|
ຕາມຂ່າວ CRI: ບົດລາຍງານ "ສະຖານະການແລະການເບິ່ງເສດຖະກິດໂລກປີ 2008" ທີ່ສະຫະປະຊາຊາດປະກາດໃນວັນທີ 9 ມັງກອນນີ້ ຊີ້ອອກວ່າ, ຄາດວ່າ ຈັງຫວະເຕີບໂຕຂອງເສດຖະກິດໂລກປີ 2008 ຈະສືບຕໍ່ຊັກຊ້າລົງ, ອັດຕາການເຕີບໂຕຂອງເສດຖະກິດໂລກຈະຫຼຸດລົງຮອດ 3,4%.
ບົດລາຍງານຂຽນວ່າ, ປີ 2008, ຄວາມສ່ຽງຕົ້ນຕໍທີ່ການພັດທະນາຂອງເສດຖະກິດໂລກຈະປະເຊີນໜ້ານັ້ນ ແມ່ນຍ້ອນຕະຫຼາດອະສັງຫາລີມະຊັບອາເມລິກາຊຸດໂຊມ, ໂດຍສະເພາະແມ່ນລາຄາເຮືອນຕົກຕ່ຳລົງຢ່າງຫຼວງຫຼາຍ, ການປ່ຽນແປງຢ່າງດຸເດືອດຍ້ອນອັດຕາແລກປ່ຽນເງິນໂດລາສະຫະລັດຕົກຕ່ຳລົງຢ່າງວ່ອງໄວພາໃຫ້ເສດຖະກິດທົ່ວໂລກເສຍຄວາມດຸນດ່ຽງ, ລາຄານ້ຳມັນເຊື້ອໄຟຖີບສູງຂຶ້ນຕື່ມອີກແລະອື່ນໆ.
ບົດລາຍງານຊີ້ອອກວ່າ, ຈັງຫວະເຕີບໂຕຂອງເສດຖະກິດປະເທດພວມພັດທະນາປີ 2007 ໄດ້ຮັກສາທ່ວງທ່າແຂງແຮງ ຄື ເພີ່ມຂຶ້ນ 6,9%, ປີ 2008 ອາດຈະຊ້າລົງໃນລະດັບໃດໜຶ່ງ, ແຕ່ຍັງຄົງສືບຕໍ່ຮັກສາການເພີ່ມຂຶ້ນອ່າວໄວ.
ບົດລາຍງານຍັງຊີ້ອອກວ່າ, ເສດຖະກິດຈີນພັດທະນາຢ່າງວ່ອງໄວ ໄດ້ສົ່ງຜົນສະທ້ອນຢ່າງໃຫຍ່ຫຼວງຕໍ່ເສດຖະກິດຂອງປະເທດພວມພັດທະນາອື່ນໆ, ໄດ້ຊຸກຍູ້ໂດຍກົງໃຫ້ເສດຖະກິດຂອງປະເທດເຫຼົ່ານີ້ພັດທະນາຢ່າງແຂງແຮງໃນຫຼາຍປີຜ່ານມາ.
|
