|
|
(GMT+08:00)
2008-03-07 17:40:15
|
|
ກຳມະການສະພາປຶກສາການເມືອງລົມເລື່ອງ"ເພີ່ມທະວີການສ້າງສາວັດທະນະທຳ ຊຸກຍູ້ວັດທະນະທຳໃຫ້ພັດທະນາແລະຈະເລີນຮຸ່ງເຮືອງ"
cri
Author: mo
"ລົງເລິກການປະຕິຮູບໂຄງປະກອບວັດທະນະທຳ, ຊຸກຍູ້ວັດທະນະທຳໃຫ້ພັດທະນາແລະຈະເລີນຮຸ່ງເຮືອງຢ່າງໃຫຍ່", ນີ້ແມ່ນຈຸດສຳຄັນຈຸດໜຶ່ງໃນບົດລາຍງານວຽກງານລັດຖະບານຈີນຂອງທ່ານເວີ່ນເຈຍປາວ ນາຍົກລັດຖະມົນຕີຈີນທີ່ກ່າວໃນວັນທີ 5 ມີນານີ້, ແລະກໍ່ແມ່ນຈຸດສຸມທີ່ກຳມະການສະພາປຶກສາການເມືອງທີ່ເຂົ້າຮ່ວມກອງປະຊຸມປະຈຳປີຂອງສະພາປຶກສາການເມືອງແຫ່ງຊາດຈີນສົນໃຈ.
ທ່ານຈ້າວເວີຍຊຸຍ ກຳມະການສະພາປຶກສາການເມືອງແມ່ນລັດຖະມົນຕີຊ່ວຍວ່າການກະຊວງວັດທະນະທຳຈີນ. ທ່ານເຫັນວ່າ, ນັບແຕ່ຈີນດຳເນີນການປະຕິຮູບແລະໄຂປະຕູສູ່ພາຍນອກມານີ້, ກຳລັງສັງລວມຂອງລັດໄດ້ເຂັ້ມແຂງຂຶ້ນເລື້ອຍໆ, ຈີນຕ້ອງການສ້າງສິ່ງກໍ່ສ້າງວັດທະນະທຳທີ່ສຳຄັນຈຳນວນໜຶ່ງຄືກັບໂຮງລະຄອນແຫ່ງຊາດ, ແຕ່ພ້ອມກັນນັ້ນກໍ່ຕ້ອງພະຍາຍາມປະດິດສ້າງໃໝ່, ແຕ່ງບົດປະພັນວັນນະຄະດີອັນຍອດຢ້ຽມ ເພື່ອຕອບສະໜອງຄວາມຕ້ອງການຂອງປະຊາຊົນໃນຊີວິດດ້ານຈິດໃຈ. ໂຮງລະຄອນແຫ່ງຊາດຈີນທີ່ທ່ານຈ້າວເວີຍຊຸຍກ່າວເຖິງນັ້ນ ຕັ້ງຢູ່ເບື້ອງຕາເວັນຕົກຂອງສະໜາມຫຼວງທຽນອານເມີນ ເຂດໃຈກາງນະຄອນຫຼວງປັກກິ່ງ, ແມ່ນສິ່ງກໍ່ສ້າງອັນໃຫຍ່ໂຕມະໂຫລານ ມີຫຼັງຄາເປັນຮູບກົມໃຫຍ່ກວ່າໝູ່ໃນໂລກ. ຫາກໍ່ເລີ່ມໃຊ້ບໍ່ຮອດ 3 ເດືອນ, ກໍ່ມີຄະນະສິລະປະກອນທີ່ດີເລີດຂອງຈີນ ແລະສິລະປິນຊັ້ນຍອດຂອງໂລກມາສະແດງຢູ່ແຫ່ງນີ້ຢ່າງຕໍ່ເນື່ອງ, ຜູ້ຊົມຈີນໄດ້ຊົມສິລະປະທີ່ດີເລີດຈາກແຫ່ງຕ່າງໆໃນທົ່ວໂລກຢູ່ແຫ່ງນີ້, ແຕ່ເຂົາເຈົ້າຍັງໄດ້ຝາກຄວາມຫວັງຫຼາຍກວ່າເກົ່າຕໍ່ໂຮງລະຄອນແຫ່ງນີ້, ຄືຢາກໃຫ້ມີສິລະປິນທີ່ດີເລີດຫຼາຍກວ່າເກົ່າມາສະແດງຢູ່ແຫ່ງນີ້. ທ່ານຈ້າວເວີຍຊຸຍບອກວ່າ, ກິດຈະກຳສິລະປະເວທີແຫ່ງຊາດທີ່ກະຊວງວັດທະນະທຳຈີນປະຕິບັດມາ 5 ປີແລ້ວນັ້ນ, ໄດ້ຮັບລາຍການທີ່ດີເລີດ 50 ເລື່ອງ, ມີສິ່ງປະພັນທີ່ດີເລີດແລະສິລະປິນຜູ້ມີຄວາມສາມາດຈຳນວນໜຶ່ງປະກົດຂຶ້ນ; ປີ 2008, ຍັງຈະສືບຕໍ່ປະຕິບັດກິດຈະກຳສິ່ງປະພັນຍອດຢ້ຽມຕໍ່ໄປ, ໃນ 5 ປີຕໍ່ໜ້າ, ການເງິນຂອງລັດຈະໃຫ້ງົບປະມານສະເພາະຈຳນວນ 40 ລ້ານຢວນຕໍ່ປີ ເພື່ອສະໜັບສະໜູນການສ້າງລາຍການທີ່ດີເລີດຢູ່ເທິງເວທີ. ໃນອະນາຄົດບໍ່ດົນນີ້, ປະຊາຊົນຈະໄດ້ຊົມລາຍການດີໆຫຼາຍກວ່າເກົ່າຢູ່ໂຮງລະຄອນລະດັບໜຶ່ງຂອງຈີນດັ່ງກ່າວ.
