|
ອາເມລິກາເຫັນວ່າ, ງານກິລາໂອລິມປິກບໍ່ຄວນກາຍເປັນບັນຫາການເມືອງ
cri
Author: MO
ຕາມຂ່າວສານຊີນຮວາ: ສື່ມວນຊົນອາເມລິກາລາຍງານຂ່າວໃນວັນທີ 13 ມີນານີ້ວ່າ, ໃນກອງປະຊຸມກິລາໂລກທີ່ຈັດຂຶ້ນຢູ່ລັດການີເຟີເນຍແຫ່ງອາເມລິກາໃນວັນທີ 12 ມີນານີ້, ທ່ານພີເຕີ ຢູເບີໂລສ໌ ປະທານຄະນະກຳມະການໂອລິມປິກອາເມລິກາກ່າວວ່າ, ການເພີ່ມທະວີການຕິດຕໍ່ພົວພັນລະຫວ່າງຄົນກັບຄົນຈະສາມາດປັບປຸງການພົວພັນລະຫວ່າງປະເທດໃຫ້ດີຂຶ້ນ, ສ່ວນງານກິລາໂອລິມປິກກໍ່ພວມສະແດງເປັນຕົວສະແດງສຳຄັນແນວນີ້.
ພະນັກງານຄຸ້ມຄອງລະດັບສູງຂອງວົງການການຄ້າກິລາຂອງໂລກ 500 ກວ່າທ່ານໄດ້ເຂົ້າຮ່ວມກອງປະຊຸມເທື່ອນີ້. ໂດຍແນໃສ່ຖ້ອຍຄວາມຂອງອົງການສິດທິມະນຸດຈຳນວນໜຶ່ງທີ່ຕິຕຽນຈີນ, ທ່ານພີເຕີ ຢູເບີໂລສ໌ກ່າວວ່າ, ເມື່ອເບິ່ງໃນດ້ານຍາວໄກແລ້ວ, ເຂົາເຈົ້າຄວນຮັກສາການຕິດຕໍ່ພົວພັນກັບຈີນໃຫ້ຫຼາຍກວ່າເກົ່າທີ່ຈະຫຼາຍໄດ້. ທ່ານຮຽກຮ້ອງໃຫ້ບຸກຄົນວົງການການຄ້າກິລາທີ່ຮ່ວມປະຊຸມເພີ່ມທະວີການຕິດຕໍ່ພົວພັນກັບຈີນທັງຄົບເປັນເພື່ອນມິດ, ພ້ອມກັນນັ້ນ, ທ່ານກໍ່ຄາດວ່າ ເສດຖະກິດຂອງຈີນຈະເຕີບໂຕຕໍ່ໄປ.
ທ່ານພີເຕີ ຢູເບີໂລສ໌ກ່າວເນັ້ນວ່າ, ງານກິລາໂອລິມປິກບໍ່ຄວນຫັນເປັນການເມືອງ, ການຂວ້ຳບາດງານກິລາໂອລິມປິກ, ຜູ້ທີ່ຖືກລົງໂທດພຽງໜຶ່ງດຽວນັ້ນກໍ່ແມ່ນນັກກິລາເອງ. ທ່ານເວົ້າວ່າ, ຈີນຍ່ອມຈະຈັດງານກິລາໂອລິມປິກທີ່ດີເດັ່ນຄັ້ງໜຶ່ງ, ຜ່ານການຮັບຈັດງານກິລາໂອລິມປິກ, ຈີນຍ່ອມຈະເປີດປະຕູຫຼາຍກວ່າເກົ່າອີກຢ່າງແນ່ນອນ.
|
|
