ສະບາຍດີທ່ານຜູ້ຟັງທີ່ເຄົາລົບ:
ພົບກັນອີກແລ້ວກັບສັງຂານ ຈູມຄຳພັນໃນລາຍການພິເສດເພື່ອສ່ອງແສງການເຄື່ອນໄຫວຂອງສອງກອງປະຊຸມສະພາຂອງຈີນທີ່ພວມດຳເນີນຢູ່. ຕອນບ່າຍວັນນີ້ກອງປະຊຸມສະພາຜູ້ແທນປະຊາຊົນແຫ່ງຊາດກໍ່ໄດ້ເລີ່ມຂັ້ນຕອນການຄົ້ນຄວ້າພິຈາລະນາກ່ຽວກັບການປ່ຽນແປງການນຳຂອງລັດ, ມື້ນີ້ກໍ່ຍັງສືບຕໍ່ຢູ່. ສ່ວນກອງປະຊຸມສະພາປຶກສາການເມືອງປະຊາຊົນແຫ່ງຊາດ, ມື້ອື່ນກໍ່ເປັນມື້ສຸດທ້າຍແລ້ວ.
ມີມິດລາຍການສາວຂອງCRIບາງທ່ານສົ່ງຂໍ້ຄວາມສັ້ນໄປຫາພວກເຮົາບອກວ່າ, ຢາກໃຫ້ສັງຂານເວົ້າສູ່ຟັງວ່າຄວາມຄືກັນແລະຄວາມແຕກຕ່າງລະຫວ່າງສະພາຈີນກັບສະພາລາວ, ອັນນີ້ກໍ່ບໍ່ຂັດຂ້ອງຈັດຕາມຄຳຂໍຂອງທ່ານຜູ້ຟັງເລີຍ. ທຳອິດຈະເວົ້າເຖິງສະພາປຶກສາການເມືອງປະຊາຊົນແຫ່ງຊາດຂອງຈີນກ່ອນ, ສະພານີ້ຖ້າທຽບກັບລາວແລ້ວ, ກໍຢາກຄ້າຍຄືກັບກອງປະຊຸມແນວລາວສ້າງຊາດ, ທຳໜ້າທີ່ເປັນອົງການແນວໂຮມເອກະພາບຮັກຊາດຂອງປະຊາຊົນຈີນ, ຖືວ່າເປັນອົງການໃຫ້ຄຳປຶກສາດ້ານການເມືອງສູງສຸດຂອງປະເທດ. ບັນດາກຳມະການທີ່ເຂົ້າຮ່ວມກອງປະຊຸມລ້ວນແຕ່ແມ່ນຕົວແທນຈາກພາກສ່ວນຕ່າງໆຂອງສັງຄົມຈີນ.
ບໍ່ວ່າຈະເປັນປະຊາຊົນເຜົ່າຕ່າງໆ, ສາດສະໜາຕ່າງໆ, ຊັ້ນຄົນຕ່າງໆ, ອັນໜຶ່ງທີ່ຕ່າງຈາກລາວແມ່ນໃນລະບົບການເມືອງຂອງຈີນນອກຈາກພັກຄອມມູນິດທີ່ເປັນພັກນຳພາແລະພັກຄອງອຳນາດແລ້ວ, ຍັງມີ 8 ພັກຝ່າຍປະຊາທິປະໄຕອີກ. ລາຍຊື່ລະອຽດມີຄື: ຄະນະກຳມະການປະຕິວັດພັກກົກມິນຕັ້ງຈີນ, ອົງການສຳພັນປະຊາທິປະໄຕຈີນ, ສະມາຄົມປະຊາທິປະໄຕສ້າງຊາດຈີນ, ສະມາຄົມສົ່ງເສີມປະຊາທິປະໄຕຈີນ, ພັກປະຊາທິປະໄຕຊາວນາ-ກຳມະກອນຈີນ, ພັກຈື້ກົງຈີນ, ສະມາຄົມວິຊາການຈິວຊານແລະອົງການສຳພັນໄຕ້ຫວັນປົກຄອງຕົນເອງໂດຍປະຊາທິປະໄຕ. ທັງ 8 ພັກນີ້ບໍ່ແມ່ນພັກຝ່າຍຄ້ານ, ບໍ່ມີຄວາມຂັດແຂ່ງກັນ, ແຕ່ເຮັດວຽກແລະຄົງຕົວຢູ່ຮ່ວມກັນພັກຄອມມູນິດຈີນແບບຮ່ວມມືກັນ. ສະໜັບສະໜູນແນວທາງນະໂຍບາຍຂອງພັກຄອມມູນິດຈີນ.ສະພານີ້ຈະຈັດກອງປະຊຸມປີລະເທື່ອກ່ອນໜ້າສະພາຜູ້ແທນປະຊາຊົນປະມານ 2 – 3 ວັນ.
