ຕາມ​ຂ່າວສານ​ຊິນ​ຮວາ: ວັນ​ທີ 13 ມັງກອນ​ນີ້ ການ​ເລືອກ​ຕັ້ງ​​​ເພີ່ມສະມາ​ຊິກ​ສະ​ພາ​ຜູ້​ແທນ​ລາ​ຊະ​ດອນ​ຂອງ​ໄທຮອບທຳ​ອິດ ທີ່​ຈັດ​ຂຶ້ນຢູ່​ເຂດ​ເລືອກ​ຕັ້ງທີ 3 ທີ່​ຈັງຫວັດ​ນະ​ຄອນ​ລາ​ຊະ​ສີ​ມາ ພາກ​ອີສານ​ຂອງ​ໄທ ​ໄດ້​ສຳ​ເລັດ​ລົງ​ຢ່າງ​ສະດວກ. ຕອນ​ຄ່ຳ​ມື້​ດຽວ​ກັນ, ສື່​ມວນ​ຊົນ​​ໄທໄດ້​ເປີດ​ເຜີຍ​ຜົນ​ການ​ນັບ​ບັດ​​ວ່າ, ຜູ້​ສະໝັກ​ຮັບ​ເລືອກ​ຕັ້ງ 3 ຄົນ​ທີ່​ຖືກ​ຄະ​ນະ​ກຳ​ມະ​ການ​ເລືອກ​ຕັ້ງຂອ​ງ​ໄທ​ອອກ​ບັດ​ເຫຼືອງ​ແລະຖອນ​ຄຸນ​ວຸດ​ທິສະມາຊິກ​ສະພາ​ຜູ້​ແທນ​ລາ​ຊະ​ດອນ​ຄືນ​​ໃນ​ການ​ເລືອກ​ຕັ້ງທົ່ວ​​ໄປ​ທີ່​ຈັດ​ຂຶ້ນ​ໃນ​ເດືອນ​ທັນວາ​ປີ​ກາຍ​ນີ້ ​ໄດ້​ຮັບ​ໄຊ​ຊະ​ນະ​ໃນ​ການ​ເລືອກ​ຕັ້ງຮອບ​ນີ້ອີກ.

ຕາມ​ຂ່າວ​ແຈ້ງວ່າ, 3 ຄົນ​ດັ່ງກ່າວ​ແມ່ນສະມາຊິກ​ພັກ​ພະລັງ​ປະຊາຊົນ​ທີ່​ສະ​ໜັບ​ສະ​ໜູນ​ທ່ານ​ທັກສິນ ຊິນນະ​ວັດ ອະດີດ​ນາຍົກລັດຖະມົນຕີ​ໄທ. ​ເມື່ອ​ຕົ້ນ​ເດືອນ​ມັງກອນ​ນີ້, ຄະ​ນະ​ກຳ​ມະ​ການ​ເລືອກ​ຕັ້ງຂອງ​ໄທ​ເຫັນ​ວ່າ 3 ຄົນ​ດັ່ງກ່າວມີ​ການ​ສໍ້​ໂກງ​ການ​ເລືອກ​ຕັ້ງ​ທົ່ວ​ໄປ​ທີ່​ຈັດ​ຂຶ້ນ​ໃນ​ວັນ​ທີ 23 ທັນວາ​ປີ​ກາຍ​ນີ້, ຈຶ່ງອອກ​ບັດ​ເຫຼືອງ​ໃຫ້​.

ກົດໝາຍ​ວ່າ​ດ້ວຍ​ການ​ເລືອກ​ຕັ້ງຂອງ​ໄທ​ໄດ້​ກຳນົດ​ໄວ້​ວ່າ, ຜູ້​ສະໝັກ​ຮັບ​ເລືອກ​ຕັ້ງ​ທີ່​​ຊະ​ນະ​ແຕ່​​ໄດ້ບັດ​ເຫຼືອງ ຍັງ​ສາມາດຕາງໜ້າ​ພັກ​ເດີມ​ເຂົ້າຮ່ວມ​ການ​ເລືອກ​ຕັ້ງ​ເພີ່ມ​ໄດ້, ​ສ່ວນ​ຜູ້​ທີ່​​ໄດ້​ບັດ​ແດງ​ນັ້ນ ຈະ​ບໍ່​ມີ​ສິດ​ເຂົ້າຮ່ວມ​ການ​ເລືອກ​ຕັ້ງ​ເພີ່ມ. ນັບ​ມາ​ຮອດ​ປັດ​ຈຸ​ບັນ, ຄະ​ນະ​ກຳ​ມະ​ການ​ເລືອກ​ຕັ້ງຂອງ​ໄທ​ໄດ້​ໃຫ້ບັດ​ເຫຼືອງ 18 ​ໃບ​ແລະ​ບັດ​ແດງ 7 ​ໃບ.