|
|
 |
| (GMT+08:00)
2008-03-05 16:07:32
|
 |
|
ວຽກງານລັດຖະບານຮັບປະກັນໃຫ້ປະຊາຊົນໄດ້ຊົມໃຊ້ໝາກຜົນຂອງການພັດທະນາ
cri
Author: mo
ໃນກອງປະຊຸມປະຈຳປີເທື່ອທີໜຶ່ງຂອງສະພາຜູ້ແທນປະຊາຊົນແຫ່ງຊາດຈີນຊຸດໃໝ່ທີ່ຈັດຂຶ້ນໃນວັນທີ 5 ມີນານີ້, ທ່ານເວີ່ນເຈຍປາວ ນາຍົກລັດຖະມົນຕີຈີນໄດ້ຕາງໜ້າລັດຖະບານຊຸດນີ້ທີ່ໃກ້ຈະໝົດອາຍຸໃນໄວໆນີ້ລາຍງານວຽກງານຂອງລັດຖະບານ.
ເດືອນມີນາປີ 2003, ທ່ານເວີ່ນເຈຍປາວ ໄດ້ຮັບການແຕ່ງຕັ້ງເປັນນາຍົກລັດຖະມົນຕີ. ເມື່ອຫວນຄືນວຽກງານລັດຖະບານໃນ 5 ປີຜ່ານມາ, ທ່ານເວີ່ນເຈຍປາວບໍ່ໄດ້ກ່າວເຖິງການເຕີບໂຕຂອງເສດຖະກິດແລະຜົນງານຕ່າງໆກ່ອນ, ແຕ່ທ່ານໄດ້ຈັດເອົາໄຊຊະນະຕໍ່ພະຍາດອັກເສບປອດຮຸນແຮງຫຼືຊາສ໌ທີ່ເກີດຂຶ້ນກະທັນຫັນແລະໄພທຳມະຊາດຄັ້ງໃຫຍ່ເຊັ່ນຫິມະແລະນ້ຳກ້າມທີ່ບໍ່ຄ່ອຍມີໃນປະຫວັດສາດນັ້ນຂຽນຢູ່ໃນບ່ອນພົ້ນເດັ່ນກວ່າໝູ່ຄືໜ້າທຳອິດແລະຕອນທຳອິດຂອງບົດລາຍງານ.
ຜູ້ແທນສະພາປະຊາຊົນຫຼາຍທ່ານເຫັນວ່າ, ຂໍ້ປີກຍ່ອຍດັ່ງກ່າວນີ້ສະແດງໃຫ້ເຫັນວ່າ ລັດຖະບານເນັ້ນໜັກຫຼາຍຕໍ່ຜົນປະໂຫຍດຂອງປະຊາຊົນ. ທ່ານວາງໂສວປິ່ນ ຜູ້ແທນແຂວງລຽວນິງ ພາກເໜືອຂອງຈີນໄດ້ສະແດງທັດສະນະຂອງຕົນຕໍ່ນັກຂ່າວCRIວ່າ:
"ລັດຖະບານຊຸດນີ້ຫາກໍ່ຂຶ້ນຮັບຕຳແໜ່ງ, ກໍ່ໄດ້ປະເຊີນໜ້າກັບພະຍາດຊາສ໌ທີ່ບໍ່ຄ່ອຍເກີດຂຶ້ນ, ໂດຍສະເພາະແມ່ນໄພຫິມະທີ່ຫາກໍ່ຜ່ານໄປນີ້, ຂ້າພະເຈົ້າຮູ້ສຶກວ່າ, ໄພພິບັດເທື່ອນີ້ເກີດຢູ່ປະເທດໃດ, ກໍ່ຄົງຈະບໍ່ສາມາດແກ້ໄຂໄດ້ດີຄືປະເທດເຮົາ, ນີ້ກໍ່ໄດ້ຢັ້ງຢືນໃຫ້ເຫັນວ່າ, ລັດຖະບານຊຸດນີ້ປົກຄອງໄດ້ດີຫຼາຍ, ເອົາໃຈໃສ່ນຳຊີວິດການເປັນຢູ່ຂອງປະຊາຊົນ".
"ໄພຫິມະ"ທີ່ຜູ້ແທນຕ່າງໆກ່າວເຖິງນັ້ນ ກໍ່ແມ່ນພາຍຸຫິມະທີ່ 50 ປີຈຶ່ງເກີດຂຶ້ນເທື່ອໜຶ່ງໃນ 10 ກວ່າເຂດແຂວງພາກໃຕ້ຂອງຈີນໃນເດືອນມັງກອນປີນີ້. ໃນບົດລາຍງານວຽກງານຂອງລັດຖະບານ, ທ່ານເວີ່ນເຈຍປາວບໍ່ພຽງແຕ່ສະເໜີໃຫ້ລັດຖະບານຊຸດໃໝ່ສືບຕໍ່ເຮັດວຽກສ້າງສາຄືນໃໝ່ຫຼັງໄພພິບັດໃຫ້ດີ, ຍັງໄດ້ສະເໜີໃຫ້ຖອດຖອນບົດຮຽນທາງລົບເພີ່ມທະວີການສ້າງກົນໄກຮັບມືສຸກເສີນ.
