|
ສະບາຍດີທ່ານຜູ້ຟັງຍິນດີຕ້ອນຮັບທ່ານເຂົ້າສູ່ລາຍການວັດທະນະທຳຈີນ. ມື້ນີ້ຈະແນະນຳນາງເຈິ້ງຊີ້ລານ ນັກຮ້ອງຊື່ດັງຂອງຈີນ. ເມື່ອຊຸມປີ1980, ຈີນຫາກໍ່ປະຕິບັດການປະຕິຮູບແລະໄຂປະຕູສູ່ພາຍນອກ, ນາງໄດ້ຮັບຊື່ສຽງດົ່ງດັງໃນທົ່ວປະເທດຍ້ອນການສະແດງທີ່ອ່ອນຫວານ. ເຖິງວ່າຊີວິດການເປັນຢູ່ຈະລຳບາກຫຼາຍກໍ່ຕາມ, ແຕ່ນາງກໍຍັງສາມາດຮັກສາການດຳລົງຊີວິດທີ່ລຽບງ່າຍແລະມີພະລັງຊີວິດ. ຕໍ່ໄປເຊີນຟັງລາຍລະອຽດ.
ໃນຍາມບຸນກຸດຈີນທີ່ບໍ່ດົນມານີ້, ນາງເຈິ້ງຊີ້ລານໄດ້ຈັດງານຄອນເຊິດບຸກຄົນເລື່ອງ"ຫວນຄືນອະດີດ"ຢູ່ທີ່ນະຄອນຫຼວງປັກກິ່ງເພື່ອລະລຶກສະແດງຄົບຮອບ30ປີແລ້ວ. ເພງທີ່ທ່ານຟັງມານັ້ນກໍ່ແມ່ນເພງທຳອິດທີ່ສ້າງຊື່ສຽງໃຫ້ແກ່ນາງ.
ເມື່ອຟັງເພງນິຍົມໃນຫຼາຍສິບປີກ່ອນອີກແລ້ວ, ທ່ານຈ່າງຮ້ານຈົ່ງ ຜູ້ຟັງຜູ້ໜຶ່ງຮູ້ສຶກຕື່ນເຕັ້ນໃຈຫຼາຍ. ທ່ານເວົ້າວ່າ, ສຽງເພງຂອງນາງເຈິ້ງຊີ້ລານເຄີຍສົ່ງຜົນສະທ້ອນຢ່າງເລິກເຊິ່ງໃຫ້ຄົນທີ່ມີອາຍຸສູງກວ່າ50ປີເຫຼົ່ານີ້, ສະນັ້ນທ່ານເອງກໍໄດ້ກາຍເປັນເພື່ອນມິດກັບນາງເຈິ້ງຊີ້ລານ. ທ່ານເວົ້າວ່າ,
ໃນເວລານັ້ນ, ພໍຟັງເພງອ່ອນຊອນແບບນີ້ຂອງນາງ, ຄົນທັງຫຼາຍກໍມັກໂລດ, ມີຄວາມຮູ້ສຶກໃໝ່ອ່ຽມ, ຈັບໃຈຫຼາຍ. ໂດຍສະເພາະແມ່ນມູ້ຢາງສູ ເພງລ້ຽງແບ້ ເຊິ່ງແມ່ນເພງຫົວຂໍ້ຂອງລະຄອນໂທລະພາບ ວັດຊ້າວລິນ, ແລະຍັງມີເພງ ໄທ້ຢາງຕາວຊ້າງ ແປວ່າ ຢູ່ເທິງເກາະຕາເວັນ, ຫຼາຍຄົນຟັງແລ້ວກໍ່ໄປທ່ຽວເກາະຕາເວັນເປັນສະເພາະ.