ທ່ານຟ້ານຕີອ່ານ ກຳມະການສະພາປຶກສາການເມືອງທີ່ໄດ້ຮັບເລືອກຕັ້ງໃໝ່ ປີນີ້ກໍ່ແມ່ນຫົວໜ້າຫໍວິຈິດຕະກຳຈີນ, ທ່ານແມ່ນຜູ້ອອກແບບການວາງສະແດງສິລະປະທີ່ມີຊື່ສຽງໃນໂລກ. ທ່ານເຫັນວ່າ, ປະຈຸບັນ, ຈີນກັບຕ່າງປະເທດມີການແລກປ່ຽນວັດທະນະທຳຢ່າງເນື່ອງນິດ, ພາຍຫຼັງການວາງສະແດງສິລະປະຕ່າງປະເທດທີ່ມີຊື່ສຽງໃນໂລກຖືກນຳເຂົ້າມາຈີນແລ້ວ, ໄດ້ຮັບຄວາມຊົມເຊີຍຈາກຜູ້ຊົມທັງຫຼາຍ, ແຕ່ກໍ່ບໍ່ຄວນປະໝາດການວາງສະແດງມໍລະດົກວັດທະນະທຳອັນອຸດົມສົມບູນຂອງຈີນເອງ. ທ່ານບອກວ່າ, ການ"ວາງສະແດງສິລະປະຕຸ່ນຮວງ" ທີ່ພວມວາງສະແດງຢູ່ໃນຫໍວິຈິດຕະກຳແຫ່ງນີ້ ມີຂະໜາດໃຫຍ່ກວ່າໝູ່ ການລົງທຶນຫຼາຍກວ່າໝູ່ແລະຜູ້ຊົມກໍ່ຫຼາຍກວ່າໝູ່ຄືມີຜູ້ຊົມເຖິງ 3 ແສນເທື່ອຄົນ, ປັດຈຸບັນ, ຕົວເລກນີ້ຍັງສູງຂຶ້ນເລື້ອຍໆ. ທ່ານຟ້ານຕີອ່ານກ່າວວ່າ, ຕ້ອງໃຊ້ການວາງສະແດງທີ່ມີຂະໜາດໃຫຍ່ແລະມີເນື້ອໃນອຸດົມສົມບູນ, ຈຶ່ງຈະມີສະເໜ່ອັນພຽງພໍ, ດູດດຶງຜູ້ຊົມ, ໃຫ້ຜູ້ຊົມເລົ່າຕໍ່ປາກກັນໄປຢ່າງບໍ່ຂາດ."
ຍັດຕິຂອງກຳມະການບໍ່ໜ້ອຍໄດ້ກ່າວພົວພັນເຖິງການສ້າງສາວັດທະນະທຳໃນເຂດຊຸມຊົນ, ການອົບຮົມຜູ້ມີຄວາມສາມາດດ້ານວັດທະນະທຳຂັ້ນຮາກຖານແລະອື່ນໆ. ທ່ານຈ້າວເວີຍຊຸຍກ່າວວ່າ, ການສ້າງສາວັດທະນະທຳຂັ້ນຮາກຖານຂອງຈີນແມ່ນຂອດທີ່ອ່າວອ່ອນແອ, ປີກາຍນີ້, ລັດຖະບານໄດ້ໃຊ້ງົບປະມານເຖິງ 2 ຕື້ກວ່າຢວນຊຸກຍູ້ປະຕິບັດໂຄງການວັດທະນະທຳທົ່ວປະເທດຈີນ, ເປັນລາຍຈ່າຍທີ່ຫຼາຍກວ່າໝູ່ໃນຫຼາຍປີທີ່ຜ່ານມາ, ແຕ່ລະດັບເຜີຍແຜ່ໃນຊົນນະບົດໄດ້ແຕ່ 60ເຖິງ70%. ທ່ານກ່າວວ່າ, ໃນບົດລາຍງານວຽກງານລັດຖະບານຂອງທ່ານນາຍົກລັດຖະມົນຕີເວີ່ນເຈຍປາວໄດ້ກ່າວວ່າ, ລັດຖະບານຈະເພີ່ມງົບປະມານໃນດ້ານນີ້ໃຫ້ຫຼາຍຂຶ້ນຕື່ມອີກ, ຊຸກຍູ້ໃຫ້ທົ່ວປະເທດຊົມໃຊ້ຂໍ້ມູນຂ່າວສານວັດທະນະທຳນຳກັນ, ທຸກໆບ້ານຟັງວິທະຍຸໄດ້ແລະເບິ່ງໂທລະພາບໄດ້, ສ້າງຫ້ອງໜັງສືຊົນນະບົດ, ທຸກບ້ານໃຫ້ມີວິທະຍຸກະຈາຍສຽງແລະໂທລະພາບ ສ້າງຫ້ອງສະໝຸດຂອງຊາວກະສິກອນ, ຊຸກຍູ້ວຽກງານສາຍຮູບເງົາຢູ່ຊົນນະບົດ. ວຽກເຫຼົ່ານີ້ລ້ວນແຕ່ຕ້ອງປະຕິບັດຢ່າງແທ້ຈິງ.
|
|
|