ສະບາຍດີທ່ານຜູ້ຟັງທີ່ເຄົາລົບ
ມື້ນີ້ແມ່ນມື້ທີສອງທີ່ສັງຂານຈູມຄຳພັນນຳເອົາລາຍການພິເສດເພື່ອສ່ອງແສງເຫດການການເມືອງທີ່ສຳຄັນຂອງຈີນທີ່ພວມເກີດຂຶ້ນຢູ່ໃນຂະນະນີ້,ນັ້ນກໍ່ຄືການດຳເນີນກອງປະຊຸມເທື່ອທີ1ຂອງສະພາປຶກສາການເມືອງປະຊາຊົນແຫ່ງຊາດຈີນສະໄຫມທີ11ທີ່ໄຂຂຶ້ນໃນຕອນບ່າຍນີ້ແລະຈະດຳເນີນໄປຈົນຮອດວັນທີ14ເດືອນນີ້ແລະກອງປະຊຸມເທື່ອທີ1ຂອງສະພາຜູ້ແທນປະຊາຊົນແຫ່ງຊາດຈີນສະໄຫມທີ11ທີ່ຈະໄຂຂຶ້ນໃນມື້ອື່ນ,ຜູ້ດຳເນີນລາຍການຈະພະຍາຍາມຄັດຈ້ອນເອົາເລື່ອງລາວເຫດການສຳຄັນແລະຫນ້າສົມໃຈຂອງກອງປະຊຸມນີ້ມາເວົ້າລົມໃຫ້ທ່ານຟັງ.
ຄືນວານນີ້ສັງຂານໄດ້ເວົ້າເຖີງຫນ້າທີ່ພາລະບົດບາດແລະປະຫວັດຄວາມເປັນມາໂດຍຫຍໍ້ຂອງສະພາປຶກສາການເມືອງປະຊາຊົນແຫ່ງຊາດຈີນໃຫ້ທ່ານຟັງຜ່ານໄປແລ້ວວ່າສະພານີ້ນັບແຕ່ປີ1954ເປັນຕົ້ນມາກໍ່ທຳຫນ້າທີ່ເປັນອົງການແນວໂຮມເອກະພາບຮັກຊາດ,ມີຕົວແທນຈາກທຸກວົງການແລະທ້ອງຖິ່ນເຂົ້າຮວ່ມເພື່ອເສີມຂະຫຍາຍປະຊາທິປະໄຕສັງຄົມນິຍົມໃນຊີວິດການເມືອງຂອງຈີນ,ບັນດາກຳມະການທີ່ເຂົ້າຮວ່ມກອງປະຊຸມສະພາປຶກສານີ້ດັ່ງທີ່ເວົ້າສູ່ຟັງຫນ້ອຍຫນຶ່ງແລ້ວໃນມື້ວານນີ້ວ່ານອກຈາກພັກກອມມູນິດຈີນທີ່ເປັນພັກຄອງອຳນາດແລ້ວຍັງມີພັກຝ່າຍປະຊາທິປະໄຕອີກ8ພັກພ້ອມທັງຜູ້ທີ່ບໍ່ສັງກັດພັກການເມືອງໃດອີກ.ຄືນີ້ສັງຂານຈະລົງເລິກກ່ຽວກັບວ່າໃນປະຈຸດບັນນີ້ບັນດາສະມາຊິກຂອງ8ພັກຝ່າຍປະຊາທິປະໄຕແລະຜູ້ທີ່ບໍ່ສັງກັດພັກການເມືອງໃດນັ້ນເຂົາເຈົ້າມີບົດບາດຫລາຍຫນ້ອຍຊຳໃດໃນການເຂົ້າຮວ່ມປົກຄອງຂອງຈີນໃນປະຈຸບັນ,ທ່ານອູຈ້ຽນມິນໂຄສົກຂອງກອງປະຊຸມເທື່ອທີ1ສະພາປຶກສາການເມືອງປະຊາຊົນແຫ່ງຊາດຈີນສໄຫມທີ11ແຈ້ງໃຫ້ຊາບວ່າ,ປະຈຸບັນນີ້ເຈົ້າຫນ້າທີ່ລັດທີ່ຢູ່ໃນຕຳແຫນ່ງສູງແຕ່ບໍ່ແມ່ນສະມາຊິກຂອງພັກກອມມູນິດຈີນມີນັບມື້ນັບຫລາຍຂຶ້ນຄືທົ່ວປະເທດມີຫລາຍກວ່າ31,000ຄົນ,ໃນນັ້ນຢ່າງຫນ້ອຍ6ພັນຄົນແມ່ນຢູ່ໃນອົງການຂອງລັດຖະບານແລະອົງການຍຸດຕິທຳໃນຕຳແຫນ່ງທີ່ແຕກຕ່າງກັນ,ໃນຈຳນວນ31ແຂວງ,ກຳແພງນະຄອນແລະເຂດປົກຄອງຕົນເອງຂອງຈີນນັ້ນກໍ່ມີຮອງເຈົ້າແຂວງເຖີງ30ຄົນທີ່ບໍ່ແມ່ນສະມາຊິກພັກກອມມູນິດແລ້ວຍັງມີອີກ15ຄົນທີ່ເປັນຮອງເຈົ້າຄອງນະຄອນທັງຂະຫນາດກາງແລະໃຫຍ່.
