ຕາມຂ່າວ CRI: ໃນກອງປະຊຸມຂ່າວທີ່ຈັດຂຶ້ນຢູ່ທີ່ປັກກິ່ງໃນວັນທີ 18 ທັນວານີ້, ທ່ານສິນກ່າງ ໂຄສົກກະຊວງການຕ່າງປະເທດຈີນກ່າວວ່າ, ຝ່າຍຈີນຫວັງໃຫ້ການກະທຳຂອງຍີ່ປຸ່ນມີຜົນດີຕໍ່ການປົກປັກຮັກສາສັນຕິພາບແລະສະຖຽນລະພາບຂອງພາກພື້ນແຫ່ງນີ້, ມີຜົນດີຕໍ່ການຊຸກຍູ້ຄວາມໄວ້ເນື້ອເຊື່ອໃຈເຊິ່ງກັນແລະກັນລະຫວ່າງປະເທດຂອງພາກພື້ນແຫ່ງນີ້.
ທ່ານສິນກ່າງກ່າວວ່າ, ຝ່າຍຈີນປະຕິບັດນະໂຍບາຍມິດຕະພາບກັບປະເທດອ້ອມຂ້າງ, ຍິນດີຮ່ວມກັບປະເທດໃນພາກພື້ນແຫ່ງນີ້ ແລະປະເທດອື່ນໆທຳຄວາມພະຍາຍາມ, ຊຸກຍູ້ຄວາມໄວ້ເນືອເຊື່ອໃຈເຊິ່ງກັນແລະກັນ, ເພີ່ມທະວີການຮ່ວມມືກັນ, ປົກປັກຮັກສາສັນຕິພາບ ສະຖຽນລະພາບແລະຄວາມໝັ້ນຄົງຂອງພາກພື້ນແຫ່ງນີ້. ທ່ານຍັງກ່າວເນັ້ນວ່າ, ບັນຫາໄຕ້ຫວັນແມ່ນວຽກງານພາຍໃນຂອງຈີນ, ຈີນຄັດຄ້ານປະເທດໃດໆແຊກແຊງເຂົ້າວຽກງານໄຕ້ຫວັນດ້ວຍຮູບແບບໃດໆ.
ວັນທີ 18 ທັນວານີ້, ກະຊວງປ້ອງກັນປະເທດຍີ່ປຸ່ນປະກາດວ່າ, ຕອນເຊົ້າມື້ດຽວກັນ ຢູ່ເຂດທະເລຮາວາຍອາເມລິກາ, ກ່ຳປັ່ນອາເອກິສໝາຍເລກຄອງໂກຂອງກອງປ້ອງກັນຕົວເທິງທະເລຍີ່ປຸ່ນ ໄດ້ທົດລອງຍິງຂີປະນາວຸດສະກັດກັ້ນເທິງທະເລ SM-3 ຢ່າງສຳເລັດຜົນ, ແລະສາມາດສະກັດກັ້ນຂີປະນາວຸດທີ່ສົມມຸດວ່າເປັນຂີປະນາວຸດຂອງຝ່າຍສັດຕູໄດ້ຢ່າງສຳເລັດຜົນ.
|