ບັດນີ້ມາເວົ້າເຖິງສະພາຜູ້ແທນປະຊາຊົນແຫ່ງຊາດຈີນມີຫຍັງຄືກັນແລະມີຫຍັງຕ່າງກັນກັບສະພາແຫ່ງຊາດລາວ. ສະພາຜູ້ແທນປະຊາຊົນແຫ່ງຊາດຈີນຖືວ່າເປັນອົງການນິຕິບັນຍັດສູງສຸດຂອງປະເທດ, ບົດບາດສິດໜ້າທີ່ຄວາມຮັບຜິດຊອບກໍ່ຄາຍໆກັບສະພາແຫ່ງຊາດລາວຄືຄົ້ນຄວ້າພິຈາລະນາຮັບຮອງບົດລາຍງານການປະຕິບັດວຽກງານຂອງລັດຖະບານ, ແຜນພັດທະນາເສດຖະກິດສັງຄົມ, ແຜນງົບປະມານ, ຮັບຮອງກົດໝາຍໃໝ່, ປັບປຸງກົດໝາຍເກົ່າ, ເລືອກຕັ້ງປະທານແລະຮອງປະທານປະເທດ, ແຕ່ງຕັ້ງຄະນະລັດຖະບານລວມທັງນາຍົກລັດຖະມົນຕີ. ແມ່ນອົງການຕົວແທນແຫ່ງສິດເປັນເຈົ້າຂອງປະຊາຊົນບັນດາເຜົ່າ, ເປັນອົງການອຳນາດລັດທີ່ມີສິດຕົກລົງບັນຫາພື້ນຖານຂອງຊາດ, ທັງເປັນອົງການນິຕິບັນຍັດແລະອົງການຕິດຕາມກວດກາການເຄື່ອນໄຫວຂອງອົງການບໍລິຫານແລະອົງການຕຸລາການ. ຜູ້ແທນທີ່ເຂົ້າຮ່ວມກອງປະຊຸມກໍ່ລ້ວນແຕ່ຖືກເລືອກຕັ້ງຈາກຂັ້ນຮາກຖານທ້ອງຖິ່ນທີ່ເປັນປາກເປັນສຽງແທນປະຊາຊົນ, ເພື່ອໃຫ້ຄຳແນະນຳຄຳສະເໜີຕ່າງໆຕໍ່ຄະນະລັດຖະບານ. ອັນທີ່ຄືກັນກໍ່ແມ່ນອາຍຸຂອງສະພາຜູ້ແທນແຕ່ລະຊຸດເປັນ 5 ປີ, ແຕ່ວ່າການປະຊຸມສະໄໝສາມັນນັ້ນສະພາຜູ້ແທນປະຊາຊົນແຫ່ງຊາດຈີນປະຊຸມປີລະເທື່ອໃນເດືອນມີນາ, ແຕ່ສຳລັບສະພາແຫ່ງຊາດລາວປະຊຸມປີລະ 2 ເທື່ອ. ກອງປະຊຸມສະພາຜູ້ແທນປະຊາຊົນແຫ່ງຊາດຈີນເທື່ອນີ້ເປັນເທື່ອທີ 1 ຂອງຊຸດທີ 11, ຈະດຳເນີນໄປຈົດຮອດວັນທີ 18 ເດືອນນີ້ຈຶ່ງຈະອັດກອງປະຊຸມ, ອີກບໍ່ດົນທ່ານກໍ່ຈະເຫັນໃບໜ້າຂອງຄະນະລັດຖະບານຊຸດໃໝ່ຂອງຈີນ.
ເອົາລະສຳລັບມື້ນີ້ພໍເທົ່ານີ້ກ່ອນ, ຖ້າທ່ານຜູ້ຟັງມີຄຳຖາມຫຍັງອີກກ່ຽວກັບ 2 ສະພາຂອງຈີນ, ກໍ່ສົ່ງຂໍ້ຄວາມສັ້ນໄປຫາພວກເຮົາໄດ້ທີ່ໝາຍເລກ 2430000ແລ້ວສັງຂານ ຈູມຄຳພັນຈະນຳມາຕອບອອກອາກາດສູ່ຟັງ. ສຳລັບມື້ນີ້ຂໍລາໄປກ່ອນ, ພົບກັນໃໝ່ມື້ອື່ນເວລາເກົ່າ. ສະບາຍດີ.
|