ປະຈຸບັນ, ກອງປະຊຸມປະຈຳປີຂອງສະພາຜູ້ແທນປະຊາຊົນແຫ່ງຊາດຈີນແລະສະພາປຶກສາການເມືອງປະຊາຊົນແຫ່ງຊາດຈີນພວມດຳເນີນຢູ່ປັກກິ່ງ. ໃນຜູ້ແທນສະພາຜູ້ແທນປະຊາຊົນແລະກຳມະການສະພາປຶກສາການເມືອງຫຼາຍພັນຄົນ, ມີກຸ່ມຄົນໜຶ່ງດຶງດູດສາຍຕາຂອງຄົນທັງຫຼາຍ, ພວກເພິ່ນກໍຄືຜູ້ແທນທີ່ມາຈາກສາສະໜາພຸດ ສາຫະໜາເຕົາ ສາສະໜາອິດສະລາມ ສາສະໜາໂລມັງກະໂຕລິກແລະສາສະໜາຄຼິດສະຕຽນ. ຄະນະກຳມະການສັນຕິພາບວົງການສາສະໜາຈີນທີ່ປະກອບດ້ວຍຜູ້ຕາງໜ້າສາສະໜາເຫຼົ່ານີ້ໄດ້ກາຍເປັນອົງການສຳຄັນຂອງການໄປມາຫາສູ່ກັນກັບຕ່າງປະເທດຂອງສະພາປຶກສາການເມືອງແຫ່ງຊາດຈີນ.
ຄະນະກຳມະການສັນຕິພາບວົງການສາສະໜາຈີນແມ່ນທ່ານຈ້າວຜູ້ຊູ່ ຜູ້ນຳສາສະໜາພຸດຈີນລິເລີ່ມແລະຊຸກຍູ້ສ້າງຕັ້ງຂຶ້ນເມື່ອປີ 1994. ຈຸດປະສົງແມ່ນເພີ່ມທະວີອົງການສາສະໜາຕ່າງໆຂອງຈີນແລະສາສະນິກກະຊົນຮັກສາແລະເຂົ້າຮ່ວມພາລະກິດສັນຕິພາບຂອງໂລກ, ພັດທະນາການໄປມາຫາສູ່ກັນດ້ວຍໄມຕີຈິດກັບອົງການສັນຕິພາບສາສະໜາແລະພາກສ່ວນທີ່ກ່ຽວຂ້ອງຕ່າງໆຂອງໂລກ, ພ້ອມກັນຊຸກຍູ້ແລະຮັກສາສັນຕິພາບຂອງໂລກ.
ຈີນມີສາສະນິກກະຊົນທີ່ເຊື່ອຖື 5 ສາສະໜາໃຫຍ່ຫຼາຍກວ່າ 100 ລ້ານຄົນ. ໃນແຕ່ລະປີ, ຄະນະກຳມະການສັນຕິພາບວົງການສາສະໜາຈີນລ້ວນແຕ່ຈະຈັດຕັ້ງການສວດມົນເພື່ອສັນຕິພາບ, ເຂົ້າຮ່ວມກອງປະຊຸມປົກປ້ອງສັນຕິພາບສາກົນ, ສະແດງສຽງໃນໃຈຂອງວົງການສາສະໜາຈີນທີ່ຄັດຄ້ານສົງຄາມແລະຮັກຫອມສັນຕິພາບ. ພ້ອມກັນນັ້ນ, ຄະນະກຳມະການສັນຕິພາບວົງການສາສະໜາຈີນຍັງພະຍາຍາມຂຸດຄົ້ນແລະເສີມຂະຫຍາຍເນື້ອໃນທີ່ກ່ຽວຂ້ອງໃນວັດທະນະທຳສາສະໜາ, ຕັ້ງໜ້າເສີມຂະຫຍາຍບົດບາດສຳຄັນຂອງສາສະໜາໃນດ້ານການຊຸກຍູ້ສັງຄົມກົມກຽວກັນ.
ໃນ 5 ປີທີ່ຜ່ານມາ, ຄະນະກຳມະການສັນຕິພາບວົງການສາສະໜາຈີນໄດ້ຈັດງານສົນທະນາລະລຶກສົງຄາມປະຊາຊົນຈີນຕໍ່ຕ້ານຍີ່ປຸ່ນແລະສົງຄາມໂລກຕໍ່ຕ້ານຟັດຊິດໄດ້ຮັບໄຊຊະນະຄົບຮອບ 60 ປີ, ເຜີຍແຜ່"ສານສັນຕິພາບຂອງວົງການສາສະໜາຈີນ", ຍັງໄດ້ອອກຖະແຫຼງການກ່ຽວກັບບັນຫາທີ່ກ່ຽວຂ້ອງ, ບັນລະຍາຍຫຼັກໝັ້ນຂອງວົງການສາສະໜາຈີນ.
ໃນກອງປະຊຸມສະພາປຶກສາການເມືອງແຫ່ງຊາດຈີນທີ່ຈັດຂຶ້ນໃນທຸກປີ, ກຳມະການປຶກສາການເມືອງຂອງວົງການສາສະໜາລ້ວນແຕ່ຕ້ອງປຶກສາຫາລືແລະແລກປ່ຽນກັນກ່ຽວກັບຫົວຂໍ້ສັນຕິພາບຂອງໂລກ. ຕໍ່ເລື່ອງນີ້, ທ່ານເຈີ້ງວ້າງຖົ່ງ ເລຂາທິການຂອງກອງປະຊຸມສະພາປຶກສາການເມືອງເທື່ອນີ້ຊີ້ິອອກວ່າ:"ວົງການສາສະໜາແມ່ນສ່ວນປະກອບສຳຄັນຂອງອົງການສະພາປຶກສາການເມືອງປະຊາຊົນຈີນ, ຜູ້ແທນທີ່ມາຈາກ 5 ສາສະໜາໃຫຍ່ຢູ່ຮ່ວມກັນຢ່າງປອງດອງແລະຮ່ວມມືແລກປ່ຽນກັນຢູ່ໃນສະພາປຶກສາການເມືອງປະຊາຊົນ, ປະກອບສ່ວນພິເສດເຂົ້າໃນຄວາມສາມັກຄີຂອງປະຊາຊາດ, ເສດຖະກິດພັດທະນາ, ສັງຄົມກົມກຽວກັນແລະປະເທດຊາດໂຮມເປັນເອກະພາບກັນ. ນີ້ແມ່ນທ່າແຮງໃຫຍ່ຂອງສະພາປຶກສາການເມືອງປະຊາຊົນຈີນ, ກໍແມ່ນຈຸດພິເສດໃຫຍ່ຂອງຄວາມສີວິໄລທາງການເມືອງຈີນ."
|