ທີ່ນີ້, ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ໂຄລົບ, ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນເຊິ່ງເປັນອົງການອຳນາດແຫ່ງຊາດສູງສຸດຂອງຈີນຈະໄຂຂຶ້ນຢູ່ປັກກິ່ງໃນວັນທີ5ມີນານີ້, ໃນລາຍການສຸມໜ້າກ້ອງໃສ່ກອງປະຊຸມສອງສະພາມື້ນີ້, ພວກເຮົາຈະແນະນຳລະບອບສະພາປະຊາຊົນເຊິ່ງເປັນລະບອບການເມືອງພື້ນຖານຂອງຈີນສູ່ທ່ານຟັງ.
ໃນ10ປີກ່ອນ, ນາງຫູສິວແຢ້ນທີ່ອາຍຸ34ປີໄດ້ຈາກແຂວງເຊສວນ ເຊິ່ງເປັນແຂວງທີ່ມີປະຊາກອນຫຼາຍກວ່າໝູ່ຂອງຈີນໄປເຮັດວຽກຢູ່ແຂວງກວງຕົ້ງ ທີ່ຢູ່ແຖວໜ້າແຫ່ງການປະຕິຮູບແລະໄຂປະຕູສູ່ພາຍນອກຂອງຈີນ, ໂດຍຜ່ານຈາກຄວາມພະຍາຍາມຂອງຕົນ, ດຽວນີ້, ນາງແມ່ນຫົວໜ້າຂອງຫ້ອງຈັກຂອງໂຮງງານເຄື່ອງປັ້ນດິນເຜົາແຫ່ງໜຶ່ງຢູ່ເມືອງໂຝຊ່ານແຂວງກວງຕົ້ງ. ໃນຫຼາຍມື້ມານີ້, ໃນຖານະເປັນຜູ້ແທນສະພາປະຊາຊົນແຫ່ງຊາດຈີນທີ່ເປັນກຳມະກອນທີ່ມາຈາກຊົນນະບົດທີ່ໄດ້ຮັບເລືອກຕັ້ງເປັນງວດທຳອິດຂອງຈີນ, ນາງພວມຂຸ້ນນຳການເກັບໂຮມຄວາມເຫັນແລະຂໍ້ສະເໜີຂອງກຳມະກອນທັງຫຼາຍ.
ປະຈຸບັນ, ຈີນມີປະຊາກອນ150ລ້ານຄົນຄືກັນກັບນາງຫູສິວແຢ້ນ, ເດີນທາງອອກຈາກຊົນນະບົດ, ໄປຊອກວຽກເຮັດງານທຳຢູ່ໃນຕົວເມືອງ. ກຸ່ມຄົນດັ່ງກ່າວທີ່ຖືກຄົນທັງຫຼາຍເອີ້ນເປັນກຳມະກອນທີ່ມາຈາກຊົນນະບົດເຫຼົ່ານີ້ໄດ້ລື່ນກາຍ1ສ່ວນ10ຂອງປະຊາກອນຈີນ. ວັນທີ5ມີນານີ້, ນາງຫູສິວແຢ້ນຈະພ້ອມກັນກັບຜູ້ແທນຂອງສະພາປະຊາຊົນແຫ່ງຊາດຈີນຊຸດໃໝ່ເກືອບ3ພັນຄົນ, ໄປເຂົ້າຮ່ວມກອງປະຊຸມສະພາປະຊາຊົນແຫ່ງຊາດຈີນທີ່ຈັດຂຶ້ນຢູ່ປັກກິ່ງ, ທັງນີ້ໝາຍຄວາມວ່າກຳມະກອນທີ່ມາຈາກຊົນນະບົດ ເຊິ່ງເປັນກຸ່ມຄົນພິເສດດັ່ງກ່າວຈະປະກອບຄຳຄິດຄຳເຫັນຂອງຕົນເປັນຄັ້ງທຳອິດໃນອົງການອຳນາດແຫ່ງຊາດສູງສຸດຂອງຈີນ.
ລັດຖະທຳມະນູນຂອງຈີນກຳນົດໄວ້ວ່າອຳນາດທຸກຢ່າງຂອງລັດເປັນຂອງປະຊາຊົນ,ອົງການປະຊາຊົນທີ່ໃຊ້ອຳນາດຂອງລັດແມ່ນສະພາປະຊາຊົນແຫ່ງຊາດແລະສະພາປະຊາຊົນທຸກຂັ້ນຂອງທ້ອງຖິ່ນ.ສະມາຊິກຂອງສະພາປະຊາຊົນແຫ່ງຊາດກໍແມ່ນຜູ່ແທນຂອງສະພາປະຊາຊົນ,ແມ່ນກຳເນີດຂຶ້ນໂດຍຜ່ານການເລືອກຕັ້ງແບບປະຊາທິປະໄຕ,ຮັບຜິດຊອບຕໍ່ປະຊາຊົນ,ຮັບການຕິດຕາມກວດກາຂອງປະຊາຊົນ.ນີ້ກໍແມ່ນເຊິ່ງເປັນລະບອບສະພາປະຊາຊົນເຊິ່ງເປັນລະບອບການເມືອງພື້ນຖານຂອງຈີນ.
