ຕາມ​ຂ່າວ CRI: ວັນ​ທີ 11 ທັນວາ​ນີ້ ຢູ່​ທີ່​ປັກ​ກິ່ງ, ທ່ານ​ນາງ​ອູ​ອີ ຮອງ​ນາ​ຍົກ​ລັດ​ຖະ​ມົນ​ຕີ​ຈີນ ກ່າວ​ວ່າ, ຫຼັກ​ໝັ້ນຂອງ​ລັດຖະບານຈີນທີ່​ໃຫ້​ຄວາມ​ສຳຄັນ​​ແລະ​​ດຶງ​ດູດ​ທຶນ​ຕ່າງ​ປະ​ເທດ​ໃຫ້​ຫຼາຍ​ກວ່າ​ເກົ່າ​ນັ້ນ ຈະ​ບໍ່​ປ່ຽນ​ແປງ.

​ໃນ​ກອງ​ປະຊຸມ​ຄະນະ​ກຳມະການ​ປະສົມ​ການ​ຄ້າ​ຈີນ​ອາ​ເມ​ລິ​ກາ​ຄັ້ງ​ທີ 18 ທີ່​ຈັດ​ຂຶ້ນ​ໃນ​ມື້​ດຽວ​ກັນ, ທ່ານ​ນາງ​ອູ​ອີ​ກ່າວ​ວ່າ, ​ໃນ​ໄລຍະ​ປະຫວັດສາດ​ໃໝ່, ຈີນ​ຈະ​ຍຶດ​ໝັ້ນ​ນະ​ໂຍບາຍພື້ນຖານ​ແຫ່ງ​ຊາດ​ທີ່​ເປີດ​ປະຕູ​ສູ່​ພາຍ​ນອກ ຢ່າງ​ໝັ້ນໜຽວ​ບໍ່​ປ່ຽນ​ແປງ, ພັດ​ທະ​ນາ​ການ​​ເປີດ​ປະຕູ​ສູ່​ພາຍ​ນອກ​ໃຫ້​ກວ້າງຂວາງ​ຕື່ມ​ອີກ ​ແລະ​ເລິກ​ເຊິ່ງກວ່າ​ເກົ່າ, ຍົກ​ລະ​ດັບ​ເສດ​ຖະ​ກິດ​ແບບ​ເປີດ​ປະຕູ​ໃຫ້​ສູງ​ຂຶ້ນ, ສືບ​ຕໍ່ສົ່ງ​ເສີມ​ການ​ລົງທຶນ​ຂອງຕ່າງປະ​ເທດ​, ປະ​ດິດ​ສ້າງ​ຮູບ​ແບບ​ການນຳ​ໃຊ້​ທຶນ​ຕ່າງປະ​ເທດ, ປັບປຸງ​ໂຄງ​ປະກອບ​ການ​ລົງທຶນ​ຂອງ​ຕ່າງ​ປະ​ເທດ, ​ເສີມ​ຂະ​ຫຍາຍ​ບົດບາດ​ອັນຕັ້ງໜ້າ​ຂອງ​ການ​ນຳ​ໃຊ້​ທຶນ​ຕ່າງປະ​ເທດ ​ໃນ​ການ​ຊຸກ​ຍູ້​ການ​ປະ​ດິດ​ສ້າງ​ໃໝ່ ຍົກ​ລະດັບ​ອຸດສາຫະກຳ ​ແລະ​ການ​ພັດທະນາ​ຢ່າງ​ກົມກຽວ​ກັນ​ຂອງ​​ເຂດ​ແຄວ້ນ.

ຕາມ​ສະຖິຕິ​ຂອງກະຊວງ​ການ​ຄ້າ​ຈີນ, ​ແຕ່​ເດືອນ​ມັງກອນ​ຫາ​ເດືອນ​ກັນ​ຍາ​ປີ​ນີ້, ຈີນ​ໄດ້​ນຳ​ໃຊ້​ທຶນ​ຕ່າງປະ​ເທດ​ໃນ​ຕົວ​ຈິງ​ມີ​ເຖິງ 47 ​ຕື້​ກວ່າໂດ​ລາ​ສະຫະລັດ, ​ເພີ່ມ​ຂຶ້ນ​ເກືອບ 11% ​ເມື່ອ​ທຽບ​ໃສ່​ໄລຍະ​ດຽວ​ກັນ​ຂອງ​ປີ​ກາຍ, ​ວິ​ສາ​ຫະກິດ​ທຶນ​ຕ່າງປະ​ເທດ​ທີ່​ໄດ້​ຮັບ​ການ​ອະ​ນຸ​ມັດ​ໃຫ້​ສ້າງຕັ້ງຂຶ້ນ​ໃໝ່ມີ 2 ໝື່ນ 8000 ​ກວ່າແຫ່ງ.