|
ຫຼັງຈັດການເລືອກຕັ້ງເພີ່ມເຕີມແລ້ວ, ສະຖານະການຂອງໄທມີຄວາມບໍ່ແນ່ນອນຢູ່
cri
ຕາມຂ່າວCRI: ວັນທີ 13 ມັງກອນນີ້, ເຂດເລືອກຕັ້ງທີ 3 ຂອງຈັງຫວັດນະຄອນ ລາຊາສີມາ ພາກອີສານຂອງໄທໄດ້ຈັດການເລືອກຕັ້ງເພີ່ມເຕີມຂອງສະພາຜູ້ແທນລາດຊະດອນ. ນັກວິເຄາະເຫັນວ່າ, ຜົນການເລືອກຕັ້ງເພີ່ມເຕີມຂອງໄທຈະບໍ່ມີຜົນສະທ້ອນຕໍ່ການປະກອບລັດຖະບານພໍເທົ່າໃດ, ແຕ່ຍ້ອນຄະດີຟ້ອງການສໍ້ໂກງການເລືອກຕັ້ງຕ່າງໆທີ່ເກີດຂຶ້ນຫຼັງການເລືອກຕັ້ງທົ່ວໄປ ອາດຈະເຮັດໃຫ້ບາງພັກການເມືອງຖືກສັ່ງຍຸບ, ໃນປີໃໝ່ນີ້, ສະຖານະການການເມືອງຂອງໄທຍັງເຕັມໄປດ້ວຍຄວາມບໍ່ແນ່ນອນ.
ໃນການເລືອກຕັ້ງຂອງເຂດເລືອກຕັ້ງທີ 3 ຂອງຈັງຫວັດນະຄອນລາຊະສີມາທີ່ຈັດຂຶ້ນໃນທ້າຍປີກາຍນີ້, ຜູ້ສະໝັກຮັບເລືອກຕັ້ງ 3 ຄົນຂອງພັກພະລັງປະຊາຊົນໄດ້ຮັບໄຊຊະນະ. ແຕ່ຍ້ອນຄະນະກຳມະການການເລືອກຕັ້ງຂອງໄທຕັດສິນວ່າ ໃນການເລືອກຕັ້ງໄດ້ເກີດມີການສໍ້ໂກງຍ້ອນປັດໃຈທີ່ບໍ່ແມ່ນຜູ້ສະໝັກຮັບເລືອກຕັ້ງເຮັດເອງ, ຈຶ່ງໄດ້ຍົກເລີກສິດທີ່ໄດ້ຮັບເລືອກຕັ້ງຂອງ 3 ຄົນນີ້, ແຕ່ຍັງອະນຸຍາດໃຫ້ເຂົາເຈົ້າຕາງໜ້າພັກຂອງຕົນເຂົ້າຮ່ວມການເລືອກຕັ້ງເພີ່ມເຕີມ. ຜົນການນັບຄະແນນທີ່ບໍ່ເປັນທາງການທີ່ປະກາດໃນຕອນຄ່ຳວັນທີ 13 ມັງກອນນີ້ໄດ້ສະແດງໃຫ້ເຫັນວ່າ, ຜູ້ສະໝັກຮັບເລືອກຕັ້ງ 3 ຄົນນີ້ໄດ້ຮັບໄຊຊະນະອີກໃນການເລືອກຕັ້ງເພີ່ມເຕີມ.
ໃນການເລືອກຕັ້ງທົ່ວໄປຂອງໄທທີ່ຈັດຂຶ້ນໃນທ້າຍປີກາຍ, ໃນທັງໝົດ 480 ຄົນທີ່ໄດ້ຮັບເລືອກຕັ້ງເປັນສະມາຊິກສະພາຜູ້ແທນລາດຊະດອນຊຸດໃໝ່ນັ້ນ, ມີ 83 ຄົນຖືກກ່າວຟ້ອງວ່າສໍ້ໂກງ, ໃນນັ້ນ, ພັກພະລັງປະຊາຊົນມີ 65 ຄົນ. ນັບມາຮອດປັດຈຸບັນ, ຄະນະກຳມະການການເລືອກຕັ້ງໄດ້ຍົກເລີກສິດທີ່ໄດ້ຮັບການເລືອກຕັ້ງຂອງຜູ້ສະໝັກ 10 ກວ່າຄົນທີ່ມາຈາກຫຼາຍພັກ.