ຈາກນີ້ກໍເຫັນໄດ້ວ່າ,ທາດແທ້ຂອງລະບອບສະພາປະຊາຊົນກໍ່ແມ່ນໃຫ້ປະຊາຊົນເປັນເຈົ້າບ້ານເມືອງ.ພາຍໃຕ້ລະບອບດັ່ງກ່າວ, ອຳນາດທັງໝົດຂອງລັດໄດ້ກຳຢູ່ໃນມືຂອງປະຊາຊົນໃນທີ່ສຸດ.ແຕ່ວ່າ,ມີຜູ່ຟັງບາງຄົນອາດຈະຖາມວ່າ,ຈີນມີປະຊາກອນຫຼາຍປານນີ້,ເຮັດແນວໃດຈິ່ງສາມາດເຮັດໃຫ້ປະຊາຊົນຈີນ1ຕື້300ລ້ານຄົນໃຊ້ອຳນາດເປັນເຈົ້າບ້ານເມືອງຢ່າງແທ້ຈິງ?ຕໍ່ໄປຈະຄ່ອຍໆເວົ້າສູ່ທ່ານຟັງ:ຜູ່ແທນສະພາປະຊາຊົນທີ່ສະພາປະຊາຊົນຈີນເລືອກຕັ້ງນັ້ນມີພື້ນຖານມວນຊົນອັນກວ້າງຂວາງຊຶ່ງລວມທັງບຸກຄົນທຸກຊັ້ນວັນນະ,ທຸກທ້ອງຖິ່ນ,ທຸກຊົນເຜົ່າ,ທຸກໆຝ່າຍ.ພາຍໃຕ້ສພາບທີ່ປະຊາຊົນເຂົ້າຮ່ວມຢ່າງເຕັມທີ່,ຮູບການຈັດຕັ້ງແບບສະພາປະຊາຊົນສາມາດໂຮມສູນຜົນປະໂຫຍດຮ່ວມຂອງຊັ້ນຄົນຕ່າງກັນພາຍໃນໝູ່ປະຊາຊົນ,ທັງສາມາດສ່ອງແສງແລະປະສານງານຜົນປະໂຫຍດພິເສດຂອງຝ່າຍຕ່າງໆ,ເຮັດໃຫ້ແຕ່ລະຊັ້ນຄົນຂອງສັງຄົມລ້ວນແຕ່ມີໂຄສົກການເມືອງຂອງຕົນ.ນາງຫູສຽວອ້ຽນທີ່ກ່າວມາເມື່ອກີ້ນີ້ກໍ່ໄດ້ຕາງໜ້າໃຫ້ແກ່ຜົນປະໂຫຍດຂອງ" ຊາວນາທີ່ໄປເຮັດວຽກຢູ່ໃນເມືອງ"ເຊິ່ງເປັນຊຸມຊົນພິເສດທີ່ມີຂຶ້ນໃໝ່.
"ປະຊາຊົນເລືອກຂ້າພະເຈົ້າເປັນຜູ້ແທນ ຂ້າພະເຈົ້າກໍຕ້ອງເປັນຜູ້ແທນທີ່ຮັບໃຊ້ປະຊາຊົນ", ໃນເວລາສະຫຼຸບວຽກງານຂອງຜູ້ແທນຂອງສະພາປະຊາຊົນແຫ່ງຊາດຈີນສະໄໝທີ10, ທ່ານອູປາງກົວ ປະທານສະພາປະຊາຊົນແຫ່ງຊາດຈີນກ່າວວ່າ, ໃນ5ປີມານີ້, ພວກຂ້າພະເຈົ້າໄດ້ສຳຫຼວດກວດກາຍັດຕິຂອງຜູ້ແທນ3772ຂໍ້, ຂໍ້ສະເໜີຂອງຜູ້ແທນ2ໝື່ນ9ພັນກວ່າຂໍ້, ສິດຮັບຮູ້ຄວາມຈິງຂອງຜູ້ແທນໄດ້ຮັບການຮັບປະກັນ, ຄູນນະພາບແຫ່ງການສຳຫຼວດກວດກາຍັດຕິແລະຂໍ້ສະເໜີຂອງຜູ້ແທນໄດ້ສູງຂຶ້ນຢ່າງເດັ່ນຊັດ, ຜູ້ແທນໄດ້ເສີມຂະຫຍາຍບົດບາດຫຼາຍຂຶ້ນຕື່ມອີກ.
ສະພາປະຊາຊົນແຫ່ງຊາດຈີນແຕ່ລະຊຸດມີອາຍຸການ5ປີ, ແຕ່ລະປີຈະຈັດກອງປະຊຸມປະຈຳຄັ້ງໜຶ່ງ. ກອງປະຊຸມປະຈຳປີທີ່ຈະໄຂຂຶ້ນຢູ່ນະຄອນຫຼວງປັກກິ່ງໃນວັນທີ5ມີນາແມ່ນກອງປະຊຸມເທື່ອທຳອິດຂອງສະພາປະຊາຊົນແຫງຊາດຈີນຊຸດໃໝ່, ຈະໄຂເປັນເວລາປະມານສອງອາທິດ. ໃນກອງປະຊຸມ, ຜູ້ແທນທັງຫຼາຍຈະຮັບຟັງແລະພິຈາລະນາບົດລາຍງານວຽກງານ ພິຈາລະນາແລະອະນຸມັດບົດລາຍງານກ່ຽວກັບແຜນພັດທະນາເສດຖະກິດແຫ່ງຊາດແລະສັງຄົມພ້ອມດ້ວຍບົດລາຍງານງົບປະມານຂອງສູນກາງແລະທ້ອງຖິ່ນ, ນອກນັ້ນ, ໃນກອງປະຊຸມເທື່ອນີ້, ຍັງຈະດຳເນີນວາລະປະຊຸມອັນສຳຄັນສອງຢ່າງ, ຄືເລືອກຕັ້ງແລະຕົກລົງຜູ້ນຳຂອງອົງການຈັດຕັ້ງແຫ່ງລັດຖະບານຊຸດໃໝ່, ພິຈາລະນາແຜນການປະຕິຮູບຄະນະລັດຖະບານ.
|