|
ຕາມຂ່າວສານຊິນຮວາ: ວັນທີ 3 ກຸມພານີ້, ຄະນະກຳມະການປະທານາທິບໍດີອີຣັກໄດ້ອອກຖະແຫຼງການວ່າ, ຍັດຕິກ່ຽວກັບການອະນຸມັດໃຫ້ສະມາຊິກພັກຟື້ນສັງຄົມບາອັດອາລັບ ເຊິ່ງແມ່ນພັກກຳອຳນາດຂອງອີຣັກໃນສະໄໝຊັດດາມ ດຳລົງຕຳແໜ່ງລັດຖະບານ ທີ່ສະພາແຫ່ງຊາດອີຣັກຮັບຮອງເອົາໃນເດືອນມັງກອນນັ້ນ ໄດ້ກາຍເປັນກົດໝາຍຢ່າງເປັນທາງການ.
ຖະແຫຼງການຊີ້ອອກວ່າ, ເນື່ອງຈາກຫຼາຍມາດຕາໃນຍັດຕິດັ່ງກ່າວມີຄວາມແຕກຕ່າງກັນໜ້ອຍໜຶ່ງກັບຄວາມເຫັນທີ່ບັນດາຝ່າຍໄດ້ຕົກລົງກັນກ່ອນໜ້ານີ້, ຄະນະກຳມະການປະທານາທິບໍດີຈະສະເໜີຍັດຕິດັດແກ້ຕໍ່ສະພາແຫ່ງຊາດ.
ອີງຕາມລັດຖະທຳມະນູນອີຣັກ, ກົດໝາຍທີ່ສະພາແຫ່ງຊາດຮັບຮອງເອົານັ້ນ ຕ້ອງໄດ້ຮັບການອະນຸມັດຈາກຄະນະກຳມະການປະທານາທິບໍດີກ່ອນ ແລ້ວຈຶ່ງມີຜົນບັງຄັບໃຊ້. ປັດຈຸບັນ ຄະນະກຳມະການປະທານາທິບໍດີອີຣັກປະກອບດ້ວຍທ່ານຈາລານ ທາລາບານີ ປະທານາທິບໍດີ ທ່ານໂມຮາເມັດ ຮາເຊມີ ຮອງປະທານາທິບໍດີທີ່ສັງກັດນິກາຍຊຸນນິດ ແລະທ່ານອາດິວ ອາບດຸນ ເມຮ໌ດີ ຮອງປະທານາທິບໍດີທີ່ສັງກັດນິກາຍຊີອະ. ໃນນັ້ນ, ກ່ອນໜ້ານີ້ ທ່ານຮອງປະທານາທິບໍດີຮາເຊມີເຄີຍກ່າວວ່າຈະບໍ່ອະນຸມັດຍັດຕິດັ່ງກ່າວ ຍ້ອນຍັດຕິຫ້າມບໍ່ໃຫ້ສະມາຊິກຂັ້ນສູງຂອງອະດີດພັກຟື້ນສັງຄົມບາອັດອາລັບດຳລົງຕຳແໜ່ງລັດຖະບານ.
|
