|
ອັງກິດຈັດງານມະໂຫລານວັດທະນະທຳຈີນທີ່ໃຫຍ່ທີ່ສຸດທີ່ມີຫົວຂໍ້ວ່າ "ຈີນໃນປະຈຸບັນ"
cri
Author: m
ຕາມຂ່າວສານຊິ່ນຮວາ: ວັນທີ 15 ມັງກອນນີ້, ອັງກິດເລີ່ມຈັດງານມະໂຫລານວັດທະນະທຳທີ່ມີຫົວຂໍ້ວ່າ "ຈີນໃນປະຈຸບັນ" ທີ່ມີຂະໜາດໃຫຍ່ກວ່າໝູ່ໃນປະຫວັດສາດ.
ມື້ດຽວກັນ, ໃນກອງປະຊຸມຂ່າວທີ່ຈັດຂຶ້ນຢູ່ນະຄອນຫຼວງລອນດອນ, ທ່ານໄຊມອນ ຮິວເລີ ຫົວໜ້າຄະນະກຳມະການຈັດງານດັ່ງກ່າວກ່າວວ່າ, ງານມະໂຫລານວັດທະນະທຳຈະດຳເນີນໄປເປັນເວລາ 6 ເດືອນນັບແຕ່ບຸນກຸດຈີນປີ 2008 ເປັນຕົ້ນໄປ, ຈົນຮອດມື້ໄຂງານກິລາໂອລິມປິກປັກກິ່ງ. ທ່ານກ່າວວ່າ, ໃນໄລຍະຈັດງານ, ຢູ່ແຫ່ງຕ່າງໆໃນທົ່ວປະເທດອັງກິດຈະຈັດກິດຈະກຳ 800 ກວ່າເທື່ອ, ສະແດງໂສມໜ້າອັນດີງາມຂອງສັງຄົມແລະວັດທະນະທຳຈີນໃນຍຸກປະຈຸບັນ, ເຮັດໃຫ້ປະຊາຊົນອັງກິດມີຄວາມເຂົ້າໃຈຕໍ່ຈີນເລິກເຊິ່ງກວ່າເກົ່າ, ແລະຊຸກຍູ້ການພົວພັນທີ່ມີໄມຕີຈິດຕໍ່ກັນລະຫວ່າງສອງປະເທດ.
ງານມະໂຫລານ "ຈີນໃນປະຈຸບັນ" ເທື່ອນີ້ມີວິສາຫະກິດອັງກິດເກືອບ 200 ແຫ່ງເຂົ້າຮ່ວມ. ເນື້ອໃນກວມເອົາຫຼາຍຂົງເຂດ, ເຊັ່ນ: ຮູບເງົາ, ລະຄອນ, ດົນຕີ, ການຟ້ອນລຳ, ວິທະຍາສາດເຕັກນິກ, ການຄ້າ, ການສຶກສາ, ແລະການກິນດື່ມເປັນຕົ້ນ.
|
|
