ຕາມຂ່າວ CRI: ວັນທີ 20 ທັນວານີ້ ຢູ່ທີ່ປັກກິ່ງ, ທ່ານສິນກ່າງ ໂຄສົກກະຊວງການຕ່າງປະເທດຈີນກ່າວວ່າ, ຝ່າຍຈີນຫວັງໃຫ້ບັນດາຝ່າຍຂອງການເຈລະຈາ 6 ຝ່າຍກ່ຽວກັບບັນຫານິວເຄຼຍແຫຼມເກົາຫຼີສືບຕໍ່ປະຕິບັດພັນທະຂອງໃຜລາວ, ຈັດຕັ້ງປະຕິບັດແຜນດຳເນີນງານໄລຍະທີສອງທີ່ໄດ້ຕົກລົງກັນໃນການເຈລະຈາ 6 ຝ່າຍຮອບທີ 6 ຢ່າງຮອບດ້ານແລະສະໝ່ຳສະເໝີ, ເພື່ອຊຸກຍູ້ໃຫ້ການເຈລະຈາ 6 ຝ່າຍມີຄວາມຄືບໜ້າ.
ໃນງານຖະແຫຼງຂ່າວທີ່ຈັດຂຶ້ນຢູ່ທີ່ປັກກິ່ງໃນມື້ດຽວກັນ, ທ່ານສິນກ່າງໄດ້ແນະນຳສະພາບການໄປຢ້ຽມຢາມ ສປປ ເກົາຫຼີຂອງທ່ານອູຕ້າເວີຍ ລັດຖະມົນຕີຊ່ວຍວ່າການກະຊວງການຕ່າງປະເທດຈີນ ຫົວໜ້າຄະນະຜູ້ແທນຈີນທີ່ເຂົ້າຮ່ວມການເຈລະຈາ 6 ຝ່າຍ ແຕ່ວັນທີ 17 ຫາວັນທີ 19 ທັນວານີ້.
ທ່ານສິນກ່າງກ່າວວ່າ, ການບັນລຸແຫຼມເກົາຫຼີປາສະຈາກນິວເຄຼຍ ມີຜົນດີຕໍ່ສັນຕິພາບແລະສະຖຽນລະພາບຖາວອນຂອງແຫຼມເກົາຫຼີ, ແລະກໍສອດຄ່ອງກັບຜົນປະໂຫຍດຮ່ວມຂອງບັນດາຝ່າຍ ເຊິ່ງລວມທັງ ສ.ເກົາຫຼີ, ຝ່າຍຈີນເຊື່ອວ່າ, ບໍ່ວ່າສະຖານະການການເມືອງຢູ່ພາຍໃນປະເທດ ສ.ເກົາຫຼີຈະມີການປ່ຽນແປງເປັນແນວໃດ, ຝ່າຍ ສ.ເກົາຫຼີກໍຈະສາມາດພ້ອມກັນກັບບັນດາຝ່າຍອື່ນໆທຳຄວາມພະຍາຍາມ, ຊຸກຍູ້ການເຈລະຈາ 6 ຝ່າຍໃຫ້ກ້າວໄປໜ້າຢ່າງບໍ່ຢຸດຢັ້ງ.
|