|
ປະຈຸບັນ, ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນ ເຊິ່ງເປັນອົງການອຳນາດແຫ່ງຊາດສູງສຸດຂອງຈີນພວມປະຊຸມກັນຢູ່ປັກກິ່ງ. ນັບແຕ່ປະຊາຊົນທຳມະດາສາມັນຮອດເຈົ້າໜ້າທີ່ລັດຖະບານລ້ວນແຕ່ເວົ້າວ່າ, ນີ້ແມ່ນກອງປະຊຸມເທື່ອໜຶ່ງທີ່ຟັງສຽງຂອງປະຊາຊົນແລະເຂົ້າໃຈຄວາມຄິດຂອງປະຊາຊົນ. ຄັນຊັ້ນ, ບັນຫາຈຸດສຸມທາງສັງຄົມທີ່ປະຊາຊົນຈີນເອົາໃຈໃສ່ນຳຫຼາຍໃນມໍ່ໆນີ້ແມ່ນຫຍັງ?
ຜົນການສຳຫຼວດທີ່ແວບໄຊຊິນຮວາຈີນປະກາດໃນມໍ່ໆນີ້ສະແດງໃຫ້ເຫັນວ່າ, ນອກຈາກລາຄາສິນຄ້າໃນຕະຫຼາດແລະເຮືອນຢູ່ທີ່ກ່ຽວພັນເຖິງຜົນປະໂຫຍດຕົວຈິງຂອງປະຊາຊົນແລ້ວ, ການຕ້ານການສໍ້ລາດບັງຫຼວງແລະການສ້າງການປົກຄອງທີ່ປອດໃສຂາວສະອາດໄດ້ກາຍເປັນບັນຫາໜຶ່ງທີ່ປະຊາຊົນຈີນເອົາໃຈໃສ່ນຳໃນກອງປະຊຸມສອງສະພາໃນປີນີ້. ຄັນຊັ້ນ, ປະຊາຊົນທັງຫຼາຍແມ່ນສັງເກດບັນຫາຕ້ານການສໍ້ລາດບັງຫຼວງແນວໃດ? ພວກເຮົາມາຟັງສຽງຂອງປະຊາຊົນລອງເບິ່ງ
ລຸງຫຼີເວີ່ນຊິງເວົ້າວ່າ
ປະກົດການສໍ້ລາດບັງຫຼວງມີຜົນຮ້າຍອັນໜັກໜ່ວງ, ເພາະວ່າມັນໄດ້ທຳລາຍຜົນປະໂຫຍດຕົວຈິງຂອງປະຊາຊົນອັນໄພສານ, ນອກນີ້ຍັງໄດ້ສ້າງຜົນກະທົບຕໍ່ພາບພົດຂອງລັດຖະບານ.
ຈະລົງໂທດຜູ້ສໍ້ລາດບັງຫຼວງແນວໃດ, ຈະປ້ອງກັນບໍ່ໃຫ້ເກີດປະກົດການສໍ້ລາດບັງຫຼວງແນວໃດແລະຈະຮັບປະກັນໃຫ້ບໍລິຫານຢ່າງປອດໃສໄດ້ແນວໃດເປັນຕົ້ນໄດ້ກາຍເປັນຫົວຂໍ້ທີ່ຜູ້ແທນສະພາປະຊາຊົນປຶກສາຫາລືກັນຢ່າງເຄັ່ງຂຶມ. ທ່ານເຕິ້ງສ່ວນ ຫົວໜ້າໄອຍະການປະຊາຊົນແຂວງເຊສວນກ່າວວ່າ
ຖ້າວ່າວຽກງານຕ້ານການສໍ້ລາດບັງຫຼວງເຮັດບໍ່ໄດ້ດີ, ຈະກະທົບກະເທືອນເຖິງການພັດທະນາເສດຖະກິດແລະຄວາມກົມກຽວກັນທາງສັງຄົມ. ບໍ່ວ່າຈະກ່ຽວພັນເຖິງຜູ້ໃດ, ພວກຂ້າພະເຈົ້າຈະສຳຫຼວດສືບສວນແລະລົງໂທດຈົນເຖິງທີ່ສຸດ.
ທ່ານຄ່າງເວີ້ຍມິນ ສະມາຊິກສະພາຜູ້ແທນປະຊາຊົນແຫ່ງຊາດຈີນ ເຈົ້າໜ້າທີ່ສານປະຊາຊົນຊັ້ນສູງແຂວງຫູນານເຫັນວ່າ,ຍຶດໝັ້ນໃຫ້ໝົດທຸກຄົນສະເໝີພາບກັນຢ່ຕໍູ່ໜ້າກົດໝາຍ, ບໍ່ວ່າຈະມີຕຳແໜ່ງໃດ, ມີເບື້ອງຫຼັງແນວໃດ, ຖ້າລະເມີດກົດໝາຍແລ້ວຕ້ອງລົງໂທດຕາມກົດໝາຍ.
