|
|
 |
| (GMT+08:00)
2008-03-12 17:15:01
|
 |
|
ລັດຖະມົນຕີວ່າການກະຊວງການຕ່າງປະເທດຈີນຈັດກອງປະຊຸມຂ່າວຊີ້ແຈງນະໂຍບາຍຕ່າງປະເທດຂອງຈີນ
cri
ເວລາ10ໂມງເຊົ້າວັນທີ12ມີນານີ້, ທ່ານຢາງເຈຍສື ລັດຖະມົນຕີວ່າການກະຊວງການຕ່າງປະເທດຈີນໄດ້ຈັດກອງປະຊຸມຂ່າວຢູ່ຫ້ອງສີຄຳຊັ້ນສາມຂອງຫໍສະພາປະຊາຊົນປັກກິ່ງ, ທ່ານໄດ້ຕອບຄຳຖາມຂອງນັກຂ່າວກ່ຽວກັບນະໂຍບາຍການຕ່າງປະເທດຂອງຈີນ, ການພົວພັນລະຫວ່າງຈີນກັບປະເທດໃຫຍ່ຕ່າງໆ, ງານໂອລິມປິກປັກກິ່ງ, ການປ່ຽນແປງຂອງດິນຟ້າອາກາດແລະບັນຫາອື່ນໆທີ່ກ່ຽວຂ້ອງ. ໃນກອງປະຊຸມຂ່າວເປັນເວລາເກືອບສອງຊົ່ວໂມງ, ທ່ານຢາງເຈຍສືໄດ້ຕອບຄຳຖາມຂອງນັກຂ່າວຈີນແລະຕ່າງປະເທດລວມ13ຄົນ. ຄົນທັງຫຼາຍໄດ້ເອົາໃຈໃສ່ວ່າ, ໃນບັນຫາເຫຼົ່ານີ້, ການພົວພັນລະຫວ່າງຈີນກັບປະເທດໃຫຍ່ໃນໂລກແມ່ນບັນຫາທີ່ຄົນເອົາໃຈໃສ່ນຳຫຼາຍກວ່າໝູ່. ຕໍ່ເລື່ອງນີ້, ທ່ານຢາງເຈຍສືໄດ້ອະທິບາຍຢ່າງລະອຽດ. ທ່ານກ່າວວ່າ:
ການພົວພັນລະຫວ່າງຈີນກັບອາເມລິກາໄດ້ຮັກສາຄວາມໝັ້ນທ່ຽງແລະສືບຕໍ່ຂະຫຍາຍໄປໜ້າໂດຍລວມ, ພວກຂ້າພະເຈົ້າຫວັງໃຫ້ສອງຝ່າຍລ້ວນແຕ່ສາມາດຢືນຢູ່ຈຸດແລະເບິ່ງໄປທາງໄກ, ຊຸກຍູ້ການພົວພັນຮ່ວມມືທີ່ມີລັກສະນະສ້າງສັນລະຫວ່າງສອງປະເທດຂະຫຍາຍໄປໜ້າຢ່າງບໍ່ຢຸດຢັ້ງ. ການພົວພັນ ຈີນຣັດເຊຍໃນປະຈຸບັນແມ່ນດີງາມ. ສອງຝ່າຍເປັນເອກະສັນກັນເຫັນດີຖືເອົາສົນທິສັນຍາມິດຕະພາບແລະຮ່ວມມືກັນຖານບ້ານໃກ້ເຮືອນຄຽງທີ່ດີຕໍ່ກັນເປັນທິດຊີ້ນຳ, ເພື່ອສືບຕໍ່ຊຸກຍູ້ການພົວພັນລະຫວ່າງສອງຝ່າຍ. ນັບແຕ່ຈີນກັບອົງປະກອບຮ່ວມເສດຖະກິດເອີລົບສ້າງສາຍສຳພັນທາງການໃນປີ1975ເປັນຕົ້ນມາ, ການພົວພັນຈີນເອີລົບໄດ້ຂະຫຍາຍໄປໜ້າຢ່າງໜັກແໜ້ນຕະຫຼອດມາ, ພວກເຮົາຮູ້ສຶກດີໃຈນຳເລື່ອງນີ້, ແລະມີຄວາມໝັ້ນໃຈອັນເຕັມປ່ຽມຕໍ່ອະນາຄົດແຫ່ງການຂະຫຍາຍການພົວພັນລະຫວ່າງສອງຝ່າຍ.
ປະເທດໃຫຍ່ແມ່ນຂໍກະແຈ, ປະເທດອ້ອມຂ້າງແມ່ນສຳຄັນກວ່າໝູ່, ໃນກອງປະຊຸມຂ່າວທີ່ຈັດຂຶ້ນໃນວັນທີ12ມີນາ, ການພົວພັນລະຫວ່າງຈີນກັບປະເທດອ້ອມຂ້າງກໍໄດ້ກາຍເປັນຈຸດສຸມທີ່ນັກຂ່າວທັງຫຼາຍສົນໃຈ. ທ່ານຢາງເຈຍສືໄດ້ຢືນຢັນການພົວພັນລະຫວ່າງຈີນກັບປະເທດອ້ອມຂ້າງເຊັ່ນສາທາລະນະລັດເກົາຫຼີ, ສປປເກົາຫຼີ, ຍີ່ປຸ່ນແລະປະເທດອື່ນໆຢ່າງເຕັມປ່ຽມ.
