|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ໂຄລົບ, ລະດູການສະແດງຟ້ອນສາກົນປັກກິ່ງຄັ້ງທີ 5 ທີ່ພວມດຳເນີນຢູ່ປັກກິ່ງ, ໄດ້ໂຮມສະແດງລະຄອນຟ້ອນລະດັບຍອດຢ້ຽມຂອງຈີນແລະແຫ່ງຕ່າງໆໃນໂລກ, ລາຍການສະແດງທີ່ໂລດໂຜນໄດ້ກາຍເປັນອາຫານຫູອາຫານຕາຂອງຜູ້ຊົມຊາວປັກກິ່ງ. ໃນລາຍການວັດທະນະທຳຈີນພາກນີ້, ພວກເຮົາຈະແນະນຳເນື້ອໃນລະອຽດສູ່ທ່ານຟັງ.
ລະດູການສະແດງຟ້ອນສາກົນປັກກິ່ງ ທີ່ຈັດຂຶ້ນປີລະເທື່ອ ໄດ້ກ້າວເຂົ້າສູ່ປີທີ 5 ແລ້ວ. ຕອນຄ່ຳວັນທີ 15 ພະຈິກແລ້ວນີ້, ລະຄອນຟ້ອນເຜົ່າຕິເບດຂະໜາດໃຫຍ່ "ຈ້າງໝີ" ແປວ່າ "ປິດສະໜາຂອງຕິເບດ" ໄດ້ສະແດງຢູ່ໂຮງລະຄອນປາວລີ້ປັກກິ່ງ, ເປັນການເປີດສາກຂອງລະດູການສະແດງຟ້ອນສາກົນຂອງປີນີ້.
ທີ່ທ່ານພວມຟັງຢູ່ນີ້ແມ່ນລະຄອນຟ້ອນເຜົ່າຕິເບດຈີນຂະໜາດໃຫຍ່ "ຈ້າງໝີ" "ປິດສະໜາຂອງຕິເບດ".
ເນື້ອໃນຂອງລະຄອນ "ຈ້າງໝີ" ແມ່ນເລື່ອງລາວທີ່ແມ່ເຖົ້າເຜົ່າຕິເບດໄດ້ເຫັນ ຢູ່ກາງທາງໄປນະມັດສະການ, ໄດ້ສະແດງເຖິງສະພາບຕ່າງໆ ເຊັ່ນ ຊີວິດການເປັນຢູ່ຂອງພໍ່ແມ່ປະຊາຊົນເຜົ່າຕິເບດ ສິລະປະພື້ນເມືອງເຜົ່າຕິເບດ ປະເພນີສັງຄົມ ແລະພິທີຂອງສາສະໜາຢູ່ເຂດຕິເບດ ເປັນຕົ້ນ, ໃນລະຄອນ ການເກັບກ່ຽວ ການສ້ອມແປງຫຼັງຄາເຮືອນ ການປ່ອຍລ້ຽງງົວ ການຮ້ອງເພງແລະການຟ້ອນ, ລ້ວນແຕ່ຮັກສາສະພາບເດີມຂອງເຜົ່າຕິເບດ, ທົ່ວລະຄອນຄືເປັນພາບຫຍໍ້ຂອງຊີວິດການເປັນຢູ່ຂອງປະຊາຊົນເຜົ່າຕິເບດທີ່ມີຫຼາຍສີຫຼາຍສັນ.
ຄະນະສະແດງລະຄອນ "ຈ້າງໝີ" ແມ່ນຄະນະສະແດງຈາກພື້ນເມືອງແທ້ໆ, ນອກຈາກນາງຢາງລີ້ຜິງ ນັກຟ້ອນທີ່ມີຊື່ສຽງແລ້ວ, ນັກສະແດງອື່ນໆລ້ວນແຕ່ແມ່ນຊາວລ້ຽງສັດແລະສິລະປິນພື້ນເມືອງຂອງເຂດຕິເບດ, ການສະແດງອັນປ່ຽນລົ້ນໄປດ້ວຍອາຍກິ່ນຊີວິດການເປັນຢູ່ນັ້ນ ໄດ້ຮັບຄວາມຊົມເຊີຍຈາກຜູ້ຊົມທັງຫຼາຍຢ່າງຟົດຟື້ນ.