ປີ1977, ນາງເຈິ້ງລີ້ລານທີ່ພວມຮຽນຢູ່ໂຮງຮຽນມັດທະຍົມປາຍໄດ້ເຂົ້າໃນກອງສິລະປະຕົ່ງຟ່າງ, ຈາກນັ້ນຫຼາຍປີນາງກໍ່ແມ່ນໜຶ່ງໃນນັກສະແດງຊື່ດັງກວ່າໝູ່ໃນກອງສິລະປະຕົ່ງຟ່າງ. ນາງຫວນຄືນວ່າ, ເມື່ອປີ1979ນາງຫາກໍ່ເລີ່ມການສະແດງ, ກໍໂຊກດີທີ່ໄດ້ໂອກາດຮ້ອງເພງ ໄທ້ຢາງຕາວຊ້າງ, ເພງນີ້ແມ່ນເພງທີ່ພັນລະນາທິວທັດສວຍງາມຂອງເກາະຕາເວັນທີ່ເມືອງຮາບິນພາກຕາເວັນອອກສຽງເໜືອຂອງຈີນ. ຫຼັງຈາກເພງນີ້ກະຈາຍອອກມາ, ກໍ່ໄດ້ຈັບໃຈຄົນທັງຫຼາຍໂລດ, ແລະຍັງໄດ້ປະກວດເປັນໜຶ່ງໃນ15ເພງວິທະຍຸທີ່ດີເດັ່ນ, ຕໍ່ມາຍັງໄດ້ຮັບລາງວັນແຜ່ນສຽງຄຳຄັ້ງທຳອິດຂອງຈີນ. ນາງເຈິ້ງຊີ້ລານຖືຜົນສຳເລັດເຫຼົ່ານີ້ຢູ່ນຳໂຊກດີ. ນາງເວົ້າວ່າ,
ໃນຫຼາຍປີທຳອິດຈັ່ງແມ່ນໂຊກດີທີ່ໄດ້ໂອກາດດີແນວນີ້, ຄືໃຫ້ຂ້ອນໄປອັດເພງ ໄທ້ຢາງຕາວຊ້າງ. ບໍ່ດົນຜູ້ຊົມໃນທົ່ວປະເທດກໍ່ໄດ້ມັກເພງນີ້ແລ້ວ, ສະເນັ້ນຂ້ອຍຮູ້ສຶກວ່າຈັ່ງແມ່ນໂຊກດີເນາະ, ຈາກນັ້ນມາກໍ່ຄິດວ່າ, ມີໂຊກດີແນວນີ້ກໍ່ຕ້ອງທຳຄວາມພະຍາຍາມຫຼາຍກວ່າເກົ່າ, ແລະທະນຸຖະໜອມຄວາມຍ້ອງຍໍທີ່ຫາຍາກ.
ເພງທີ່ຟັງມານັ້ນແມ່ນເພງຫົວຂໍ້ໃນລະຄອນໂທລະພາບວັດຊ້າວລິນ. ເມື່ອມີຊື່ສຽງດົ່ງດັງແລ້ວ, ນາງເຈິ້ງຊີ້ລານໄດ້ຮ້ອງອີກຫຼາຍເພງ, ແລະມີຮູບການສະແດງພິເສດຢູ່ເທິງເວທີ. ນາງເຄີຍໄປໄທ ຟິລິບປິນແລະມາເລເຊຍເພື່ອຮ່ຳຮຽນດົນຕີພື້ນເມືອງຢູ່ແຫ່ງຕ່າງໆ, ຕອນທຳອິດບໍ່ຮູ້ພາສາຈັກເມັດ, ແຕ່ສຸດທ້າຍສະແດງຢູ່ເທິງເວທີແລ້ວຜູ້ຊົມພັດຖືວ່ານາງເປັນນັກສະແດງຂອງປະເທດຕົນ. ກໍ່ຄືແນວນີ້ນາງໄດ້ຮຽນວິທີການຮ້ອງແລະການສະແດງຢ່າງບໍ່ຢຸດຢັ້ງ, ແລະອັດເພງໃໝ່ ສະແດງຢູ່ປະເທດແລະເຂດແຄວ້ນຕ່າງໆ, ຊີວິດແນວນີ້ໄດ້ແກ່ຍາວຫຼາຍປີ.
ນັບແຕ່ປີ1989, ນາງເຈິ້ງຊີ້ລານໄດ້ດຳລົງຊີວິດຢູ່ອາເມລິກາເປັນເວລາ6ປີ. ໃນເວລານັ້ນ, ຈຸດສຸມຂອງນາງກໍ່ແມ່ນລ້ຽງລູກແລະຄ່ອຍໆລາອອກຈາກວົງດົນຕີ. ໃນໄລຍະນັ້ນ, ນາງເປັນພະຍາດນອນຢູ່ໂຮງໝໍ, ແລະໄດ້ຜ່າຕັດສອງເທື່ອ. ຫຼັງຈາກການຜ່າຕັດເທື່ອທີສອງ, ກໍມີຂ່າວຮ້າຍອີກອັນໜຶ່ງວ່າຄູ່ຮັກຂອງນາງເປັນພະຍາດມະເຮັງແລະນອນໂຮງໝໍເຊັ່ນກັນ. ທຸກໆມື້ນາງໄປຢູ່ອ້ອມຂ້າງຄູ່ຮັກເພື່ອກ່ອມອາລົມໃຈຈົນຮອດນາທີສຸດທ້າຍໃນຊີວິດຂອງຄູ່ຮັກ. ເມື່ອປະສົບຄວາມເຈັບປວດແລະການເສຍຊີວິດຂອງຄູ່ຮັກ, ນາງເຈິ້ງຊີ້ລານເສົ້າສະຫຼົດໃຈທີ່ສຸດ, ທັງປະກົດເຫັນວ່າຕົນເອງເປັນຄົນໃຈເຂັ້ມແຂງ.