ທ່ານເວີ່ນເຈຍປາວໄດ້ສະຫຼຸບຜົນງານແຫ່ງການພັດທະນາເສດຖະກິດສັງຄົມຈີນໃນ 5 ປີຜ່ານມາໂດຍຫຍໍ້ເຊັ່ນ: GDP ເພີ່ມຂຶ້ນ 10,6% ຕໍ່ປີ, ປະຊາກອນຜູ້ທຸກຍາກຫຼຸດລົງທຸກປີ, ຊາວກະສິກອນເຮັດນາບໍ່ຕ້ອງເສຍອາກອນອີກ, ໂຄງການອະວະກາດບັນທຸກມະນຸດແລະໂຄງການສຳຫຼວດດວງຈັນຄັ້ງທຳອິດໄດ້ຮັບຜົນສຳເລັດ ແລະອື່ນໆ. ຕໍ່ຜົນສຳເລັດທີ່ປະຈັກຕາໂລກດັ່ງກ່າວ, ທ່ານເວີ່ນເຈຍປາວໄດ້ສະຫຼຸບບົດຮຽນອັນລ້ຳຄ່າ 6 ຂໍ້ຄື:
"ຍຶດໝັ້ນປົດປ່ອຍແນວຄິດ, ຍຶດໝັ້ນປະຕິບັດພັດທະນະທັດວິທະຍາສາດ, ຍຶດໝັ້ນປະຕິຮູບແລະເປີດປະຕູສູ່ພາຍນອກ, ຍຶດໝັ້ນດັດສົມຄວບຄຸມມະຫາພາກໃຫ້ດີ, ຍຶດໝັ້ນການປົກຄອງເພື່ອປະຊາຊົນ, ແລະຍຶດໝັ້ນການປົກຄອງຕາມກົດໝາຍ."
ແຕ່ວ່າ, ຕໍ່ຜົນງານດັ່ງກ່າວ, ລັດຖະບານຊຸດນີ້ກໍ່ໄດ້ວິເຄາະສາເຫດເລິກເຊິ່ງຂອງບັນຫາຕ່າງໆຂອງຈີນໃນປັດຈຸບັນເຊັ່ນການລົງທຶນເພີ່ມຂຶ້ນໄວເກີນໄປ, ລາຄາສິນຄ້າສູງຂຶ້ນ, ຄວາມກົດດັນດ້ານໄພເງິນເຟິ້ຫຼາຍຂຶ້ນແລະບັນຫາອື່ນໆຢ່າງໃຈເຢັນແລະມີຄວາມຮັບຜິດຊອບ. ກ່ຽວກັບບັນຫາເຫຼົ່ານີ້, ລັດຖະບານຊຸດນີ້ໄດ້ສະເໜີໃນບົດລາຍງານວຽກງານວ່າ: ປີນີ້ຕ້ອງປະຕິບັດນະໂຍບາຍການເງິນອັນໜັກແໜ້ນແລະນະໂຍບາຍເງິນຕຶງ. ບົດລາຍງານຍັງກຳນົດຄາດໝາຍຂອງGDPໃນລະຫວ່າງ 8%. ນອກນັ້ນ, ທ່າທີຂອງທ່ານເວີ່ນເຈຍປາວກໍ່ເຮັດໃຫ້ຜູ້ແທນຮູ້ສຶກເຖິງຄວາມຕັດສິນໃຈຂອງລັດຖະບານໃນການຄວບຄຸມລາຄາສິນຄ້າ.
"ປ້ອງກັນບໍ່ໃຫ້ລາຄາໂດຍລວມເພີ່ນຂຶ້ນໄວເກີນໄປ, ນີ້ແມ່ນໜ້າທີ່ອັນສຳຄັນຂອງການດັດສົມຄວບຄຸມມະຫາພາກໃນປີນີ້."
ຈາກຈຸດສຳຄັນຂອງການປົກຄອງການເມືອງໃນປີໃໝ່ທີ່ທ່ານເວີ່ນເຈຍປາວສະເໜີນັ້ນ ສາມາດເຫັນໄດ້ວ່າ, ຈຸດພິເສດການປົກຄອງຂອງລັດຖະບານຊຸດນີ້ຄືສະແຫວງຫາຄວາມທ່ຽງທຳໃນສັງຄົມແລະພັດທະນາຢ່າງກົມກຽວກັນ ຈະໄດ້ຮັບການສືບຕໍ່ປະຕິບັດ.
(ໝົດ)
|
|
|