ນາງຢາງລີ້ຜິງແມ່ນຜູ້ແຕ່ງຕົ້ນຕໍຂອງລະຄອນດັ່ງກ່າວ, ແລະເປັນຜູ້ຟ້ອນນຳ ແລະຟ້ອນດ່ຽວ. ໃນເວລາໃຫ້ສຳພາດຕໍ່ນັກຂ່າວ, ນາງຢາງລີ້ຜິງກ່າວວ່າ, ນາງເອງມັກຟ້ອນລະບຳພື້ນເມືອງປະຈຳຊົນເຜົ່າທີ່ມີພະລັງຊີວິດ, ມັກຟ້ອນລະບຳເຜົ່າຕິເບດ. ນາງຢາງລີ້ຜິງເວົ້າວ່າ:
"ໃນເວລາພວກເຮົາສະແດງລະຄອນ, ກໍຖືເວທີເປັນຖົ່ງນາ, ເລື່ອງລາວໃນຊີວິດປະຈຳວັນຂອງເຜົ່າຕິເບດ ແມ່ນມິ່ງຂວັນຂອງຟ້ອນລະບຳ. ເນື້ອໃນຂອງຟ້ອນລະບຳແລະເພງເຫຼົ່ານີ້ ລ້ວນແຕ່ແມ່ນກ່ຽວພັນເຖິງຊີວິດປະຈຳວັນແລະທຳມະຊາດ, ແຕ່ງໂດຍອີງຕາມທ່າທີຕໍ່ທຳມະຊາດແລະຕໍ່ຊີວິດຂອງຄົນເຮົາ, ແມ່ນລະຄອນແລະເພງທີ່ທຳມະຊາດ."
ໃນລະຄອນ ''ຈ້າງໝີ'' ກໍມີເນື້ອໃນທີ່ຕະຫຼົກແລະຢ່ອນອາລົມ, ໄດ້ສະແດງເຖິງແນວຄວາມຄິດທີ່ແປກປະຫຼາດຂອງສິລະປິນທັງຫຼາຍ. ຕົວຢ່າງຄື "ຟ້ອນງົວຈາມມະລີ" ກໍມີຈຸດພິເສດຍຸກປັດຈຸບັນ, "ພວກງົວຈາມມະລີ" ບໍ່ພຽງແຕ່ຮູ້ຢືນກົງ ຢືນພັກ, ຍັງຮູ້ເຕັມລຳຍຸກປັດຈຸບັນທີ່
ທີ່ທ່ານພວມຟັງຢູ່ນີ້ ແມ່ນລະຄອນ "ຊິນເດເຣວລາ" ທີ່ສະແດງໂດຍຄະນະຟ້ອນບາເຣລາຊານູແວນເຊລັງ.
ລະຄອນ "ຊິນເດເຣວລາ" ແມ່ນຄຼາຊິກຂອງຟ້ອນບາເຣ, ແຕ່ງແລະສະແດງໂດຍຄະນະຟ້ອນບາເຣລາຊານູແວນເຊລັງ, ແມ່ນລະຄອນນິທານເດັກພຽງໜຶ່ງດຽວທີ່ສະແດງໃນລະດູການຟ້ອນສາກົນຄັ້ງນີ້. ລະຄອນ "ຊິນເດເຣວລາ" ແມ່ນຄວາມດັ້ງເດີມປະສົມກັບຄວາມທັນສະໄໝ, ໄດ້ຮັກສາສິ່ງຍອດຢ້ຽມໃນນິທານດັ້ງເດີມ, ທັງເພີ່ມຕື່ມຮູບການສະແດງເວທີທີ່ທັນສະໄໝຢ່າງຫຼວງຫຼາຍ, ທັກສະການສະແດງຂອງນັກສະແດງ ໄດ້ສະແດງອອກຢ່າງເຕັມສ່ວນ.
