຳ​ແໜ່ງ​ເລ​ຂາທິການ​ໃຫຍ່​ສະຫະ​ປະຊາ​ຊາດ​ເປັນຕົ້ນມາ.

ຕາມ​ທ່ານນິດ ພິບູນສົງຄາມ ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ​ໄທ​ກ່າວ​ວ່າ, ທ່ານ​ສຸ​ລະ​ຍົດ ຈຸລາ​ນົນ ນາຍົກລັດຖະມົນຕີ​ໄທ​ຈະ​ພົບ​ປະ​ເຈລະຈາ​ກັບ​ທ່ານ​ບານ​ກີ​ມູນ, ​ແລກ​ປ່ຽນ​ຄວາມ​ເຫັນ​ກ່ຽວ​ກັບ​ການ​ເພີ່ມ​ທະວີ​ການ​ຮ່ວມ​ມືລະຫວ່າງ​ໄທ​ກັບ​ສະຫະ​ປະຊາ​ຊາດ ​ໃນ​ດ້ານ​ການ​ພັດ​ທະ​ນາ​ແບບ​ຍືນ​ຍົງ ການ​ປ່ຽນ​ແປງ​ຂອງ​ດິນ​ຟ້າ​ອາກາດທົ່ວ​ໂລກ ​ແລະ​ພະ​ລັງ​ງານ​ໃຊ້​ແທນ. ນອກ​ນີ້, ຝ່າຍ​ໄທ​ຍັງ​ຈະ​ແນະນຳ​ສະພາບ​ທີ່​ກ່ຽວ​ຂ້ອງ​ກັບ​ການ​ເລືອກ​ຕັ້ງ​ທົ່ວ​ໄປ​ຮອບ​ໃໝ່​ຂອງ​ໄທ​​ໃຫ້​ທ່ານ​ບານ​ກີ​ມູນ​ຊາບ.

ທ່ານ​ບານ​ກີ​ມູນ​ຈະ​ເດີນທາງ​ອອກ​ຈາກ​ບາງກອກ​ໃນ​ວັນ​ທີ 11 ທັນວາ​ນີ້, ​ແລະ​ໄປ​ເຂົ້າຮ່ວມ​ກອງ​ປະຊຸມ​ໃຫຍ່​ສະຫະ​ປະຊາ​ຊາດ​ກ່ຽວ​ກັບ​ການ​ປ່ຽນ​ແປງ​ຂອງ​ດິນ​ຟ້າ​ອາ​ກາດ​ທີ່​ເກາະ​ບາ​ລີ​ແຫ່ງ​ອິນ​ໂດ​ເນ​ເຊຍ.