ອີງຕາມສຽງຮຽກຮ້ອງຂອງຜູ້ແທນປະຊາຊົນ, ລັດໄດ້ໃຫ້ຄຳຕອບທີ່ຕັ້ງໜ້າ. ໃນໄລຍະກອງປະຊຸມສະພາປະຊາຊົນແຫ່ງຊາດປີນີ້, ທ່ານເຮີ້ກົວຊຽງ ກຳມະການປະຈຳກົມການເມືອງສູນກາງພັກກອມມູນິດຈີນ ເລຂາຄະນະກຳມະການກວດກາສູນກາງພັກກອມມູນິດຈີນໄດ້ສະແດງຄວາມຕັດສິນໃຈຕ້ານການສໍ້ລາດບັງຫຼວງຂອງຈີນອີກເທື່ອໜຶ່ງ. ທ່ານກ່າວວ່າ,ປະຈຸບັນພວມແມ່ນໄລຍະທີ່ມັກເກີດເຫດການສໍ້ລາດບັງຫຼວງເລື້ອຍໆ, ຕ້ອງຮັກສາທ່າອ່ຽງທີ່ແຂງແຮງໃນການລົງໂທດຜູ້ສໍ້ລາດບັງຫຼວງ, ຖ້າຄົ້ນພົບຜູ້ໃດກໍ່ລົງໂທດຜູ້ນັ້ນຢ່າງເດັດດ່ຽວຈະບໍ່ມີການອະນຸໂລມຢ່າງເດັດຂາດ.
ວັນທີ10ມີນານີ້, ທ່ານເຈຍຊຸ່ນວ້າງ ອະທິໄອຍະການປະຊາຊົນສູງສຸດຈີນໄດ້ລາຍງານວຽກງານຕໍ່ກອງປະຊຸມສະພາປະຊາຊົນ, ໄດ້ແຈ້ງຕົວເລກທີ່ຊັດເຈນເປັນການຢືນຢັນທີ່ເຂັ້ມແຂງ. ທ່ານກ່າວວ່າ,
"5ປີມານີ້,ໄດ້ຕັ້ງຄະດີສືບສວນການສໍ້ລາດບັງຫຼວງແຕ່1ແສນຢວນຂຶ້ນໄປ,ຍັກຍອກເງິນຫຼວງ1ລ້ານຢວນຂຶ້ນໄປ35255ຄະດີ,ເຈົ້າໜ້າຂອງລັດຂັ້ນເມືອງຫຼືຂັ້ນພະແນກຂຶ້ນໄປທີ່ຕ້ອງຫາມີ1ໝື່ນ3ພັນ929ຄົນ,ໃນນັ້ນ,ຂັ້ນກົມມີ930ຄົນ, ຂັ້ນແຂວງແລະກະຊວງມີ35ຄົນ.ໄດ້ບູລະນະກົນໄກໄລ່ຈັບຜູ່ຕ້ອງໂທດຄືນພາຍໃນປະເທດແລະຕ່າງປະເທດ,ຈັບຜູ້ຕ້ອງຫາທີ່ພວມຫຼົບໜີ4547ຄົນ,ນຳເອົາສິນບົນຄືນໄດ້24ຕື້480ລ້ານກວ່າຢວນ."
ເດືອນກັນຍາປີ2007,ຢູ່ປັກກິ່ງໄດ້ສ້າງຕັ້ງກົມປ້ອງກັນການສໍ້ລາດບັງຫຼວງແຫ່ງຊາດຈີນເຊິ່ງເປັນອົງການປ້ອງກັນການສໍ້ລາດບັງຫຼວງຂັ້ນລັດຂຶ້ນໄປຢ່າງເປັນທາງການ,ນີ້ເປັນສັນຍາລັກສະແດງໃຫ້ເຫັນວ່າວຽກງານຕ້ານການສໍ້ລາດລັງຫຼວງຂອງຈີນໄດ້ກ້າວຂຶ້ນລະດັບສູງໃໝ່.
ຄວາມໄວ້ເນື້ອເຊື່ອໃຈຂອງປະຊາຊົນທີ່ມີຕໍ່ລັດຖະບານ,ໄດ້ຮັບຄວາມຕັດສິນໃຈອັນໝັ້ນໜຽວກວ່າເກົ່າຈາກລັດຖະບານ.ໃນບົດລາຍງານວຽກງານລັດຖະບານຂອງທ່ານເວິ່ນເຈ່ຍປາວ ນາຍົກລັດຖະມົນຕີຂອງຈີນທີ່ກ່າວໃນພິທີໄຂກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນຊຸດນີ້,ທ່ານໃຫ້ຄຳໝັ້ນສັນຍາວ່າ,ແຕ່ນີ້ ໄປ,ລັດຖະບານຈີນຈະຈັດເອົາການສ້າງສາຕ້ານການສໍ້ລາດບັງຫຼວງສົ່ງເສີມການບໍລິຫານທີ່ປອດໃສຂາວສະອາດໄວ້ຢູ່ບ່ອນເດັ່ນກວ່າເກົ່າ.
|
