|
ຕາມຂ່າວສານຊິນຮວາ: ວັນທີ 10 ກຸມພານີ້, ສູນບັນຊາການສຸກເສີນກ່ຽວກັບຖ່ານຫີນໄຟຟ້ານ້ຳມັນເຊື້ອໄຟ ການຂົນສົ່ງ ແລະ ການຕ້ານໄພກູ້ໄພຂອງລັດຖະບານຈີນໄດ້ຈັດກອງປະຊຸມ, ເພື່ອຈັດວາງວຽກງານຂົນສົ່ງຫຼັງບຸນກຸດຈີນ.
ກອງປະຊຸມຊີ້ອອກວ່າ, ໄລຍະພັກໃນຍາມບຸນກຸດຈີນໃກ້ຈະສິ້ນສຸດລົງແລ້ວ, ກະແສຜູ້ໂດຍສານທີ່ກັບໄປເຮັດວຽກກໍໃກ້ຈະມາເຖິງ, ທົ່ວສະພາບການຂົນສົ່ງຍັງຂ້ຽວຂາດຢູ່ຄືເກົ່າ. ກອງປະຊຸມຮຽກຮ້ອງໃຫ້ພາກສ່ວນທີ່ກ່ຽວຂ້ອງຕ້ອງເອົາໃຈໃສ່ນຳສະພາບການປ່ຽນແປງຂອງອາກາດຢ່າງໃກ້ຊິດ, ເພື່ອວາງແຜນຮັບມືສຸກເສີນພາຍໃຕ້ສະພາບອາກາດຮ້າຍແຮງ, ຮັບປະກັນໃຫ້ເສັ້ນທາງບໍ່ມີລົດຕິດ; ຕ້ອງອີງຕາມຈຳນວນຜູ້ໂດຍສານ ຍາມໃດມີຫຼາຍກວ່າໝູ່ແລະຈະໄປທາງໃດ, ເພີ່ມພາຫະນະຂົນສົ່ງ ເຊັ່ນ ລົດແລະກ່ຳປັ່ນເປັນຕົ້ນຢ່າງເໝາະສົມ, ສະຖານີທີ່ມີເງື່ອນໄຂ ຕ້ອງເປີດການບໍລິການຂະບວນລົດສະເພາະນັກຮຽນນັກສຶກສາແລະຊາວກະສິກອນທີ່ໄປເຮັດວຽກຢູ່ໃນຕົວເມືອງ; ຕ້ອງປະກາດສະພາບອາກາດ ສະພາບເສັ້ນທາງຕໍ່ທົ່ວສັງຄົມຢ່າງທັນການ, ໃຫ້ຜູ້ໂດຍສານສາມາດຄັດເລືອກແລະປ່ຽນແປງວິທີແລະເວລາອອກເດີນທາງຢ່າງເໝາະສົມ; ໃນຂະນະທີ່ຮັບປະກັນການຂົນສົ່ງຜູ້ໂດຍສານນັ້ນ, ກໍຮັບປະກັນການຂົນສົ່ງເຄື່ອງໃຊ້ປະຈຳວັນແລະວັດສະດຸສ້າງສາຄືນໃໝ່ຫຼັງໄພທຳມະຊາດຂອງປະຊາຊົນໃນເຂດປະສົບໄພ.
|
