ຕາມ​ຂ່າວ CRI: ຍ້ອນ​ອາ​ເມ​ລິ​ກາ ຍີ່ປຸ່ນ ກາ​ນາ​ດາ​ຄັດຄ້ານ​ຕົວ​ເລກ​ຄາດ​ໝາຍ​​ຫຼຸດ​ການ​ລະບາຍ​ອາຍ​ພິດ​ເຮືອນ​ແກ້ວ​ສຳລັບ​ປະ​ເທດ​ທີ່​ພັດທະນາ​ແລ້ວ ທີ່​ກຳນົດ​ໄວ້​ໃນ​ຮ່າງ​ຍັດ​ຕິ, ວັນ​ທີ 13 ທັນວາ​ນີ້, ກອງ​ປະຊຸມ​ໃຫຍ່​ສະຫະ​ປະຊາ​ຊາດ​ກ່ຽວ​ກັບ​ການ​ປ່ຽນ​ແປງ​ຂອງ​ດິນ​ຟ້າ​ອາ​ກາດ​ທີ່​ຈັດ​ຂຶ້ນຢູ່​ເກາະ​ບາ​ຫຼີອິນ​ໂດ​ເນ​ເຊຍ ໄດ້​ຕົກ​ຢູ່​ໃນ​ສະພາບ​ຄາ​ກັນ​ຊົ່ວ​ຄາວ.

ຈຸດ​ໜັກ​ຂອງ​ກອງ​ປະຊຸມ​ເທື່ອ​ນີ້​ແມ່ນ​ປຶກສາ​ຫາລື​​ມາດ​ຕະການຮັບ​ມື​ກັບ​ການ​ປ່ຽນ​ແປງ​ຂອງ​ດິນ​ຟ້າ​ອາກາດ ພາຍຫຼັງ​ຄຳ​ໝັ້ນສັນຍາ​ໄລຍະ​ທຳ​ອິດ​​ໃນອະນຸ​ສັນ​ຍາ​ກຽວ​ໂຕ​ ຮອດ​ເວລາ​ກຳນົດໃນປີ 2012. ຮ່າງ​ຍັດຕິ​ທີ່​ແຈກ​ຢາຍ​ຢູ່​ທີ່​ປະຊຸມ​ກ່ອນ​ໜ້າ​ນີ້ ​ໄດ້​ຮຽກ​ຮ້ອງ​ໃຫ້​ປະ​ເທດ​ທີ່​ພັດທະນາ​ແລ້ວ ຫຼຸດ​ການ​ລະບາຍ​ອາຍ​ພິດ​ເຮືອນ​ແກ້ວ​ໃຫ້​ໜ້ອຍ​ລົງ 25% ຫາ 40% ກ່ອນ​ປີ 2020 ບົນ​ພື້ນຖານ​ລະດັບ​ຂອງ​ປີ 1990. ອາ​ເມ​ລິ​ກາ ຍີ່ປຸ່ນ ​ແລະ​ກາ​ນາ​ດາ​ຄັດ​ຄ້ານ​ຕົວ​ເລກ​ຄາດ​ໝາຍ​ດັ່ງກ່າວ. ສະຫະພາບ​ເອີ​ລົບ​​ເຫັນ​ດີ​ນຳ, ​ແລະ​ເຫັນ​ວ່າ ອາ​ເມ​ລິ​ກາ​ໄດ້​ກາຍ​ເປັນ​ສິ່ງ​ກີດ​ຂວາງ​ຕົ້ນຕໍ​ຂອງ​ກອງ​ປະຊຸມ​ເທື່ອ​ນີ້. ປະ​ເທດ​ທີ່​ພວມ​ພັດ​ທະ​ນາ​ກໍ​ເຫັນ​ວ່າ,

ປະເທດທີ່ພັດທະນາແລ້ວຄວນສືບຕໍ່ຫຼຸດການລະບາຍຫຼັງຈາກ ປີ 2012. ປັດຈຸບັນ, ຝ່າຍ​ຕ່າງໆ​ບໍ່​ໄດ້​ໃຫ້​ຜ່ອນ​ຜັນ​ສັ້ນຍາວ​ແກ່​ກັນ​ໃນ​ບັນຫາ​ດັ່ງກ່າວ, ກອງ​ປະຊຸມ​ໄດ້​ຕົກ​ຢູ່​ໃນ​ສະ​ພາບ​ຄາ​ກັນ.

ນອກ​ນີ້​ຂ່າວ​ແຈ້ງວ່າ, ມື້​ດຽວ​ກັນ, ທ່ານ​ບານ​ກີ​ມູນ ​ເລຂາທິການ​ໃຫຍ່​ອົງ​ການ​ສະ​ຫະ​ປະ​ຊາ​ຊາດ​ໄດ້​ພົບ​ປະ​ກັບ​ທ່ານ​ເຊ້​ເຈິ້ນຮວາ ຫົວໜ້າ​ຄະນະ​ຜູ້​ແທນ​ຈີນ​ທີ່​ເຂົ້າ​ຮ່ວມ​ກອງ​ປະ​ຊຸມ, ທ່ານ​ບານ​ກີ​ມູນ​ຍ້ອງຍໍ​ຄະນະ​ຜູ້​ແທນ​ຈີນ ທີ່​ມີ​ທ່າ​ທີອັນຕັ້ງ​ໜ້າ​ຢູ່​ທີ່​ປະ​ຊຸມ, ​ຫຼັກ​ໝັ້ນ​ຂອງ​ຈີນ​ມີ​ລັກສະນະ​ສ້າງສັນ, ​ໄດ້​ສົ່ງ​ສັນຍານ​ອັນຕັ້ງໜ້າ​ຕໍ່​ໂລກ.