ຕາມຂ່າວສານຊິນຮວາ: ພາຍຫຼັງສະພາປະຊາຊົນແຫ່ງຊາດຈີນໄດ້ທຳການຕົກລົງກ່ຽວກັບວິທີເລືອກຕັ້ງຜູ້ບໍລິຫານ ແລະ ສະພານິຕິບັນຍັດ ໃນປີ 2012 ແລະບັນຫາການເລືອກຕັ້ງທົ່ວໄປຂອງເຂດບໍລິຫານພິເສດຮົງກົງແລ້ວ, ອົງການຈັດຕັ້ງມະຫາຊົນແລະພັກທີ່ສຳຄັນຕ່າງໆຂອງຮົງກົງ ໄດ້ພາກັນກ່າວວ່າ, ການຕົກລົງຂອງສະພາປະຊາຊົນແຫ່ງຊາດແມ່ນສອດຄ່ອງກັບຂໍ້ກຳນົດຂອງກົດໝາຍ ສອດຄ່ອງກັບຄວາມຈິງ ແລະຈິດໃຈຂອງຊາວຮົງກົງ.
ທ່ານຖານຢ້າວຈົ່ງ ປະທານສະຫະພັນຮ່ວມສ້າງຮົງກົງປະຊາທິປະໄຕກ່າວວ່າ, ການຕົກລົງຂອງສະພາປະຊາຊົນແຫ່ງຊາດກ່ຽວກັບການພັດທະນາໂຄງປະກອບການເມືອງຂອງຮົງກົງ, ໄດ້ພິຈາລະນາເຖິງບົດລາຍງານໃຫ້ຄຳປຶກສາການພັດທະນາໂຄງປະກອບການເມືອງທີ່ຜູ້ບໍລິຫານເຂດພິເສດຮົງກົງຍື່ນໃຫ້ນັ້ນຢ່າງເຕັມທີ່, ແລະປະສານສົມທົບກັບສະພາບຄວາມຈິງຂອງຮົງກົງແລ້ວ, ທ່ານຫວັງໃຫ້ວົງການຕ່າງໆຂອງຮົງກົງຈົ່ງປະຕິບັດຕາມການຕົກລົງຂອງສະພາປະຊາຊົນແຫ່ງຊາດ, ເຮັດໃຫ້ຮົງກົງບັນລຸການເລືອກຕັ້ງທົ່ວໄປເປັນກ້າວໆ.
ທ່ານຖຽນໄປຈຸ້ນ ປະທານພັກເສລີຮົງກົງກ່າວວ່າ, ສະພາປະຊາຊົນແຫ່ງຊາດໄດ້ຕົກລົງຕາຕະລາງເວລາການເລືອກຕັ້ງທົ່ວໄປຢ່າງຄັກແນ່, ນີ້ໄດ້ຮັກສາສະຖຽນລະພາບຂອງການພັດທະນາໂຄງປະກອບການເມືອງຂອງຮົງກົງ, ແລະກໍໄດ້ຄຳນຶງເຖິງຄວາມຮຽກຮ້ອງຕ້ອງການຂອງສັງຄົມຮົງກົງ.
ທ່ານເຈີ້ງຢ້າວຖາງ ປະທານກຳມະບານຮົງກົງກ່າວວ່າ, ສະພາປະຊາຊົນແຫ່ງຊາດຕົກລົງດຳເນີນການເລືອກຕັ້ງຜູ້ບໍລິຫານເຂດພິເສດຮົງກົງໂດຍທົ່ວໄປໃນປີ 2017, ໄດ້ໃຫ້ຄຳຕອບຕາມຄວາມຮຽກຮ້ອງຕ້ອງການຂອງຊາວຮົງກົງຢ່າງຕັ້ງໜ້າ, ແລະເຮັດໃຫ້ຜົນປະໂຫຍດຂອງຝ່າຍຕ່າງໆດຸນດ່ຽງກັນ, ແມ່ນຕິດແທດຕົວຈິງ, ມີຜົນດີຕໍ່ການພັດທະນາຂອງຮົງກົງໃນໄລຍະຍາວນານ, ແມ່ນຫຼັກໝາຍທາງຂອງການພັດທະນາໂຄງປະກອບການເມືອງຮົງກົງ.
|