ວັນທີ 11 ມີນານີ້, ໃນກອງປະຊຸມເທື່ອທີ 1 ຂອງສະພາຜູ້ແທນປະຊາຊົນແຫ່ງຊາດຈີນຊຸດທີ 11 ທີ່ພວມດຳເນີນຢູ່, ລັດຖະບານຈີນໄດ້ສະເໜີແຜນການປະຕິຮູບອົງການລັດໃຫ້ສະພາຜູ້ແທນປະຊາຊົນ, ກຽມປະຕິບັດການປະຕິຮູບຄັ້ງທີ 6 ຕໍ່ອົງການລັດຖະບານທີ່ເຄີຍເຮັດມາແຕ່ປີ 1982. ນັກວິເຄາະກ່າວວ່າ, ການປະຕິຮູບເທື່ອນີ້ຈະເຮັດໃຫ້ການປະຕິຮູບໂຄງປະກອບຄຸ້ມຄອງການບໍລິຫານຂອງຈີນທີ່ຖືເອົາການ"ສ້າງລັດຖະບານແບບບໍລິການ"ເປັນເປົ້າໝາຍນັ້ນກ້າວໄປໜ້າ. ຕໍ່ໄປເຊີນຟັງລາຍງານລະອຽດ:
ວັນທີ 11 ມີນານີ້, ທ່ານຫຮວາຈ້ຽນໝິນ ທີ່ປຶກສາແຫ່ງລັດທັງເປັນເລຂາທິການຄະນະລັດຖະບານໄດ້ອະທິບາຍແຜນການປະຕິຮູບຄະນະລັດຖະບານ. ທ່ານກ່າວວ່າ:
"ໜ້າທີ່ຕົ້ນຕໍຂອງການປະຕິຮູບອົງການລັດເທື່ອນີ້ແມ່ນ, ໂດຍປິ່ນອ້ອມການປ່ຽນແປງພາລະບົດບາດຂອງລັດຖະບານແລະປັບການພົວພັນໜ້າທີ່ຮັບຜິດຊອບຂອງພາກສ່ວນຕ່າງໆໃຫ້ຄ່ອງຕົວ, ຄົ້ນຄວ້າປະຕິບັດໂຄງປະກອບພາກສ່ວນໃຫຍ່ມີທີ່ໜ້າທີ່ຮັບຜິດຊອບເອກະພາບກັນຢ່າງບັງເກີດຜົນ." ໃນຫຼາຍປີມານີ້, ລັດຖະບານຈີນໄດ້ຄົ້ນຄວ້າຫາພາລະບົດບາດທີ່ເໝາະສົມຂອງຕົນໃນການປົກຄອງປະເທດຢ່າງບໍ່ຢຸດຢັ້ງ. ແນວຄິດການປະຕິຮູບກົງຈັກເທື່ອນີ້ແມ່ນ, ຫັນເປັນລັດຖະບານແບບບໍລິການຢ່າງຮອບດ້ານ. ຍ້າຍວຽກງານທີ່ລັດຖະບານບໍ່ຄວນຄຸ້ມຄອງນັ້ນອອກໄປ, ແລະຄຸ້ມຄອງວຽກງານທີ່ລັດຖະບານຄວນເຮັດນັ້ນໃຫ້ດີ, ເສີຍຂະຫຍາຍບົດບາດພື້ນຖານຂອງຕະຫຼາດໃນການຈັດວາງຊັບພະຍາກອນໃຫ້ດີກວ່າເກົ່າຈາກດ້ານລະບອບ. ສະນັ້ນ, ຄະນະລັດຖະບານຈະຕັ້ງ 5 ກະຊວງໃໝ່ຄື: ກະຊວງອຸດສາຫະກຳແລະຂໍ້ມູນຂ່າວສານ, ກະຊວງຄົມມະນາຄົມຂົນສົ່ງ, ກະຊວງຊັບພະຍາກອນມະນຸດແລະປະກັນສັງຄົມ, ກະຊວງອະນຸລັກສິ່ງແວດລ້ອມແລະກະຊວງເຮືອນຢູ່ແລະການກໍ່ສ້າງຕົວເມືອງແລະຊົນນະບົດ.
ຄະນະລັດຖະບານຍັງຈະຕັ້ງອົງການປະສານງານຂັ້ນສູງຄືຄະນະກຳມະການພະລັງງານແຫ່ງລັດ, ກົມພະລັງງານແຫ່ງຊາດ. ກົມອາຫານແລະຢາທີ່ຈະຂຶ້ນກັບກະຊວງສາທາລະນະສຸກ, ຕົກລົງໃຫ້ກະຊວງສາທາລະນະສຸກຮັບໜ້າທີ່ປະສານງານໂດຍລວມຕໍ່ຄວາມປອດໄພດ້ານອາຫານແລະສືບສວນລົງໂທດອຸປະຕິເຫດໃຫຍ່ດ້ານຄວາມປອດໄພຂອງອາຫານ. ພາຍຫຼັງການປະຕິຮູບ, ຄະນະລັດຖະບານຈີນຈະປະກອບດ້ວຍ 27 ພາກສ່ວນ.