ປະສົບການຍາກລຳບາກປານນີ້, ຄົນອື່ນອາດຈະອົດທົນບໍ່ໄດ້ແລ້ວ, ແຕ່ນາງເຈິ້ງຊີ້ລານພັດຜ່ານຜ່າໄປໝົດ, ແລະຍັງຖືວ່າຕົນເອງໂຊກດີຫຼາຍ, ຈຶ່ງໄດ້ໂອກາດສະແດງຢູ່ເທິງເວທີຄືເກົ່າ. ຫຼັງຈາກຄວາມທໍລະຫົດອົດທົນຄວາມລຳບາກແລ້ວ, ນາງເຫັນວ່າຊີວິດຂອງຕົນກໍ່ແມ່ນເກີດເພື່ອດົນຕີ.
ກໍ່ຄືໃນເພງນີ້ບິນແມ້ ນົກກາງແກ ຮ້ອງວ່າ, "ກະແສລົມ, ທົດສອບຈິດໃຈຂອງເຈົ້າ, ນ້ຳຝົນເຊາະແຊ່ປີກຂອງເຈົ້າ. ບິນແມ້, ນົກກາງແກທີ່ໜ້າຮັກ, ຜ່ານລົມຝົນແລ້ວເຈົ້າຈຶ່ງຈະເຂັ້ມແຂງ" ຫຼັງຈາກອົດທົນຄວາມລຳບາກແລ້ວ, ນາງເຈິ້ງຊີ້ລານຍິ່ງໃຈເຂັ້ມແຂງກວ່າເກົ່າ, ແລະສະແດງຢູ່ໜ້າຜູ້ຊົມຈີນຄືນໃໝ່, ສຽງເພງຂອງນາງຍັງມ່ວນຫູອອນຊອນໃຈຄືເກົ່າ. ປີ1999, ນັກດົນຕີຊາວຈີນຜູ້ໜຶ່ງຂອງສິງກະໂປຈັດເອົາຫຼາຍເພງຂອງທີ່ຮ້ອງໂດຍນາງເຈິ້ງຊີ້ລານຂຶ້ນສູ່ເວທີ, ພໍອອກອາກາດກໍໄດ້ຮັບຄວາມນິຍົມຊົມຊອບຢ່າງກວ້າງຂວາງ. ນາງເຈິ້ງຊີ້ລານຫວນຄືນວ່າ,
ນັກດົນຕີຊາວຈີນຜູ້ໜຶ່ງຢູ່ສິງກະໂປມັກດົນຕີໃນລະຄອນໂທລະພາບ, ຫົວຄິດປະດິດສ້າງຂອງເພິ່ນແມ່ນເອົາດົນຕີທັງໝົດກ່ຽວກັບມາສະແດງຢູ່ເທິງເວທີ, ລວມມີດົນຕີເສບກັບເພງ10ກວ່າເພງ, ພວກເຮົາໄດ້ລອງເຮັດຕາມຄວາມເຫັນຂອງເພິ່ນຢູ່ສິງກະໂປ, ບໍ່ນຶກບໍ່ຝັນວ່າໄດ້ຮັບສຽງຕອບຢ່າງຫຼວງຫຼາຍ, ຕໍ່ຈາກນັ້ນກໍໄດ້ສະແດງໂດຍຕະຫຼອດ, ຈົນຮອດປະຈຸບັນຍັງສະແດງຢູ່, ໄດ້ສະແດງ80ກວ່າຮອບຢູ່ຫຼາຍຕົວເມືອງ.
ບໍ່ວ່າຢູ່ເອີລົບຫຼືອາເມລິກາເໜືອ, ຖ້າວ່າຢູ່ບ່ອນທີ່ມີຊາວຈີນ, ເພງທີ່ຮ້ອງໂດຍນາງເຈິ້ງຊີ້ລານກໍຈະໄດ້ຮັບຄວາມນິຍົມ. ນາງກໍບໍ່ເຄີຍຢຸດບາດກ້າວທີ່ຊອກຄົ້ນດົນຕີ. ນາງໄດ້ແຕ່ງເພງໃໝ່ຫຼາຍເພງ, ເຖິງວ່ານັກຮ້ອງນ້ອງໃໝ່ກຳເນີດຂຶ້ນຢ່າງຕໍ່ເນື່ອງກໍຕາມ, ແຕ່ຜູ້ຟັງເກົ່າຈຳນວນຫຼວງຫຼາຍຍັງເອົາໃຈໃສ່ແລະມັກເພງຂອງນາງ, ແລະຮັບຮູ້ເນື້ອໃນຫຼາຍນອກຈາກດົນຕີໃນສຽງເພງຂອງນາງ
|