ຕາມການກຳນົດໃນລັດຖະທຳມະນູນ, ກອງປະຊຸມຄັ້ງທຳອິດຂອງສະພາຜູ້ແທນລາຊະດອນຊຸດໃໝ່ຂອງໄທຄວນຈັດພາຍໃນ 30 ມື້ຫຼັງຈາກການເລືອກຕັ້ງ ຄືກ່ອນວັນທີ 22 ເດືອນນີ້, ສະມາຊິກສະພາຜູ້ແທນລາຊະດອນທີ່ເຂົ້າຮ່ວມກອງປະຊຸມບໍ່ໃຫ້ໜ້ອຍກວ່າ 95% ຂອງທັງໝົດ 480 ທີ່ນັ່ງ, ເຊິ່ງເທົ່າກັບ 456 ທີ່ນັ່ງ. ກ່ອນໜ້ານີ້, ຄະນະກຳມະການການເລືອກຕັ້ງຂອງໄທເຄີຍກ່າວວ່າ, ຈະເລັ່ງລັດການຢືນຢັນຄຸນວຸດທິຂອງສະມາຊິກທີ່ໄດ້ຮັບເລືອກຕັ້ງ, ເພື່ອຮັບປະກັນໃຫ້ກອງປະຊຸມຄັ້ງທຳອິດຂອງສະພາຜູ້ແທນລາຊະດອນສາມາດຈັດຂຶ້ນຕາມເວລາກຳນົດ.
ເມື່ອສັງເກດເບິ່ງຈາກສະຖານະການໃນປະຈຸບັນ,ຜູ່ໄດ້ຮັບເລືອກຕັ້ງທີ່ຖືກຄະນະກຳມະການເລືອກຕັ້ງຍົກເລີກສິດທີ່ໄດ້ຮັບເລືອກຕັ້ງນັ້ນບໍ່ຫຼາຍ,ສະນັ້ນ,ການເລືອກຕັ້ງເພີ່ມເຕີມຈະບໍ່ມີຜົນສະທ້ອນຕໍ່ການແຂ່ງຂັນແລະການເຈລະຈາຈັດຕັ້ງລັດຖະບານຂອງພັກການເມືອງຕ່າງໆຫຼັງຈາກການເລືອກຕັ້ງທົ່ວໄປພໍເທົ່າໃດແລ້ວ.ກ່ອນຫນ້ານີ້, ພັກພະລັງປະຊາ ຊົນທີ່ກາຍເປັນພັກໃຫຍ່ທີຫນຶ່ງຫຼັງຈາກການເລືອກຕັ້ງທົ່ວໄປນັ້ນໄດ້ຮັບການສະ ຫນັບສະຫນູນຂອງສາມພັກນ້ອຍຄືພັກຮ່ວມໃຈໄທຊາດພັດທະນາ ພັກ ມັດຊິມາທິ ປະໄຕແລະພັກປະຊາລາດ, 4 ພັກໄດ້ປະກາດວ່າຈະຈັດຕັ້ງລັດຖະບານປະສົມຊຸດໃຫມ່.ແຕ່ພັກປະຊາທິປັດທີ່ເປັນພັກ ໃຫຍ່ອັນດັບສອງແລະເປັນຄູ່ແຂ່ງທີ່ສຳຄັນຂອງພັກພະລັງປະຊາຊົນໄດ້ກ່າວວ່າ,ຖ້າພັກພະລັງປະຊາຊົນປະກອບລັດຖະບານຢ່າງສຳເລັດຜົນ, ພັກດັ່ງກ່າວຍິນດີກາຍເປັນພັກຝ່າຍຄ້ານພຽງພັກດຽວໃນສະພາ.ແຕ່ພ້ອມກັນນັ້ນ,ພັກປະຊາທິປັດກ່າວວ່າ,ພັກດັ່ງກ່າວໂຄລົບສິດຈັດຕັ້ງຄະນະລັດຖະບານກ່ອນຫມູ່ຂອງພັກພະລັງປະຊາຊົນ.
ນັກວິເຄາະຊີ້ອອກວ່າ,ຖ້າບໍ່ມີເລື່ອງຫຍັງເກີດຂຶ້ນ,ກອງປະຊຸມສະພາຜູ່ແທນລາດຊະດອນຊຸດໃຫມ່ຂອງໄທເທື່ອທຳອິດຈະສາມາດຈັດຂຶ້ນຕາມເວລາທີ່ກຳນົດ, ພັກພະລັງປະຊາຊົນກໍ່ຈະສາມາດຈັດຕັ້ງຄະນະລັດຖະບານປະສົມຫຼາຍພັກ,ແຕ່ຍ້ອນວ່າໃນຄະດີຮ້ອງ ຟ້ອງວ່າມີການສໍ້ໂກງໃນການເລືອກຕັ້ງຈຳນວນຫຼວງຫຼາຍ,ຄະຕິຮ້ອງຟ້ອງສ່ວນຫນຶ່ງອາດຈະພາໃຫ້ພັກການເມືອງບາງພັກເຊັ່ນພັກພະລັງປະຊາຊົນຖືກຍຸບໃນອະນາຄົດແລະກຳມະການບໍລິຫານງານຂອງພັກກໍ່ຈະຖືກຫ້າມບໍ່ໃຫ້ດຳເນີນການເມືອງ 5 ປີ,ສະພາບການເມືອງຂອງໄທໃນປີນີ້ຍັງບໍ່ແນ່ນອນ
|
|
