|
ຕາມຂ່າວ CRI: ວັນທີ 16 ມັງກອນນີ້, ພັກເພື່ອແຜ່ນດິນຂອງໄທໄດ້ຕົກລົງເຂົ້າຮ່ວມສະຫະພັນພັກການເມືອງປະກອບລັດຖະບານ ເຊິ່ງແມ່ນພັກພະລັງປະຊາຊົນເປັນຫົວໜ້າ.
ມື້ດຽວກັນ, ກອງປະຊຸມຄະນະບໍລິຫານງານພັກເພື່ອແຜ່ນດິນໄດ້ຈັດຂຶ້ນຢູ່ບາງກອກ. ຫຼັງກອງປະຊຸມ, ທ່ານສຸວິດ ຄຸນກິດຕິ ຫົວໜ້າພັກດັ່ງກ່າວໄດ້ເຜີຍຕໍ່ນັກຂ່າວວ່າ, ກອງປະຊຸມເທື່ອນີ້ໄດ້ຮັບຮອງເອົາມະຕິຢ່າງເປັນເອກະສັນ, ຕົກລົງເຂົ້າຮ່ວມສະຫະພັນພັກການເມືອງປະກອບລັດຖະບານ ເຊິ່ງແມ່ນພັກພະລັງປະຊາຊົນເປັນຫົວໜ້າ. ທ່ານກ່າວວ່າ,ຈະແຈ້ງການຕົກລົງຂອງພັກເພື່ອແຜ່ນດິນໃຫ້ພັກຊາດໄທຊາບ, ຄາດວ່າສອງພັກຈະຮ່ວມກັນປະກາດການຕົກລົງເຂົ້າຮ່ວມສະຫະພັນພັກການເມືອງປະກອບລັດຖະບານຢ່າງເປັນທາງການໃນວັນທີ 17 ມັງກອນນີ້.
ນັກວິເຄາະຊີ້ອອກວ່າ, ຄຽງຄູ່ກັບສອງພັກການເມືອງຂະໜາດກາງຄື ພັກຊາດໄທແລະພັກເພື່ອແຜ່ນດິນເຂົ້າຮ່ວມ, ສະຫະພັນພັກການເມືອງປະກອບລັດຖະບານ ຈະກວມທີ່ນັ່ງສ່ວນຫຼາຍທີ່ສຸດໃນສະພາຜູ້ແທນລາຊະດອນຊຸດໃໝ່. ພັກປະຊາທິປັດ ເຊິ່ງແມ່ນຄູ່ແຂ່ງຕົ້ນຕໍຂອງພັກພະລັງປະຊາຊົນ ອາດຈະກາຍເປັນພັກຝ່າຍຄ້ານພຽງພັກດຽວໃນສະພາຜູ້ແທນລາຊະດອນ.
|
