ຕາມຂ່າວສານຊິນຮວາ: ວັນທີ 3 ກຸມພານີ້, ອົງການກອງປະຊຸມອິສລາມ ຫຼື OIC ໄດ້ຈັດກອງປະຊຸມຂັ້ນລັດຖະມົນຕີກະຊວງການຕ່າງປະເທດສະໄໝວິສາມັນ ຢູ່ນະຄອນເຈດາ ເມືອງພາກຕາເວັນຕົກອາລາບີຊາອູດິດ, ເພື່ອປຶກສາຫາລືສະຖານະການກາຊາທີ່ນັບມື້ນັບຮ້າຍແຮງຂຶ້ນພາຍໃຕ້ການປິດລ້ອມຂອງອິສຣາແອນ, ຮຽກຮ້ອງໃຫ້ປະຊາຄົມໂລກເພີ່ມຄວາມແຮງໃນການສະໜັບສະໜູນປະຊາຊົນປາເລັສຕິນ.
ກອງປະຊຸມເທື່ອນີ້ຈັດຂຶ້ນມື້ໜຶ່ງ, ໄດ້ອອກຖະແຫຼງການໃນເວລາອັດປະຊຸມ ໂດຍກ່າວເນັ້ນວ່າ, ປະເທດອິສລາມສະໜັບສະໜູນປະຊາຊົນປາເລັສຕິນທຳການຕໍ່ສູ້ເພື່ອຍາດເອົາສິດອັນຊອບດ້ວຍກົດໝາຍຂອງຕົນຄືນມາ, ແລະໃຫ້ການສະໜັບສະໜູນໂດຍດ່ວນຕໍ່ປະຊາຊົນເຂດກາຊາ ໂດຍຜ່ານຈາກອົງການການເງິນ ເຊັ່ນ ທະນາຄານພັດທະນາອິສລາມເປັນຕົ້ນ, ເພື່ອຜ່ອນຄາຍການຂາດເຂີນອາຫານ ຢຸກຢາແລະວັດຖຸເຊື້ອໄຟອັນໜັກໜ່ວງຂອງທ້ອງຖິ່ນນັ້ນ.
ຖະແຫຼງການໄດ້ກ່າວປະນາມອິສຣາແອນທີ່ປິດລ້ອມເຂດກາຊາດ້ານເສດຖະກິດ ແລະປິດດ່ານ, ເຫັນວ່ານີ້ແມ່ນນະໂຍບາຍທີ່ລ່ວງລ້ຳກົດໝາຍລະຫວ່າງຊາດຢ່າງເປີດແປນ.
|