|
|
 |
| (GMT+08:00)
2008-03-12 10:58:21
|
 |
|
ລາຍການພິເສດສອງກອງປະຊຸມສະພາຈີນ(ວັນຈັນ,ວັນທີ10ມີນາ2008)
cri
ສະບາຍດີທ່ານຜູ້ຟັງທີ່ເຄົາລົບ
ພໍເຖິງເວລານີ້ກໍມາພົບກັນເປັນປະຈຳກັບລາຍການພິເສດທີ່ສ່ອງແສງເຖີງການເຄື່ອນໄຫວຂອງສອງກອງປະຊຸມສະພາຂອງຈີນ, ຄືກອງປະຊຸມເທື່ອທີ1ຂອງສະພາປຶກສາການເມືອງປະຊາຊົນແຫ່ງຊາດແລະສະພາຜູ້ແທນປະຊາຊົນແຫ່ງຊາດຊຸດທີ11ທີ່ພວມດຳເນີນຢູ່, ມື້ວານມື້ກ່ອນທີ່ເປັນມື້ພັກລັດຖະການ, ແຕ່ວ່າກອງປະຊຸມກໍ່ດຳເນີນເປັນປົກກະຕິ, ສັງຂານຈູມຄຳພັນກໍພະຍາຍາມຊອກຫາຫົວຂໍ້ທີ່ໜ້າສົນໃຈແລະຕິດພັນກັບພົນປະໂຫຍດຕົວຈິງຂອງປະຊາຊົນຈີນທີ່ຜູ້ແທນຂອງສອງກອບປະຊຸມສະພາເພິ່ນປຶກສາຫາລືກັນມາເວົ້າສູ່ທ່ານຟັງ.
ໃນຕອນເຊົ້າມື້ນີ້ທ່ານເຈຍຊຸ່ນຫວ້າງ ອະທິໄອຍະການກໍ່ໄດ້ຜ່ານບົດລາຍງານວຽກງານຂອງອະທິໄອຍະການປະຊາຊົນໃນ5ປີຜ່ານມາແລະແຜນການດຳເນີນວຽກງານໃນປີນີ້, ຊຶ່ງກໍ່ມີຫຼາຍອັນທີ່ໜ້າສົນໃຈ, ແລ້ວສັງຂານຈະຄັດຈອນມາເວົ້າສູ່ຟັງໃນມື້ໜ້າ, ແຕ່ວ່າສຳລັບມື້ນີ້ຈະເວົ້າເຖີງການສ້າງວຽກເຮັດງານທຳໃຫ້ແກ່ປະຊາຊົນສູ່ຟັງວ່າມີຜົນສຳເລັດ ມີຄວາມສະດວກຄວາມຫຍຸ້ງຍາກແນວໃດຢູ່ໃນປະເທດຈີນທີ່ມີພົນລະເມືອງຫຼາຍທີ່ສຸດໃນໂລກແຫ່ງນີ້ ແລະກໍ່ເປັນຫົວຂໍ້ໜຶ່ງທີ່ມີການປຶກສາຫາລືກັນໃນກອງປະຊຸມສະພາຜູ້ແທນປະຊາຊົນເທື່ອນີ້. ທ່ານທຽນເຊີງປິ່ງ ລັດຖະມົນຕີວ່າການກະຊວງແຮງງານແລະສະຫວັດດີການສັງຄົມຂອງຈີນກ່າວໃນສະພາວ່າ: ເຖີງວ່າໃນ5ປີຜ່ານມານີ້ຈີນຈະສາມາດສ້າງວຽກເຮັດງານທຳໃນຕົວເມືອງໄດ້ສູງຮອດ51ລ້ານຕຳແໜ່ງງານ ແຕ່ວ່າສະພາບດ້ານວຽກເຮັດງານທຳໃນປີນີ້ກໍ່ຍັງຈະໜັກໜ່ວງຢູ່, ເພາະວ່າໃນແຕ່ລະປີມີຄົນຕ້ອງການເຮັດວຽກທັງຢູ່ໃນເມືອງແລະຊົນນະບົດມີປະທານ20ລ້ານຄົນ, ສະນັ້ນຈຶ່ງເປັນບັນຫາໃຫຍ່ສົມຄວນທີ່ລັດຖະບານພວມຫາວິທີແກ້ໄຂ. ສະພາບຕົວຈິງກໍ່ຄືແຮງງານເຄື່ອນທີ່ຈາກຊົນນະບົດເຂົ້າຕົວເມືອງແມ່ນມີຢ່າງຫຼວງຫຼາຍພາຍມາກ, ແຕ່ວ່າເມືອງໃຫຍ່ໃນປະເທດສາມາດຕອບສະໜອງຕຳແໜ່ງງານໄດ້ປະມານ12ລ້ານຕຳແໜ່ງຕໍ່ປີ.
