|
ສະບາຍດີທ່ານຜູ້ຟັງທີ່ຮັກແພງ!
ພໍຮອດເວລານີ້ສັງຂານຈູມຄຳພັນກໍ່ນຳເອົາລາຍການພິເສດເພື່ອລາຍງານບັນຍາກາດຂອງຈີນມາພົບກັບທ່ານອີກແລ້ວ.ມື້ນີ້ກໍ່ແມ່ນມື້ທີ4ຂອງການດຳເນີນກອງປະຊຸມເທື່ອທີ1ຂອງສະພາປຶກສາການເມືອງປະຊາຊົນແຫ່ງຊາດຈີນຊຸດທີ11ແລະແມ່ນມື້ທີ2ຂອງການດຳເນີນກອງປະຊຸມເທື່ອທີ1ຂອງສະພາຜູ້ແທນປະຊາຊົນແຫ່ງຊາດຈີນຊຸດທີ11.
ເວົ້າສຳລັບການດຳເນີນກອງປະຊຸມສະພາຜູ້ແທນປະຊາຊົນແຫ່ງຊາດຈີນທີ່ເປັນອົງການນິຕິບັນຍັດສູງສຸດຂອງຊາດແລ້ວຜູ້ແທນເກືອບ3ພັນຄົນກໍ່ພວມຄົ້ນຄວ້າພິຈາລະນາບົດລາຍງານວຽກງານຂອງລັດຖະບານຢູ່ໂດຍສະເພາະກໍ່ແມ່ນແຜນການຂອງລັດຖະບານຊຸດຕໍ່ໄປທີ່ຈະຮັບຮອງເອົາໃນຕອນທ້າຍຂອງກອງປະຊຸມ.ຄືດັ່ງທີ່ຮູ້ວ່າຜູ້ແທນທີ່ເຂົ້າຮວ່ມກອງປະຊຸມລ້ວນແຕ່ເປັນຜູ້ຕາງຫນ້າແທນປາກແທນສຽງໃຫ້ປະຊາຊົນທຳມະດາສາມັນຈາກພາກສ່ວນແລະທ້ອງຖິ່ນຕ່າງໆມາຄົ້ນຄວ້າພິຈາລະນາບັນຫາທີ່ມັນພົວພັນເຖິງສິດແລະຜົນປະໂຫຍດຂອງປະຊາຊົນໂດຍກົງ.ປະຈຸບັນນີ້ປະຊາຊົນທຳມະດາສາມັນນັບມື້ນັບມີສິດມີສຽງໃນການປະກອບຄຳຄິດຄຳເຫັນຕໍ່ບັນຫາການເມືອງລະດັບປະເທດ.ທ່ານມາເວິນຟາງ,ກໍ່ແມ່ນຜູ້ແທນຂອງກອງປະຊຸມເທື່ອນີ້,ທ່ານເປັນນາຍຫມໍປະຈຳບ້ານ,ທ່ານເວົ້າວ່າ"ຂ້ອຍມາຈາກພື້ນຖານບ້ານສະນັ້ນຂ້ອຍຮູ້ບັນຫາຂອງຊາວບ້ານດີໂດຍສະເພາະຊາວໄຮ່ຊາວນາ,ຂ້ອຍຈະເຮັດວຽກເພື່ອຂະເຈົ້າເພື່ອຍົກລະດັບຊີວິດການເປັນຢູ່ຂອງເຂົາເຈົ້າໃຫ້ດີຂຶ້ນຕື່ມ."ສ່ວນທ່ານຫວາງຮົງຈຸນ,ທີ່ເປັນຜູ້ແທນແລະກໍ່ເປັນກຳມະກອນຂອງໂຮງງານທຳມະດາຜູ້ຫນຶ່ງກໍ່ບອກວ່າຢາກໃຫ້ສັງຄົມຮັບຮູ້ບົດບາດຂອງກຳມະກອນຫລາຍຂຶ້ນແລະນັບຖືເຂົາເຈົ້າຫລາຍຂຶ້ນ.ຜູ້ແທນທີ່ເປັນຕົວແທນຂອງກຳມະກອນເພີ່ມຂຶ້ນ2ເທົ່າພຸ້ນໄດທ່ານຜູ້ຟັງ,ສ່ວນຕົວແທນຂອງຊາວກະສິກອນກໍ່ເພີ່ມຂຶ້ນຫລາຍກວ່າ707,ໃນນີ້ກໍ່ມີຕົວແທນຊາວກະສິກອນທີ່ມາເຮັດວຽກໃນເມືອງ3ຄົນຖືວ່າເປັນເທື່ອທຳອິດທີ່ເຂົາເຈົ້າໄດ້ຕາງຫນ້າໃຫ້ກຳມະກອນເຄື່ອນຍ້າຍປະມານ200ລ້ານຄົນໄດ້ເຂົ້າຮວ່ມກອງປະຊຸມນິຕິບັດຍັດສູງສຸດຂອງປະເທດ,ການຄັດເລືອກແນວນີ້ກໍ່ຍ້ອນລັດຖະບານຢາກໄດ້ຍິນສຽງຂອງຄົນຈາກຮາກຖານອີ່ຫລີເພື່ອຈະໄດ້ຮູ້ບັບຫາຕົວຈິງແລະສາມາດວາງແຜນແກ້ໄຂໃຫ້ຖືກຈຸດ,ມີຕົວແທນຈາກຮາກຖານເຂົ້າຮວ່ມຫລາຍເທົ່າໃດກໍ່ຍິ່ງຈະເຮັດໃຫ້ຜູ້ວາງແຜນຜູ້ສ້າງກົດຫມາຍເຮັດວຽກໄດ້ຖືກຕ້ອງຫລາຍເທົ່ານັ້ນ.
