ຕາມ​ຂ່າວ cri:ວັນ​ທີ 28 ມັງກອນ​ນີ້ ສູນ​ລອຍນ້ຳ​ແຫ່ງ​ຊາດ​ຈີນ ຫລື​ສະຫນາມກິລາ​ກ້ອນ​ນ້ຳສີ່ຫລ່ຽມທີ່​ເປັນ​ສັນຍາ​ລັກ​ຫນຶ່ງ​ຂອງ​ງານ​ກິລາ​ໂອ​ລິ​ມປິກ​ປັກ​ກິ່ງ​ປີ 2008 ​ໄດ້​ສ້າງ​ສຳ​ເລັດ​ຢ່າງ​ເປັນ​ທາງ​ການ​,​ແລະ​ໃຊ້​ການ​ໄດ້​ແລ້ວ.

ສູນ​ລອຍ​ນ້ຳ​ແຫ່ງ​ຊາດ​ຈີນ​ຕັ້ງຢູ່​ພາກ​ໃຕ້​ຂອງ​ເຂດ​ໃຈກາງ​ສວນອຸທິຍານ​ໂອ​ລິ​ມປິກຂອງ​ນະຄອນຫລວງ​ປັກ​ກິ່ງ,ມີ​ເນື້ອ​ທີ່​ກວ້າງ​ເກືອບ 8 ​ຫມື່ນ​ຕາ​ແມັດ, ມີ​ທີ່​ນັ່ງ​ມາດຕະຖານ 1 ຫມື່ນ 7 ພັນ​ບ່ອນ.ສູນ​ລອຍ​ນ້ຳ​ແຫ່ງ​ຊາດ​ຈີນ​ມີ​​ໂຄງ​ປະກອບ​ເປັນ​ຄືຫມອນ​ທີ່​ເປົ່າ​ລົມ​ເຂົ້າ​ໃນ​ທີ່​ເຮັດ​ດ້ວຍ​ຢາງ ETFE, ​ແມ່ນ​​ໂຄງ​ປະກອບ​ຢາງ​ທີ່​ມີ​ເນື້ອ​ທີ່​ກວ້າງ​ກວ່າ​ຫມູ່​ແລະ​ສັບ​ສົນ​ກວ່າ​ຫມູ່​ໃນ​ໂລກ,​ໄດ້ສ້າງ​ມິ​ຕິ​ໃຫມ່​ໃນ​ຂົງ​ເຂດ​ການກໍ່ສ້າງ.

ສູນ​ລອຍ​ນ້ຳ​ແຫ່ງ​ຊາດ​ຈີນ​ຈະ​ຈັດ​ງານ​ແຂ່ງຂັນ​ຄັ້ງທຳ​ອິດ​​ໃນ​ວັນ​ທີ 31 ມັງກອນ​ນີ້ພາຍຫລັງ​ສ້າງ​ສຳ​ເລັດ​ຄື ການ​ແຂ່ງຂັນ​ລອຍ​ນ້ຳ​ຈີນ​ປີ 2008 ທີ່​ຊື່ວ່າ ​ໂຊກ​ດີ​ປັກ​ກິ່ງ.

​ໃນ​ໄລຍະ​ຈັດ​ງານ​ກິລາ​ໂອ​ລິ​ມປິກ,ສູນ​ລອຍ​ນ້ຳ​ແຫ່ງ​ຊາດ​ຈີນ​ຈະ​ຮັບຜິດ ຊອບ​ຈັດການ​ແຂ່ງຂັນ​ລອຍ​ນ້ຳ ​ໂດດ​ນ້ຳ​ແລະ​ລະບຳ​ນ້ຳ.