ນັກສະແດງຂອງຄະນະຟ້ອນບາເຣລາຊານູແວນເຊລັງ ລ້ວນແຕ່ແຂງແຮງດີແລະມີພອນສະຫວັນ, ມີຊື່ສຽງດົງດັງດ້ວຍເກັ່ງຫຼາຍດ້ານ ເຊັ່ນ ຄວາມແຮງທີ່ເປັນເອກະລັກພິເສດໃນການສະແດງ ຊ່າງສະແດງໃນຫຼາຍຮູບລັກສະນະ ແລະທັກສະທີ່ພົ້ນເດັ່ນ. ການຟ້ອນຂອງນາງເອກອ້ອນແອ່ນແລະໝັ້ນທ່ຽງ, ສ່ວນການເຕັ້ນແລະການປິ່ນກາຍຂອງພະເອກກໍສະຫງ່າສຸພາບຫຼາຍ. ສາກເບື້ອງຫຼັງເວທີຂອງລະຄອນດັ່ງກ່າວກໍຫຼູຫຼາສົມຄວນ, ໄດ້ສ້າງບັນຍາກາດເປັນເອກະລັກພິເສດໃຫ້ນາງນ້ອຍທີ່ມີການພົບພໍ້ກັນຢ່າງບັງເອີນ, ກໍໄດ້ພັນລະນາຄວາມຄິດໃນໃຈຂອງນາງນ້ອຍ ປະສານສົມທົບກັບຄວາມງາມແລະໂລມັງຕິກໃນນິທານເດັກ ຢ່າງພໍດ້າມພໍດີ. ທ່ານກາລີ ຮະຣິສ ຜູ້ກຳກັບການສະແດງດ້ານສິລະປະຂອງລະຄອນຟ້ອນດັ່ງກ່າວ ແມ່ນຊ່າງຟ້ອນທີ່ມີຊື່ສຽງຂອງໂລກ, ທ່ານເຄີຍອອກແບບ ດ້ານເຄື່ອງໃຊ້ຍາມສະແດງແລະເສື້ອຜ້າອາພອນໃຫ້ຄະນະຟ້ອນບາເຣສູນກາງຈີນ. ສ່ວນມາສະແດງຢູ່ຈີນເທື່ອນີ້, ຢູ່ນອກໂມງເຝິກຊ້ອມທີ່ເຄັ່ງຕຶງ, ທ່ານຍັງໄປສອນນັກຮຽນວິຊາຟ້ອນລະບຳພະແນກສິລະປະມະຫາວິທະຍາໄລສ້າງຄູ່ປັກກິ່ງ. ໃນເວລາແນະນຳລະຄອນ "ຊິນເດເຣວລາ", ທ່ານເວົ້າວ່າ:
"ນີ້ແມ່ນປະພັນໃຫຍ່ຂອງຄະນະຟ້ອນບາເຣລາຊານູແວນເຊລັງ ໃນຫຼາຍປີມານີ້, ການຟ້ອນໄດ້ຮັກສາຄວາມດັ້ງເດີມຂອງນິທານທີ່ຄຼາຊິກ, ຍັງຖອດຖອນເອົາສິ່ງຍອດຢ້ຽມຂອງລະຄອນສະບັບຕ່າງໆໃນແຕ່ກ່ອນ, ສ່ວນທ້າວສີຮ່ວນ ພະເອກໃນລະຄອນດັ່ງກ່າວທີ່ມາສະແດງຢູ່ປັກກິ່ງເທື່ອແມ່ນຄົນປັກກິ່ງ, ເຂົາເຈົ້າມານູແວນເຊລັງ 2 ປີ, ໄດ້ຮຽນຈົບຢູ່ພະແນກຟ້ອນເບເຣວິທະຍາໄລການຟ້ອນປັກກິ່ງກ່ອນໜ້ານີ້."
