ຕາມ​ຂ່າວສານ​ຊິນ​ຮວາ: ວັນ​ທີ 31 ທັນວາ​ນີ້ ຢູ່​ທີ່​ບາງກອກ, ທ່ານ​ສະໝັກ ສູນ​ທໍ​ລະ​ເວດ ຫົວ​ໜ້າ​ພັກ​ພະລັງ​ປະຊາຊົນ​ຂອງ​ໄທ​ກ່າວ​ວ່າ, ພັກ​ພະລັງ​ປະຊາຊົນ​ຈະ​ຮ່ວມ​ກັນ​ກັບ​ສາມ​ພັກ​ການ​ເມືອງ​ອື່ນ​ປະກອບ​ລັດຖະບານ​ປະສົມ.

ມື້​ດຽວ​ກັນ, ທ່ານ​ສະໝັກ ສູນ​ທໍລະ​ເວດ​ໄດ້​ຮ່ວມ​ກັບ​ຜູ້ນຳ​ຂອງ​ພັກ​ຮ່ວມ​ໃຈ​ໄທ​ຊາດ​ພັດ​ທະ​ນາ ພັກ​ມັດຊິມາ​ທິປະ​ໄຕ​ແລະ​ພັກ​ປະຊາລາດ ​​ຈັດຖະ​ແຫຼ​ງຂ່າວ​ຮ່ວມຢູ່​ທີ່​ບາງ​ກອກ. ທ່ານ​ສະ​ໝັກ​ກ່າວ​ວ່າ, ພັກ​ພະລັງ​ປະຊາຊົນ​ກັບ​ສາມ​ພັກ​ດັ່ງກ່າວ​ກວມ 254 ທີ່​ນັ່ງ​ໃນ​ຈຳ​ນວນ 480 ທີ່​ນັ່ງ​ໃນ​ສະ​ພາ​ຜູ້​ແທນ​ລາດ​ຊະ​ດອນ, ​ໄດ້ກວມຫຼາຍ​ກວ່າ​ເຄິ່ງໜຶ່ງ​, ​ແລະ​ຈະ​ສາ​ມາດ​ປະ​ກອບ​ລັດ​ຖະບານ​ປະສົມ​ໄດ້.

ທ່ານ​ສະໝັກ​ກ່າວ​ວ່າ ການ​ປະກາດ 4 ພັກ​ຮ່ວມ​ສຳພັນ​ກ່ອນ​ເວລາ​ກຳນົດ​ນັ້ນ ​ແມ່ນ​ເພື່ອ​ສະ​ແດງ​ຄວາມ​ສາມາດ​ຂອງ​ພັກ​ພະລັງ​ປະຊາຊົນ ​ໃນ​ກາ​ນປະກອບ​ລັດຖະ​ບານ, ທ່ານ​ຍັງ​ກ່າວ​ວ່າ, ສະ​ຫະ​ພັນ 4 ພັກ​ຍິນ​ດີ​ໃຫ້​ພັກ​ການ​ເມືອງ​ອື່ນໆ​ເຂົ້າຮ່ວມ​ລັດ​ຖະ​ບານ.

ຕອນ​ເຊົ້າມື້​ດຽວ​ກັນ, ທ່ານ​ບານ​ຮານ ປະທານ​ພັກ​ຊາດ​ໄທ​ກໍສະ​ແດງ​ວ່າ​ຈະ​ເຂົ້າ​ຮ່ວມ​ສະ​ຫະ​ພັນ​ພັກ​ພະລັງ​ປະຊາຊົນ ຮ່ວມ​ກັນ​ປະກອບ​ລັດຖະບານ.