|
ສະບາຍດີທ່ານຜູ່ຟັງທີ່ເຄົາລົບ.ພົບກັບສັງຂານ ຈູມຄຳພັນອີກແລ້ວໃນລາຍການພິເສດເພື່ອສ່ອງແສງບັນຍາກາດການດຳເນີນກອງປະຊຸມເທື່ອທີ1ຂອງສະພາປຶກສາການເມືອງປະຊາຊົນແຫ່ງຊາດແລະສະພາຜູ້ແທນປະຊາຊົນແຫ່ງຊາດຈີນ ຊຸດທີ11 ທີ່ພວມດຳເນີນຢູ່.ສະພາປຶກສາການເມືອງຈະດຳເນີນໄປຈົນຮອດັນທີ14 ສ່ວນສະພາຜູ້ແທນປະຊາຊົນຈະດຳເນີນໄປຈົນຮອດວັນທີ18 ເດືອນນີ້ຈຶ່ງຈະອັດລົງ.
ມື້ນີ້ສັງຂານຈະຂໍຍົກເອົາບັນຫາສາດສະໜາມາເວົ້າສູ່ຟັງຊຶ່ງກໍ່ເປັນເລື່ອງໜຶ່ງທີ່ມີການເວົ້າເຖິງຢູ່ໃນກອງປະຊຸມສະພາປຶກສາການເມືອງ.ເພາະວ່າປະຈຸບັນນີ້ຢູ່ປະເທດຈີນກໍ່ມີຜູ້ນັບຖືສາດສະໜາຕ່າງໆຫຼາຍກວ່າ100ລ້ານຄົນ,ໃນນັ້ນສ່ວນຫຼາຍກໍ່ແມ່ນສາດສະໜາພຸດແລະສາດສະໜາເຕົາ,ມຸດສະລິມມີ18 ສາມັນຄົນ,ໂປແຕັດສະແຕັນ10 ລ້ານແລະກາໂຕສິກ4ລ້ານຄົນ.ໃນຊຸມປີມໍ່ໆມານີ້ຜູ້ນັບຖືສາດສະໜາກໍ່ນັບມື້ນັບຫຼາຍຂຶ້ນ.
ໃນກອງປະຊຸມສະພາປຶກສາການເມືອງເທື່ອນີ້ກໍ່ໄດ້ປຶກສາຫາລືກັນວ່າຈະເຮັດແນວໃດເພື່ອນຳໃຊ້ສາດສະໜາມາສົ່ງເສີມສັງຄົມທີ່ກົມກຽວກັນ.ທ່ານເຈຍຊິ້ງຫຼິນ,ປະທານສະພາປຶກສາການເມືອງປະຊາຊົນກໍ່ປະກອບຄຳເຫັນໃນກອງປະຊຸມວ່າ"ພວກເຮົາຄວນປະຕິບັດຕາມນະໂຍບາຍເສລີພາບໃນການເຊື່ອຖືສາດສະໜາຢ່າງເຕັມສ່ວນ,ປະຕິບັດຕາມຂໍ້ກຳນົດກົດລະບຽບຂອງວຽກງານສາດສະໜາແລະຈັດຕັ້ງການສຳຫຼວດຄົ້ນຄວ້າກ່ຽວກັບຄວາມສຳຄັນຂອງສາດສະໜາແລະບັນຫາຫຍຸ້ງຍາກຕ່າງໆທີ່ກ່ຽວຂ້ອງ.ນອກນັ້ນກໍ່ຄວນແນະນຳຜູ້ນຳແລະຜູ່ເຊື່ອຖືສາດສະໜາຕ່າງໆໃຫ້ຍົກລະດັບຊີວິດການເປັນຢູ່ຂອງເຂົາເຈົ້າພ້ອມທັງນຳໃຊ້ບົດບາດດ້ານຕັ້ງໜ້າຂອງສາດສະໜາຢ່າງເຕັມທີ່ເພື່ອສົ່ງເສີມການພັດທະນາສັງຄົມ."
ປະຈຸບັນນີ້ບໍ່ວ່າຈະເປັນສະພາປຶກສາການເມືອງປະຊາຊົນທີ່ທຳໜ້າທີ່ເປັນອົງການແລວໂຮມເອກະພາບຮັກຊາດກໍ່ຄືລັດຖະບານລ້ວນແຕ່ສົ່ງເສີມນຳໃຊ້ບົດບາດຂອງສາດສະໜາເພື່ອພັດທະນາສັ່ງຄົມທີ່ກົມກຽມກັນ.