ກ່ອນຈະໄຂກອງປະຊຸມສະພາຜູ້ແທນປະຊາຊົນແຫ່ງຊາດໃນມື້ວານນີ້ທ່ານເວີນເຈຍປາວ,ນາຍົກລັດຖະມົນຕີກໍ່ໄດ້ເຊີນຄູອາຈານ,ຊາວກະສິກອນແລະກຳມະກອນບໍ່ແຮ່ຫລາຍກວ່າ10ຄົນເຂົ້າມາພົບຢູ່ຫ້ອງການເຮັດວຽກຂອງລັດຖະບານທຳນຽບຈົ່ງຫນານໄຫເພື່ອຮັບຟັງຄຳຄິດຄຳເຫັນແລະຂໍ້ສະເຫນີຂອງເຂົາເຈົ້າແລ້ວກໍ່ບັນຈຸເຂົ້າໃນບົດລາຍງານຂອງລັດຖະບານທີ່ສະເຫນີຕໍ່ກອງປະຊຸມໃນຕອນເຊົ້າວານນີ້.
ນອກນັ້ນແລ້ວເພື່ອເຕົ້າໂຮມຄຳຄິດເຫັນຂໍ້ສະເຫນີຈາກປະຊາຊົນທົ່ວໄປລັດຖະບານກໍ່ໄດ້ເປີດເວັບໄຊພິເສດທີ່ຊື່ວ່າ"ຂ້ອຍມີຄຳຖາມຕໍ່ທ່ານນາຍົກ"ທີ່ຂ່າວສານຊິນຮວາເປັນເຈົ້າພາບຈັດຂຶ້ນ,ກ່ອນໄຂກອງປະຊຸມເວັບໄຊນີ້ກໍ່ໄດ້ຮັບຄຳສະເຫັນແລະຂໍ້ສະເຫນີຈາກປະຊາຊົນທົ່ວໄປ 6ຫມື່ນກວ່າຂໍ້, ເລື່ອງສ່ວນຫລາຍກໍ່ແມ່ນກ່ຽວຂ້ອງເຖີງການເຕີບໂຕຂອງເສດຖະກິດຂອງຊາດ, ການຮັກສາສະພາບແວດລ້ອມ, ຮຽກຮ້ອງໃຫ້ວຽກງານສະຫວັດດີການສັງຄົມໃຫ້ດີກວ່າເກົ່າໂດຍສະເພາະສຳລັບຄົນພິການແລະປະຊາຊົນໃນຊົນນະບົດ.
ຄວາມຫລຸດໂຕນກັນດ້ານການພັດທະນາລະຫວ່າງຕົວເມືອງກັບຊົນນະບົດ ກໍ່ແມ່ນບັນຫາຫນຶ່ງທີ່ພົ້ນເດັ່ນທີ່ລັດຖະບານພວມແກ້ໄຂໃຫ້ນັບມື້ນັບແຄບເຂົ້າ,ສະນັ້ນການຈັດສັນຄວາມດຸ່ມດ່ຽງລະຫວ່າງຕົວແທນຈາກໃນເມືອງກັບຊົນນະບົດທີ່ເຂົ້າຮວ່ມກອງປະຊຸມສະພາຜູ້ແທນປະຊາຊົນແຫ່ງຊາດກໍ່ມີການປັບປຸງໄປເລື້ອຍໆເພື່ອໃຫ້ຕົວແທນຈາກຊົນນະບົດມີປາກມີສຽງຫລາຍກວ່າເກົ່າໃນກອງປະຊຸມຈົນກ້າວໄປເຖີງມີການເທົ່າທຽງກັນລະຫວ່າງຜູ້ແທນຈາກໃນເມືອງແລະຊົນນະບົດ. ອັນນີ້ມັນກົງກັບຄຳສຸພາສິດລາວທີ່ວ່າ"ໄມ້ລຳດຽວລ້ອມຮົ້ວບໍ່ໄຂວ່ ໄຜ່ບໍ່ພ້ອມແປງບ້ານບໍ່ເຮືອງ"ສະນັ້ນ ລັດຖະບານຈີນຍາມໃດກໍ່ງ່ຽງຫູຟັງສຽງຂອງປະຊາຊົນເວົ້າເຂົ້າເຈົ້າມີບັນຫາຫຍັງຢາກໃຫ້ຊວ່ຍຫຍັງ ເພື່ອວາງແຜນເອົາລະ, ມາຮອດນີ້ເວລາຂອງລາຍການພິເສດກໍ່ຫມົດເທົ່ານີ້,ມື້ອື່ນເວລາເກົ່າ ສັງຂານຈູມຄຳພັນຈຶ່ງຈະກັບມາພົບກັບທ່ານອີກທາງCRIແຫ່ງນີ້.
ສະບາຍດີ!
|