ທ່ານວ່າງຢູ້ຄາຍ ສາດສະດາຈານຂອງສະຖາບັນບໍລິຫານແຫ່ງຊາດຈີນກ່າວວ່າ, ການປະຕິຮູບອົງການລັດຮອບນີ້ມີຜົນດີຕໍ່ການແກ້ໄຂບັນຫາຈຳນວນໜຶ່ງດ້ານການສ້າງຕົນເອງຂອງລັດຖະບານ. ທ່ານກ່າວວ່າ:
"ການປະຕິຮູບແບບນີ້ໄດ້ຫຼຸດຈຸດຊ້ຳຊ້ອນກັນດ້ານພາລະບົດບາດລະຫວ່າງພາກສ່ວນຕ່າງໆ. ເຮັດແບບນີ້ແມ່ນສຳຄັນທີ່ສຸດຕໍ່ການຍົກສູງປະສິດທິພາບຂອງລັດຖະບານແລະຫຼຸດຕົ້ນທຶນຂອງການດຳເນີນວຽກງານຂອງລັດຖະບານ."
ກ່ຽວກັບການຕັ້ງຄະນະກຳມະການພະລັງງານແຫ່ງລັດແລະກົມພະລັງງານແຫ່ງຊາດ, ທ່ານວ່າງຢູ້ຄາຍກ່າວວ່າ, ປະຈຸບັນຈີນແມ່ນປະເທດຜະລິດແລະບໍລິໂພກພະລັງງານໃຫຍ່ອັນດັບ 2 ໃນໂລກ, ນ້ຳມັນດິບເກືອບ 50% ຊື້ຈາກຕ່າງປະເທດ. ຈາກສະພາບດັ່ງກ່າວຈຶ່ງເຮັດໃຫ້ຈີນຖືເອົາຄວາມປອດໄພດ້ານພະລັງງານເປັນຍຸດທະສາດຂອງຊາດ.
ນອກນີ້, ກົມໃຫຍ່ອະນຸລັກສິ່ງແວດລ້ອມປ່ຽນເປັນກະຊວງອະນຸລັກສິ່ງແວດລ້ອມ, ສະແດງໃຫ້ເຫັນວ່າລັດຖະບານຈີນຈະເພີ່ມຄວາມແຮງໃນການປັບປຸງສິ່ງແວດລ້ອມແລະອະນຸລັກທຳມະຊາດ. ຕັ້ງກະຊວງເຮືອນຢູ່ແລະການກໍ່ສ້າງຕົວເມືອງແລະຊົນນະບົດກໍໄດ້ສ່ອງແສງເຖິງຄວາມເອົາໃຈໃສ່ຂອງລັດຖະບານຈີນໃນການແກ້ໄຂບັນຫາຊີວິດການເປັນຢູ່ຂອງປະຊາຊົນ.
ໃນການເອົາຂ່າວນັກຂ່າວໄດ້ພົບວ່າ, ແຜນການປະຕິຮູບອົງການລັດສະບັບນີ້, ໄດ້ຮັບການສະໜັບສະໜູນສູງສົມຄວນຈາກຜູ້ແທນສະພາປະຊາຊົນແຫ່ງຊາດຈີນ. ທ່ານຫຼິວຈື່ ຜູ້ແທນທີ່ມາຈາກແຂວງກ່ານຊູ້ກ່າວວ່າ:
"ໃນການປະຕິຮູບກົງຈັກ, ຈຸດໜັກໄດ້ສ່ອງແສງການດັດສົມຄວບຄຸມມະຫາພາກພ້ອມດ້ວຍການປັບປຸງແລະຈັດງາງພາລະບົດບາດການບໍລິຫານຂອງລັດຄືນໃໝ່, ຂ້າພະເຈົ້າເຫັນວ່າໃນການຈັດວາງແລະປັບປຸງກະຊວງຕ່າງໆລ້ວນແຕ່ດີຫຼາຍ."
ກອງປະຊຸມສະພາຜູ້ແທນປະຊາຊົນຈະລົງຄະແນນສຽງຕໍ່ແຜນການປະຕິຮູບອົງການລັດໃນວັນທີ 15 ມີນານີ້. ຖ້າແຜນການດັ່ງກ່າວຖືກຮັບຮອງ, ການປະຕິຮູບອົງການລັດຮອບໃໝ່ກໍ່ຈະເລີ່ມປະຕິບັດຢ່າງເປັນທາງການ.
|