ໃນວັນພຸດແລ້ວນີ້ທ່ານເວີນເຈຍປາວ ນາຍົກລັດຖະມົນຕີເພິ່ນກໍ່ເວົ້າວ່າ ການຕອບສະໜອງໂອກາດໃນການມີວຽກເຮັດງານທຳຢ່າງພຽງພໍສຳລັບຈີນທີ່ມີພົນລະເມືອງຫຼາຍທີ່ສຸດໃນໂລກນີ້ກໍ່ເປັນສິ່ງທ້າທາຍທີ່ໃຫຍ່ຫຼວງແຕ່ພວກເຮົາກໍ່ຕ້ອງເພີ່ມຄວາມພະຍາຍາມຂຶ້ນຕື່ມອີກຫຼາຍເທົ່າເພື່ອຊີວິດການເປັນຢູ່ທີ່ດີຂອງປະຊາຊົນ. ໃນ5ປີຜ່ານມານີ້ລັດຖະບານກໍ່ໃຊ້ງົບປະມານເຖີງ66ຕື້ກວ່າຢວນຫຼືປະມານ9ຕື້300ລ້ານໂດລາເພື່ອໃຊ້ເຂົ້າໃນວຽກງານສະໜັບສະໜູນໂຄງການສ້າງວຽກເຮັດງານທຳໃຫ້ປະຊາຊົນ, ໂຄງການເຫຼົ່ານີ້ກໍ່ສາມາດສ້າງວຽກເຮັດງານທຳໃຫ້ຄົນໃນເມືອງ10ລ້ານຄົນ, ຢູ່ຊົນນະບົດ8ລ້ານຄົນຕໍ່ປີ. ແຕ່ວ່ານັກເສດຖະສາດບາງທ່ານກໍ່ບອກວ່າ, ການນຳໃຊ້ນະໂຍບາຍການເງິນທີ່ຮັດກຸມຂອງລັດຖະບານກໍ່ອາດຈະໄປກົດໜ່ວງການລົງທຶນທີ່ຈະເປັນການສ້າງແຮງກົດດັນຫຼາຍຂຶ້ນຕໍ່ຕະຫຼາດແຮງງານ.
ຜ່ານມາຜົນສຳເລັດກໍ່ມີສູງ ບັນຫາຄວາມຫຍຸ້ງຍາກກໍ່ມີຫຼາຍກໍ່ຍ້ອນມີພົນລະເມືອງຫຼາຍຄືເວົ້າມານີ້ລະທ່ານຜູ້ຟັງ, ຖ້າວ່າຜູ້ຟັງລາວມີໂອກາດໄປປັກກິ່ງ ຊຽງໄຮ້ ກວາງໂຈ່ວຫຼືເມືອງໃຫຍ່ໆຂອງຈີນກໍ່ຈະເຫັນແຮງງານຈາກຊົນນະບົດຈີນເຂົ້າມາເຮັດວຽກໃນຕົວເມືອງຫຼາຍອີຫຼີໂດຍສະເພາະຢູ່ຕາມສະຖານທີ່ກໍ່ສ້າງຕຶກອາຄານເຮືອນຊານບ້ານຊ່ອງ, ຖ້າຈະເວົ້າແລ້ວເຂົາເຈົ້າກໍ່ແມ່ນແຮງງານເຫຼືອຈາກຊົນນະບົດນັ້ນເອງ ຄືເຫຼືອຈາກການຜະລິດກະສິກຳກໍ່ພາກັນເຂົ້າມາໃນເມືອງເພື່ອຊອກວຽກເຮັດແລະກໍ່ສາມາດເຮັດໃຫ້ຊີວິດການເປັນຢູ່ຂອງເຂົາເຈົ້າດີຂຶ້ນກວ່າເກົ່າແທ້, ການສ້າງສາຂອງຈີນໄວຂຶ້ນເທົ່າໃດ ຄວາມຕ້ອງການແຮງງານລັກສະນະນີ້ກໍ່ນັບມື້ນັບເພີ່ມຂຶ້ນເປັນເງົາຕາມຕົວເຊັ່ນດຽວກັນ. ໃນມື້ວັນນີ້ທ່ານທຽນເຊີງປິ່ງເພິ່ນກໍ່ໄດ້ຊີ້ແຈ້ງ6ມາດຕະການທີ່ລັດຖະບານຈະສືບຕໍ່ເຮັດເພື່ອສົ່ງເສີມການມີວຽກເຮັດງານທຳ, ຄື: ປະຕິບັດຍຸດທະສາດການສ້າງງານແລະໃຫ້ບຸລິມະສິດໃນການມີວຽກເຮັດເພື່ອພັດທະນາເສດຖະກິດສັງຄົມ, ປັບປຸງນະໂຍບາຍຈ້າງງານທີ່ໄດ້ຜົນກວ່າເກົ່າ, ສົ່ງເສີມການມີວຽກເຮັດງານທຳໂດຍຜ່ານການດຳເນີນທຸລະກິດຫຼາຍຂຶ້ນ, ປັບປຸງລະບົບການບໍລິການຊອກວຽກເຮັດງານທຳ, ຈັດການອົບຮົມວິຊາຊີບເພື່ອປ້ອນແຮງງານທີ່ມີປະສິດທິພາບໃຫ້ແກ່ຕະຫຼາດແລະສ້າງຕັ້ງລະບົບເຕືອນໄພລ່ວງໜ້າສຳລັບການບໍ່ມີວຽກເຮັດເພື່ອໃຫ້ສາມາດຮັກສາສືບຕໍ່ມີວຽກເຮັດງານທຳທີ່ຍືນຍົງ. ນີ້ກໍ່ຄື6ມາດຕະການທີ່ກະຊວງແຮງງານແລະສະຫວັດດີການສັງຄົມຈີນເພື່ອແກ້ໄຂການມີວຽກເຮັດງານທຳໃຫ້ແກ່ປະຊາຊົນທີ່ທ່ານລັດຖະບານຕີເພິ່ນສະເໜີຕໍ່ກອງປະຊຸມສະພາຜູ້ແທນປະຊາຊົນແຫ່ງຊາດທີ່ພວມດຳເນີນຢູ່ນີ້.
ມາຮອດນີ້ເວລາຂອງລາຍການພິເສດໝົດອີກແລ້ວ, ມື້ອື່ນສັງຂານ ຈູມຄຳພັນຈະນຳເອົາຫົວຂໍ້ອື່ນມາລົມສູ່ຟັງອີກ. ຂໍຄວາມສຸກໂຊກດີຈົ່ງມີແດ່ມິດລາຍການຂອງCRIທຸກທ່ານ. ສະບາຍດີ.
|
|
|