ໃນ30ປີມານີ້, ການທູດກັບຕ່າງປະເທດຂອງຈີນມີຄວາມຄືບໜ້າອັນສຳຄັນແມ່ນມີການພົວພັນໂດຍກົງກັບນະໂຍບາຍການຕ່າງປະເທດທີ່ຕິດແທດຕົວຈິງຂອງລັດຖະບານຈີນ. ຄັນຊັ້ນແນວຄິດການຕ່າງປະເທດຂອງຈີນໃນໄລຍະໃໝ່ມີເນື້ອໃນຫຍັງແດ່? ມາຟັງຊີ້ແຈງຂອງທ່ານຢາງເຈຊື. ທ່ານກ່າວວ່າ, ອັນທຳອິດແມ່ນ ພັດທະນາໂດຍສັນຕິ. ອັນທີສອງແມ່ນຕິດຕໍ່ແລກປ່ຽນກັນ.ເຮັດແນວນີ້ຈຶ່ງສາມາດເພີ່ມທະວີຄວາມໄວ້ເນື້ອເຊື່ອໃຈກັນ, ເພີ່ມທະວີການຮ່ວມມືກັນແລະເພີ່ມຄວາມຮັບຮູ້ທີ່ເປັນເອກະສັນກັນ. ອັນທີສາມແມ່ນ ໃຫ້ໄດ້ຮັບຜົນປະໂຫຍດນຳກັນ. ນີ້ບໍ່ພຽງແຕ່ໝາຍເຖິງຂົງເຂດເສດຖະກິດການຄ້າເທົ່ານັ້ນ, ຢູ່ໃນຂົງເຂດອື່ນໆ ເຊັ່ນການເມືອງ ຄວາມປອດໄພ ວັດທະນະທຳແລະການສຶກສາກໍ່ຄວນເຮັດຄືກັນ. ແລະອັນທີສີ່ ແມ່ນຕ້ອງຮ່ວມມືຢ່າງກົມກຽວກັນ.
ປີ2008ຈີນຈະຈັດງານກິລາໂອລິມປິກ. ໃນກອງປະຊຸມຂ່າວທີ່ຈັດຂຶ້ນໃນມື້ດຽວກັນ, ງານກິລາໂອລິມປິກປັກກິ່ງກໍແມ່ນບັນຫາທີ່ນັກຂ່າວສົນໃຈ. ໂດຍແນໃສ່ນັກຂ່າວບາງຄົນຍົກຄຳຖາມກ່ຽວກັບ"ງານກິລາໂອລິມປິກພົວພົນກັບການເມືອງ" "ການຮັບປະກັນຄວາມປອດໄພຂອງງານກິລາໂອລິມປິກ"ແລະບັນຫາອື່ນໆ, ທ່ານຢາງເຈຊືໄດ້ລົບລ້າງຄວາມສົງໄສຂອງນັກຂ່າວເຫຼົ່ານີ້ດ້ວຍຄວາມເວົ້າຕະຫຼົກ. ທ່ານເວົ້າວ່າ, ລັດທິຮັກຊາດກັບການຫັນງານກິລາໂອລິມປິກໃຫ້ເປັນບັນຫາການເມືອງແມ່ນມະໂນພາບສອງຢ່າງທີ່ຕ່າງກັນໝົດ. ຂ້າພະເຈົ້າຄິດວ່າທະແນມແຕ່ແມ່ນຜູ້ທີ່ມີຄວາມຍຸດຕິທຳແລະເບິ່ງບັນຫາທາງພາວະວິໄສກໍຈະຮູ້ໄດ້ວ່າ, ປະຊາຊົນຈີນໄດ້ສະໜັບສະໜູນງານກິລາໂອລິມປິກອັນມະໂຫລານຢ່າງແຂງແຮງແລະຈິງໃຈ.
ເມື່ອສະຫຼຸບອະດີດແລະມຸ່ງໜ້າສູ່ອະນາຄົດ, ທ່ານຢາງເຈຊືເຫັນວ່າ, ໂອກາດຫຼາຍກວ່າການທ້າທາຍ, ນີ້ແມ່ນທ່າອ່ຽງລວມຂອງວຽກງານການຕ່າງປະເທດຂອງຈີນໃນ5ປີຕໍ່ໜ້ານີ້. ທ່ານກ່າວວ່າ, ພວກເຮົາຕ້ອງຫັນການທ້າທາຍໃຫ້ເປັນໂອກາດ, ຫັນໂອກາດໃຫ້ເປັນຄວາມຈິງ, ຮັບໃຊ້ພາລະກິດສ້າງສາສັງຄົມທີ່ອິ່ມໜໍາສຳລານຢ່າງຮອບດ້ານໃຫ້ດີກວ່າເກົ່າ, ຮ່ວມກັນກັບປະຊາຊົນທົ່ວໂລກສ້າງອະນາຄົດທີ່ດີງາມກວ່າເກົ່າ. ພວກເຮົາມີຄວາມໝັ້ນໃຈຢ່າງເຕັມປ່ຽມຕໍ່ອະນາຄົດຂອງຈີນແລະຂອງໂລກ.
|
|
|