ໃນລະດູການສະແດງຟ້ອນລະບຳປີນີ້, ລະຄອນຟ້ອນບາເຣ "ຮ່ວາຢ້າງໜຽນຫົວ" ແປວ່າ "ໄວປານດອກໄມ້ພວມເບັ່ງບານ" ທີ່ຄະນະຟ້ອນບາເຣຊຽງໄຮ້ສະແດງນັ້ນ, ໄດ້ນຳເອົາຄວາມຮູ້ສຶກທີ່ຕ່າງກັນມາໃຫ້ຜູ້ຊົມທັງຫຼາຍ. ລະຄອນດັ່ງກ່າວໄດ້ສະແດງເຖິງຮີດຄອງປະເພນີນະຄອນຊຽງໄຮ້ສະໄໝເກົ່າຢ່າງເຂັ້ມຂຸ້ນ. ໄດ້ພັນລະນາເລື່ອງຄວາມຮັກແຕ່ຊຸມປີ 1930 ຫາຊຸມປີ 1940, ໄດ້ສະແດງເຖິງຈິດອາລົມອັນລະອຽດຂອງພະເອກແລະນາງເອກ ໂດຍຜ່ານຈາກການຟ້ອນ ດົນຕີ ແລະການປ່ຽນສາກເບື້ອງຫຼັງ, ໄດ້ຮັບຜົນສຳເລັດຫຼາຍ. ທ່ານຮາມູ້ຖີ ຫົວໜ້າຄະນະຟ້ອນບາເຣຊຽງໄຮ້ກ່າວວ່າ, ລະຄອນນີ້ກໍແມ່ນຜົນປະດິດສ້າງອັນໃໝ່ຂອງພວກເຈົາເຈົ້າ. ທ່ານເວົ້າວ່າ:
"ພວກເຮົາພັນລະນາສະພາບນະຄອນຊຽງໄຮ້ ແຕ່ຊຸມປີ 1930 ຫາຊຸມປີ 1940, ໃນຄາວນັ້ນ ຢູ່ນະຄອນຊຽງໄຮ້ມີຄົນປະເທດຝ່າຍຕາເວັນຕົກຢ່າງຫຼວງຫຼາຍ, ຈຶ່ງນຳເອົາສິລະປະຝ່າຍຕາເວັນຕົກມາສະແດງຢູ່ຊຽງໄຮ້, ແລະມີຜົນກະທົບຢ່າງໃຫຍ່ຕໍ່ສິລະປະຂອງຈີນ. ບົນເວທີສະແດງ ພວກເຮົາຕ້ອງພະຍາຍາມສະແດງອອກຄວາມແຕກຕ່າງກັນລະຫວ່າງສິລະປະຝ່າຍຕາເວັນຕົກກັບສິລະປະຂອງຈີນ, ສະນັ້ນ ໃນລະຄອນດັ່ງກ່າວ, ມີເບື້ອງຫຼັງທີ່ເປັນຖະໜົນເກົ່າຂອງນະຄອນຊຽງໄຮ້, ກໍມີໂຮງເຕັ້ນລຳໄປເລີ້ເໝີນ ແລະກໍມີລຳຍຸກປັດຈຸບັນ ລຳເຈັສຂອງອາເມລິກາ, ທັງນີ້ ໄດ້ເພີ່ມຕື່ມສີສັນຕ່າງໆໃຫ້ແກ່ລະຄອນຟ້ອນບາເຣດັ່ງກ່າວໃນດ້ານການຟ້ອນ, ໃນດ້ານດົນຕີ ກໍມີເອກະລັກພິເສດ."
ລະດູການສະແດງຟ້ອນສາກົນປັກກິ່ງຄັ້ງທີ 5 ຈະດຳເນີນເປັນເວລາ 45 ວັນ, ລະຄອນທີ່ມີຊື່ສຽງຂອງແອສປາຍ ອົສຕຼາລີ ອາເມລິກາ ແລະປະເທດອື່ນໆ ແລະລະຄອນລະດັບຍອດຢ້ຽມທ້ອງຖິ່ນຕ່າງໆຂອງຈີນ ໄດ້ສະແດງສິລະປະລະດັບຍອດຢ້ຽມທີ່ຫາຍາກໃຫ້ແກ່ຜູ້ຊົມທັງຫຼາຍ. ລະຄອນ"ເມດາມບັດເຕີຟຼາຍ" ແປວ່າ "ພັນລະຍາແມງກະເບື້ອ" ເຊິ່ງແມ່ນລະຄອນຟ້ອນບາເຣຄຼາຊິກຂອງໂລກ ທີ່ສະແດງໂດຍຄະນະຟ້ອນບາເຣພາກເໜືອອັງກິດ ໃນຖານະເປັນລະຄອນທີ່ຈະສະແດງໃນພິທີປິດສາກລະດູການສະແດງຟ້ອນສາກົນປັກກິ່ງຄັ້ງນີ້, ຈະອອກສະແດງໃນຕົ້ນເດືອນທັນວານີ້.
ທ່ານຜູ້ຟັງທີ່ໂຄລົບ ທີ່ຟັງມານັ້ນ ແມ່ນລາຍການວັດທະນະທຳຈີນທີ່ພາດຫົວເລື່ອງວ່າ: ລະດູການສະແດງຟ້ອນສາກົນປັກກິ່ງໂຮມສະແດງລະຄອນຟ້ອນທີ່ດີເລີດຂອງໂລກ. ຂອບໃຈທ່ານທີ່ຮັບຟັງ, ພົບກັນໃໝ່ໃນລາຍການໜ້າ, ສະບາຍດີ.
|
