ຕາມຂ່າວCRI: ວັນທີ 12 ມີນານີ້ໃນເວລາຕອນຄຳຖາມຂອງນັກຂ່າວກ່ຽວກັບກະຊວງການຕ່າງປະເທດອາເມລິກາເຜີຍແຜ່ບົດລາຍງານສິດທິມະນຸດທີ່ກ່ຽວຂ້ອງເຖິງຈີນໃນຫວ່າງມໍ່ໆນີ້, ທ່ານຊິນກ່າງ ໂຄສົກກະຊວງການຕ່າງປະເທດຈີນກ່າວວ່າ, ຝ່າຍຈີນຍິນດີດຳເນີນການສົນທະນາແລະການແລກປ່ຽນກັບປະເທດຕ່າງໆໃນໂລກກ່ຽວກັບບັນຫາສິດທິມະນຸດບົນພື້ນຖານສະເໝີພາບແລະເຄົາລົບເຊິ່ງກັນແລະກັນ, ແຕ່ຄັດຄ້ານປະເທດໃດກໍ່ຕາມທີ່ໃຊ້ບັນຫາສິດທິມະນຸດມາແຊກແຊງວຽກງານພາຍໃນຂອງປະເທດອື່ນຢ່າງເດັດດ່ຽວ.
ທ່ານຊິນກ່າງຊີ້ອອກວ່າ, ລັດຖະບານຈີນໄດ້ພະຍາຍາມຢ່າງບໍ່ລົດລະເພື່ອເປີດກວ້າງປະຊາທິປະໄຕ ເສີມສ້າງລະບອບກົດໝາຍແລະຊຸກຍູ້ສິດທິມະນຸດ, ຜົນງານອັນໃຫຍ່ຫຼວງທີ່ ໄດ້ຮັບໃຜໆກໍເຫັນຢ່າງປະຈັກຕາໃນປະຊາຄົມໂລກ. ທ່ານຊີ້ອອກວ່າ, ກະຊວງການຕ່າງປະເທດອາເມລິກາເຜີຍແຜ່"ບົດລາຍງານສິດທິມະນຸດຕ່າງປະເທດປີ 2007", ເນື້ອໃນກ່ຽວພັນເຖິງຈີນນັ້ນໄດ້ສືບຕໍ່ບິດເບືອນຄວາມຈິງ, ໄດ້ໂຈມຕີສະພາບການສິດທິມະນຸດຂອງຈີນຢ່າງບໍ່ມີເຫດຜົນ, ການກະທຳດັ່ງກ່າວແມ່ນຜິດພາດຫຼາຍ, ກົນອຸປາຍນີ້ຈະບໍ່ບັນລຸຜົນໃດໆເລີຍ. ຈີນເຕືອນໃຫ້ຝ່າຍອາເມລິກາຢ່າຖືຕົນເອງເປັນ"ຜູ້ປົກປ້ອງສິດທິມະນຸດ"ອີກ, ຄວນເອົາໃຈໃສ່ສະພາບສິດທິມະນຸດຂອງຕົນຫຼາຍກວ່າເກົ່າ. ຝ່າຍຈີນຍັງໄດ້ທວງໃຫ້ຝ່າຍອາເມລິກາຢຸດຕິການເຜີຍແຜ່"ບົດລາຍງານສິດທິມະນຸດຂອງຕ່າງປະເທດ", ຢຸດການກະທຳທີ່ໃຊ້ນະໂຍບາຍສອງໜ້າໃນບັນຫາສິດທິມະນຸດແລະແຊກແຊງວຽກງານພາຍໃນຂອງປະເທດອື່ນ.
|