ທ່ານຜູ່ຟັງທີ່ຮັກແພງ,ຖ້າເວົ້າເຖິງສາດສະໜາແລ້ວ ບໍ່ວ່າຈະເປັນສາດສະໜາໃດກໍ່ແລ້ວແຕ່ ລ້ວນແຕ່ອົບຮົມສັ່ງສອນຄົນໃຫ້ສ້າງແຕ່ຄວາມດີ ລະເວັ້ນຄວາມຊົ່ວ;ໃນປະເທດໜຶ່ງກໍ່ອາດຈະມີຄົນທີ່ນັບຖືສາດສະໜາແຕກຕ່າງກັນຫຼືຜູ້ບໍ່ນັບຖືສາດສະໜາໃດກໍ່ມີຢ່າງຫຼວງຫຼາຍ,ແຕ່ບັນຫາສຳຄັນກໍ່ຄືຈະເຮັດແນວໃດໃຫ້ຄົນໃນຊາດດຳລົງຊີວິດຢູ່ຮ່ວມກັນຢ່າງມີຄວາມສາມັກຄີຖືກຕ້ອງປອງດອງກັນ,ເຖິງຈະເຊື່ອຖືຫຼືບໍ່ເຊື່ອຖືສາດສະໜາກໍ່ມີຄວາມຮັກແພງກັນແລະມີເປົ້າໝາຍອັນດຽວກັນ ນັ້ນກໍ່ຄືຊ່ວຍກັນພັດທະນາຊາດໃຫ້ຈະເລີນຮຸ່ງເຮືອງ ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ.ຫຼືກເວັ້ນບໍ່ໃຫ້ຄົນບໍ່ດີ ສອຍໃຊ້ສາດສະໜາເພື່ອມາແບ່ງແຍກຄວາມສາມັກຄີປອງດອງລະຫວ່າງສາດສະໜາທີ່ຕ່າງກັນຫຫຼືແບ່ງແຍກຄວາມສາມັກຄີລະຫວ່າງຊົນຊາດຊົນເຜົ່າ.ເວົ້າເລື່ອງສາດສະໜາແມ່ນເປັນຫົວຂໍ້ທີ່ອ່ອນໄຫວ ຖ້າມີນະໂຍບາຍແລະການປະຕິບັດທີ່ບໍ່ດີກໍ່ອາດຈະເກີດບັນຫາໃຫຍ່ຄືໃນບາງປະເທດທີ່ເກີດຄວາມຂັດແຍ່ງລະຫວ່າງສາດສະໜາຈົນກ້າວໄປເຖິງການຂ້າພັນລັນແທງກັນກໍ່ມີ.ສຳລັບຢູ່ຈີນແລ້ວບໍ່ວ່າຈະເປັນອົງການແນວໂຮມກໍ່ຄືລັດຖະບານລ້ວນແຕ່ສົ່ງເສີມໃຫ້ຜູ້ທີ່ເຊື່ອຖືສາດສະໜາຕ່າງໆຈົ່ງຊ່ວຍກັນສ້າງຄວາມເອກະພາບແຫ່ງຊາດແລະສົ່ງເສີມຄວາມກົມກຽວປອງດອງລະຫວ່າງສາດສະໜາທີ່ຕ່າງກັນ.ທ່ານຕິ່ງເວີນຟ່າງ,ທີ່ເປັນສະມາຊິກຂອງຄະນະກຳມະການແຫ່ງຊາດຂອງສະພາປຶກສາການເມືອງປະຊາຊົນ ທັງເປັນຮອງປະທານສະມາຄົມສາດສະໜາອີສລາມຈີນທີ່ເຂົ້າຮ່ວມກອງປະຊຸມສະພາປຶກສາການເມືອງປະຊາຊົນທີ່ພວມດຳເນີນຢູ່ກໍ່ເວົ້າວ່າ:ຄວາມເປັນເອກະພາບຂອງ56ຊົນເຜົ່າຂອງຈີນແລະຄວາມກົມກຽວກັນຂອງສາດສະໜາຕ່າງໆແມ່ນເປັນສິ່ງທີ່ຈຳເປັນຫຫຼາຍເພື່ອສ້າງສັງຄົມທີ່ກົມກຽວກັນ.
ເອົາລະທ່ານຜູ້ຟັງທີ່ຮັກແພງ ມື້ນີ້ການຍົກເອົາເລື່ອງສາດສະໜາໃນປະເທດຈີນມາເວົ້າສູ່ຟັງກໍ່ຂໍຈົບພຽງເທົ່ານີ້.ສຳລັບມື້ອື່ນກັບມື້ຮືທີ່ແມ່ນວັນເສົາແລະວັນອາທິດ,ລາຍການພິເສດນີ້ຈະບໍ່ມີ,ວັນຈັນ ສັງຂານຈິ່ງຈະກັບມາພົບກັບມິດລາຍການອີກເພື່ອສ່ອງແສງບັນຍາກາດຂອງສອງກອງປະຊຸມສະພາຈີນສູ່ຟັງ.
ມື້ອື່ນແມ່ນວັນແມ່ນຍິງາສາກົນ,ສັງຂານຂໍຕາງໜ້າcriອວຍພອນໃຫ້ເອື້ອຍນ້ອງແມ່ຍິງລາວທຸກຄົນຈົ່ງມີແຕ່ຄວາມສຸກກາຍສະບາຍໃຈ ປະສົບຜົນສຳເລັດໃນຊີວິດແລະໜ້າທີ່ວຽກງານທຸກປະການ.
ສະບາຍດີ!
|