ເຈົ້າຫນ້າທີ່ລັດທີ່ບໍ່ແມ່ນສະມາຊິກພັກກອມມູນິດຫລາຍທ່ານໄດ້ມີຕຳແຫນ່ງແລະບົດບາດທີ່ສຳຄັນຄຽງບ່າຄຽງໄຫລກັນພັດທະນາສ້າງສາປະເທດຊາດ.ຫລ້າສຸດໃນເດືອນເມສາປີກາຍນີ້ທ່ານວ້ານກ່າງທີ່ເປັນສະມາຊິກຂອງພັກຈື້ກົງຈີນຫລືວ່າພັກເພື່ອຜົນປະໂຫຍດຂອງປະຊາຊົນກໍ່ໄດ້ຮັບການແຕ່ງຕັ້ງໃຫ້ເປັນລັດຖະມົນຕີວ່າການກະຊວງວິທະຍາສາດແລະເຕັດໂນໂລຊີຊຶ່ງຖືວ່າແມ່ນລັດຖະມົນຕີວ່າການຜູ້ທຳອິດທີ່ບໍ່ແມ່ນສະມາຊິກພັກກອມມູນິດຈີນນັບແຕ່ທ້າຍຊຸມປີ1970ເປັນຕົ້ນມາ,ຫລັງຈາກນັ້ນ2ເດືອນທ່ານເສິນຈູທີ່ບໍ່ແມ່ນສະມາຊິກຂອງພັກການເມືອງໃດກໍ່ໄດ້ຮັບການແຕ່ງຕັ້ງໃຫ້ເປັນລັດຖະມົນຕີວ່າການກະຊວງສາທາລະນະສຸກນີ້ເປັນການເຄື່ອນໄຫວທີ່ສຳຄັນຫລາຍຂອງພັກກອມມູນິດຈີນເພື່ອສົ່ງເສີມປະຊາທິປະໄຕສັງຄົມນິຍົມແລະຊຸກຍູ້ການຮວ່ມມືແບບຫລາຍພັກແລະການໃຫ້ຄຳປຶກສາດ້ານການເມືອງທີ່ມີພັກກອມມູນິເປັນຜູ້ນຳພາ.
ໃນກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນທີ່ພວມດຳເນີນຢູ່ນີ້ກຳມະການທີ່ເຂົ້າຮວ່ມຊຶ່ງເປັນຕົວແທນຂອງທຸກວົງການທຸກທ້ອງຖິ່ນພວມມີຄຳເຫັນພວມມີຂໍ້ສະເຫນີຕໍ່ລັດຖະບານໃນບັນຫາຕ່າງໆທີ່ຕິດພັນກັບຜົນປະໂຫຍດຂອງປະຊາຊົນຈີນຢ່າງແທ້ຈິງບໍ່ວ່າຈະເປັນບັນຫາການປະຕິຮູບແລະພັດທະນາ,ການປະຕິຮູບໂຄງສ້າງການເງິນ,ອາກາດປ່ຽນແປງ,ການປົກປ້ອງສະພາບແວດລ້ອມ,ການຍົກລະດັບຊີວິດການເປັນຢູ່ຂອງປະຊາຊົນ,ການຄວມຄຸມລາຄາສິນຄ້າ,ການສ້າງວຽກເຮັດງານທຳ,ບັນຫາເຮືອນຢູ່,ຄວາມປອດໄພໃນສັງຄົມ,ຕະຫລອດຮອດການເຮັດໃຫ້ງານກິລາໂອແລັມປິກປັກກິ່ງໃຫ້ປະສົບຜົນສຳເລັດສູງ.
ເອົາລະ,ມາຮອດນີ້ເວລາຂອງລາຍການພິເສດຂອງກອງປະຊຸມສະພາກໍ່ຫມົດເທົ່ານີ້,ສັງຂານຈູມຄຳພັນຂໍລາໄປກ່ອນ,ມື້ອື່ນເວລາເກົ່າພົບກັນອີກ.ສະບາຍດີ.
|