|
ຕາມຂ່າວສານຊິນຮວາ: ຜົນຜະລິດທັນຍາຫານຂອງຈີນໃນປີນີ້ໄດ້ເພີ່ມຂຶ້ນ ແລະເພີ່ມຂຶ້ນເປັນ 4 ປີລຽນຕິດ, ຜົນຜະລິດທັນຍາຫານຄາດວ່າຈະກາຍ 500 ລ້ານໂຕນ. ປີນີ້ ແມ່ນປີໜຶ່ງທີ່ຈີນອອກແຮງຊຸກຍູ້ກະສິກຳແບບທັນສະໄໝ ແລະຜົນຜະລິດທັນຍາຫານໄດ້ເພີ່ມຂຶ້ນແບບກ້າວກະໂດດ, ແລະກໍແມ່ນປີໜຶ່ງທີ່ຊາວກະສິກອນຈີນມີລາຍໄດ້ເພີ່ມຂຶ້ນຢ່າງວ່ອງໄວ ລະດັບຊີວິດການເປັນຢູ່ຂອງເຂົາເຈົ້າກໍດີຂຶ້ນຢ່າງບໍ່ຢຸດຢັ້ງ.
ຕາມຕົວເລກຫຼ້າສຸດຂອງກົມສະຖິຕິແຫ່ງຊາດຈີນ, ໃນ 3 ໄຕມາດທຳອິດຂອງປີນີ້, ຄວາມໄວຂອງລາຍຮັບເປັນເງິນສົດຂອງຊາວກະສິກອນຈີນໄດ້ສ້າງສະຖິຕິໃໝ່, ຫັກຕົ້ນທຶນອອກແລ້ວ, ໄດ້ເພີ່ມຂຶ້ນ 14,8%, ໄວກວ່າໄລຍະດຽວກັນຂອງປີກາຍ 3,4%.
ກະສິກຳແບບທັນສະໄໝໄດ້ຍົກຜົນຜະລິດຂອງກະສິກຳໃຫ້ສູງຂຶ້ນ, ການພັດທະ ນາຢ່າງໜັກແໜ້ນຂອງວິສາຫະກິດໃນຊົນນະບົດ ໄດ້ເປີດກວ້າງຊ່ອງທາງໃຫ້ແກ່ຊາວກະສິກອນມີລາຍໄດ້ສູງຂຶ້ນ. ພ້ອມກັນນັ້ນ, ລັດຖະບານຈີນໄດ້ວາງນະໂຍບາຍຢ່າງເປັນລະບົບເພື່ອຮັບປະກັນສິດແລະຜົນປະໂຫຍດຂອງຊາວກະສິກອນທີ່ໄປເຮັດວຽກຢູ່ໃນຕົວເມືອງ, ອັນໄດ້ເສີມຂະຫຍາຍບົດບາດທີ່ສຳຄັນໃນການແກ້ໄຂບັນຫາທີ່ພົ້ນເດັ່ນ ເຊັ່ນ ຊາວກະສິກອນທີ່ໄປເຮັດວຽກຢູ່ໃນຕົວເມືອງໄດ້ເງິນເດືອນຕ່ຳ ລູກຫຼານເຂົ້າຮຽນຍາກ ແລະອື່ນໆ.
ຫວ່າງມໍ່ໆນີ້, ລັດຖະບານຈີນໄດ້ຈັດກອງປະຊຸມກ່ຽວກັບວຽກງານເສດຖະກິດສູນກາງ ໂດຍກ່າວເນັ້ນວ່າ, ປີໜ້າ ຈະເພີ່ມຄວາມແຮງໃນການວາງແຜນພັດທະນາຕົວເມືອງແລະຊົນນະບົດ, ປັບປຸງນະໂຍບາຍທີ່ສະໜັບສະໜູນຊາວກະສິກອນ ແລະໃຫ້ຊາວກະສິກອນໄດ້ຜົນປະໂຫຍດ. ເພີ່ມທະວີການກໍ່ສ້າງພື້ນຖານໂຄງລ່າງໃນຊົນນະບົດ, ເປີດກວ້າງຊ່ອງທາງສ້າງລາຍຮັບຂອງຊາວກະສິກອນ, ສຸມກຳລັງແກ້ໄຂບັນຫາຊີວິດການເປັນຢູ່ໃນຊົນນະບົດໃຫ້ນັບມື້ນັບດີຂຶ້ນ.
|
